ئۆپەراسیونێن تركیا چ دگەهینن

نڤیسین: سەردار هێتوتی

ل 17 ێ مەها حزیرانێ و ل ژێر ناڤێ “چەنگێن پڵنگی”، تركیا هێرش بۆ سەر هەرێما کوردستانا عیراقێ دایە دەست پێکرن. پارتیا كاركەرێن كوردستانێ (پەکەکە) ژ بۆ وێ بویە هێجەت و بەهانە و بێرەحمانە عەردێ ڤی وەڵاتی ئێخستیە ژێر پێلێن ئاگری. مرۆڤێ ڤی وەڵاتی ئێخستیە د ناڤا ترسێن دەروونی دا و حکومەتا هەرێمێ ژی وەک تشتەك نەبووی دحەسبینە.

دگەل ئەلندا ئازادیا کو ژ ئەنجامێ سەرهەڵدانێ هەڵاتی، تركیا ئێك ژ وان وەڵاتانە کو د بزاڤا لاوازکرنا پێگەهێ کوردان دایە ل دەڤەرێ و تا ئەڤڕۆیا مە ب سەدان ئۆپەراسیون دانە دەست پێکرن و هەر جار خواستیە چەکدارێن پەکەکێ د گۆرەپانێ دا نەمینن، لێ پشتی هەر لەشکەرکێشیەکێ بهێزبوونەک دایە پەکەکێ و ئەڤ پارتیا باکووری شیایە پتڕ خۆ د ناڤا کووراتیا عەردێ باشوور دا بنەجهـ بکە، لەوا ل جهێ لاوازیێ تركیا هەولدانە پەکەکە بهێزتر ببە.

د ناڤا “چەنگێن پڵنگی” دا لەشکرێ تركیا ل هندەک دەڤەران ب کووراتیا 50 کیلومەتران کەفتیە ناڤا ئاخا باشوورێ كوردستانێ، ڕۆژانە ژی عەسمانی د بەزینە و د ڤێ قوناغا عەسمانبەزاندنێ دا ئێدی فرۆکێن داگیرکەریێ یێن جهێن نێزیکی ئاکنجیبوونێ ددەنە بەر بۆمبان و چ نەمایە كو ئەڤ بۆمبەباران و تۆپبارانە  بگەهنە چەند سەد مەترەکان نێزیکی خانیێن خەلکی.

ئەگەر مەرەما تركیێ لاوازکرنا شیانێن لەشکری و پێگەهێ جەماوەریێ پەکەکێ بە چ پێ نەڤێت هەم شیانێن وێ وهەم ژی پێگەهێ وێ یێ ل کوردستانا تركیێ و ئەڤ وەلاتە دشێت دەست دانیتە سەر وان د ناڤا پاراستنا خوە یا نافخۆیی دا، لێ یا خویا بوی کو ب تنێ پەکەکە هێجەتە و مەرەم ژێ نەهێلانا کیانێ باشوورە هەر وەک لاوازکرنا پێگەهێ ڕۆژئاڤا ب داگیرکرنا عەفرینێ و تركیا یا د بزاڤێ دا دەڤەرا زاخۆ یا دەوڵەمەند ب پەترۆلێ و خۆدانا دەرگەهێ ئیبراهیم خەلیل دانیتە ژ کونترولا خۆ یا بریارێ و چاوا بخازیت حکومەتا هەرێمێ و یا ناڤەند ل گورەی حەزێن تركیا ڤەلڤینێ بکەن.

لاوازیا حکومەتا هەرێمێ ژی ل هەمبەر بێباوەریا خەلکی ئەڤ دەلیڤە خۆشکرنە کو خەلکی باوەری ب شیانێن حکومەتێ نەمینن و ژ بەر رولێ نیگەتیفێ هندەک لایەنان ژی کو خوە ب نەیارێن حکومەتێ ددەن دیارکرن ئێدی سەنگا باوەریا خەلکی هەڵوەریایە و دەلیڤەیە بۆ داگیرکەران.

نێرین / شیرۆڤە