ئیسماعیل سەعید تروانشی ١٩٣٩- ١ / ٩ / ٢٠٢٤
خەباتکارەک و پێشمەرگەیەکێ دێرین و بێتەلەكێ پێشین و شارەزا
ل دەمژمێر ٤ێ ئێڤارییا رۆژا سێشەمێ ١٩/ ١١/ ٢٠٢٤ ل هولا پێشمەرگه ل ناڤەندا قوتابیان ل زانکویا دهوکێ، چالاكیەكا رێزلێنانێ ل ٦٧ سالێن خەبات و تێکۆشینا پێشمەرگە و کادرێ دێرینێ بێتەلا ھەر دو شۆڕەشێن ئیلۆن و گولانێ و ھەلگرێ مەدالیایا بارزانی یێ نەمر رەحمەتی ئیسماعیل سعید تروانشی، یێ ناڤدار ب ئیسماعیل لاسلکی، هاتە ساز کرن
ئیسماعیل لاسلکی یەك ژ پێشمەرگە یێ دێرین یێ شۆرەشا ئیلۆنێ و گولانێ بوو و هەروەسا یەك ژ كادرێ بێتەلێ یێ هەری پێشین یێ هەر دو شۆرەشان بوو. ئەڤ چالاكییا بژارتە ژ ئالیێ مالباتا خوەدێژێرازی ئیسماعیل لاسلکی ڤە هاتبوو ئامادەكردن و هەلگورد قەهار كوڤلی چالاكی برێڤە بر. گەلەك خەباتكار و پێشمەرگە، پلەدار و فەرماندە، شورەشگێر و كەسوكارێن ئەنفالبووییان، بەرپرسێن حكومەت و حزبی و لەشکەری و کەسایەتیێن جڤاکی و جەماوەرێ دەڤەرێ ب گشتی و دەزگەهێن ڕاگەهاندنێ د ڤێ چالاكیێ دا ئامادە بوون.
د ڤێ چالاكییا بژارتە دا:
دەقیقەیەكێ راوەستیان دگەل سرودا ئەی رەقیب بۆ رێزگرتن ل خەباتا پێشمەرگه و خوینا پیروزا شەهید و ئەنفالکریان.
پەیڤا کارگێرییا پارێزگەها دهۆکێ ژ ئالیێ برێز ماجد سید صالح سید عبدالخالق چەمسەیدی- هاریکارێ پارێزگاری ڤە هاتە خواندن.
چەمسەیدی د پەیڤا خوە دا گۆت کو، مرۆڤ خوە گەلەک دلشاد و سەربلند دبینە دەما بەشداریێ د چالاکیەکا ب ڤی ئاوایی دا دکە، ئامادەبوونا وە یێن برێز وەفاداری یە ژ بۆ خەبات و تەکۆشینا ئیسماعیل لاسلکی و هەموو وان هەڤال و هەڤچەپەرێن وی یێن برێز یێن کو جانێ خوە کریە قوربانی ژ بۆنا ئاخا پیرۆزا کوردستانێ و بەرەڤانیکرن ژ مافێن گەلێ کوردستان و هەتا گەلێ مە ئیرۆ گەهشتیە ڤێ قۆناغێ کو ئەم هەموو شانازیێ پێ دکن
د چالاكیێ دا ٤٠ شەمالك هاتنە هەلکرن و ٤٠ گولێن سپی ل بەر وێنەیێ خودێژێرازی ئیسماعیل لاسلکی هاتنە دانان.
مەحموود هرۆری- بەرپرسێ دەزگەهێ پێشمەرگە یێن ئیلون و گولانێ/ تایێ دهوکێ، تڤەنگا رەحمەتی و جلکێن وی یێن سەردەما پێشمەرگەتیێ و مەدالییا بارزانیێ نەمر كو، ژ ئالییّ سەرۆك مەسعود بارزانی ڤە ب مەدالیایا بارزانی یێ نەمر ڤە هاتبوو خەلات کرن، دگەل هەموو کەلوپەلێن رەحمەتی یێن سەردەما هەر دو شۆرەشان تەسلیمی نەڤیێن ئیسماعیل لاسلکی كرن کو ئەو ژی ل سەر رێیا باپیرێ خوە خەباتا ژ بۆنا مافێن رەوایێن گەل کوردستانێ بەردوام بن.
خەلاتێن رێزلێنانێ بۆ مالباتا خودێ ژێ رازی هاتنە پیشکێشکرن وەک رێزگرتن بو خەبات و رۆلێ شۆرەشگێری و کورپەروەری یێ وی و مالباتا وی د ناڤا تەڤگەرا رزگاریخوازا کوردستان دا.
ئیدریس ئیسماعیل سعید طروانشی پەیڤا مالباتێ پێشکێش کر و د پەیڤا خوە دا سپاسیا بەرهەڤبوونا مێڤانان و ئامادەبوویان کر و گۆت کو بەشداربوون و ئامادەبوونا وە نیشانا رێزگرتنێ یە، نە بەس ل ٦٧ سالێن خەبات و تەکۆشینا بابێ من، لێ رێزگرتنە ل خەبات و تەکۆشینا وان هەموو پێشمەرگە یێن ژیانا خوە و مالباتا خوە ژ بۆ دۆزا رەوایا گەلێ کوردستانێ تەرخان کری یە.
هەر د چارجۆڤەیا ڤێ چالاکیێ دا پیشناگەها وێنەیێن قۆناغێن جودا ژ خەباتا رەحمەتی د ناڤ هەر دو شۆرەشان دا هاتبوو ڤەکرن و بەشدارێن چالاکیێ ب دیتنا وان وێنەیێن دیرۆکی گەلەک دلشاد بوون.
وەکی مە گۆتی د چالاکییێ دا گەلەک سازیێن مەدیایێ ژی ئامادە ببوون و وان دەزگەهێن مەدیاییێ داخویانی ژی ئەندامێن مالباتێ و هەروەسا ژ ئامادەبوویان وەرگرتن و هەموویان چالاکییێن ب ڤی ئاوایی ب فەر و گرنگ زانین.
