ئێدی به‌سه‌ ژ ده‌ک و دۆلابێن ته‌ ڕا پەکەکە

دڤێ ئیرۆ ته‌مامێ کوردستانیان د بن ئالا و ڕێبه‌ریا سەرۆک مەسعوود بارزانی دا، ل دژی ده‌وله‌ت و پارتیێن ته‌رۆریست ده‌ست بدن هه‌ڤ و د ئاڤاکرنا کوردستانا ئازاد دا ببن خوه‌دی پار.
چاوا کو سه‌رۆک مسته‌فا بارزانی د ده‌ما خوه‌ دا گۆتبوو:” چ که‌سێ کو ڕوهێ نه‌ته‌وه‌پارێزی پێ ڕا چێنه‌بووبه‌، وێ ڕۆژه‌ک ژ ڕۆژان ئیخانه‌تێ ب گه‌لێ خوه‌ ڕا بکه‌” ئه‌ڤ گۆتن ژ بۆ ئیرۆ و ژ بۆ هه‌ر ده‌مێ ژی ده‌رباس دبه‌.
ئیرۆ پرسگرێکا سه‌ره‌که‌ یا د ناڤ کوردا دا، پرسگرێکا پارتیا كاركەرێن كوردستانێ (پەکەکە) و کوردێ ده‌رڤایی پەکەکێ یه‌.

هه‌ر چقاسی هه‌بوونا پەکەکێ یا ل قه‌ندیل و ده‌ڤه‌رێن دن ژبۆ حکومه‌تا کوردستانێ ژی سه‌رێشاندنه‌کێ ب خوه‌ ڕا بینه‌ ژی، دڤێ ژ باشوورییان زێده‌تر ئه‌م کوردێن باکور سه‌رێ خوه‌ ب ڤێ پرسگرێکێ ڕا بێشینن.

د داخویانی و هه‌لوه‌ستێن هنده‌ک ڕایه‌دارێن پەکەکێ دا ئاشكەرا دبە کو، شه‌رێ ل دژی ده‌وله‌تا ته‌رۆریست، چه‌ته‌ و پارتیێن ته‌رۆریست دا ئالیکاریا ناڤده‌وله‌تی، تێكەلیێن هه‌رێما کوردستان ب جیرانا ڕا ئه‌و نه‌ره‌حه‌ت کرنه‌.

گه‌ر پەکەکە کاربه‌ سه‌به‌بێ نه‌ره‌حه‌تیا خوه‌ ل سه‌ر ئه‌ساسێ کوردایه‌تیێ ژ ھەرێما کوردستانێ ڕا بێژە، ئه‌ز باوه‌رم وێ وه‌ک ده‌وله‌ت، هه‌رێما کوردستان ژی بکاربه‌ چاره‌سه‌ریه‌کێ ژ نه‌ره‌حه‌تیا پەکەکێ ڕا ببینه‌. ژ خوه‌ به‌یانێن سەرۆک مەسعوود بارزانی یێ د وی واری دا پر زه‌لالن.

سەرۆک مەسعوود بارزانی د هه‌ر دەرفەتەكێ دا چاره‌سه‌ریێ د ڕیا دیالۆگ و ڕیێن بێچه‌کیبوونێ و ده‌مۆکراتیک دا دبینە. دڤێ ئه‌م باکووری ژ نها دا زانبن کو، هه‌گه‌ر سبێ یان دوسبە باکورێ کوردستانێ ئازاد بوو، وێ ئه‌ڤ پرسگرێکا پەکەکێ کو ئیرۆ ل ڕۆژه‌ڤا و باشوورێ کوردستانێ ب شه‌کله‌کی کرێت خوا ل سه‌ر مله‌تێ کورد فه‌رز کریه‌ وێ ل باکور ژی ده‌ست پێ بکه‌. پرسگرێکا هه‌یی پرسگرێکا ته‌مامێ کوردستانێ ژی به‌، دڤێ ئه‌م باکوری ژ ئیرۆ دا ب به‌رپرسیاری ته‌ڤ بگه‌رن و خوه‌دی سیاسه‌ته‌ک نه‌ته‌وی بن. ئان نا سبێ ئه‌م ژی دێ ببن مازۆتێ شده‌تا پەکەکێ. وێ گاڤێ ئه‌م ژی تێکه‌ڤن ڕه‌وشا کو نها ل باشوور د ناڤبه‌را داگیرکه‌رێن کوردستانێ و هه‌ڤوه‌لاتیێ وێ دا هه‌یی ده‌ردکه‌ڤه‌ ئۆرتێ.
پرسگرێکا چاره‌سه‌ریا پەکەکێ و خوه‌دیلێده‌رکه‌تنا وێ نه‌ ئه‌رکا باشووره‌.

هه‌گه‌ر ل باشوور پرسگرێکا نەھێلانا پەکەکێ هه‌به‌، ئه‌رکا پێشین دکه‌ڤه‌ سه‌ر ملێن باکورییان بخوه‌ و دڤێ ئه‌و ل خوه‌ و ل ده‌سکه‌فتیێن خوه‌ خوه‌دی ده‌رکه‌ڤن. دڤێ د سه‌ری دا پەکەکە، ده‌ڤ ژ سیاسه‌تا توندی به‌رده‌ و ب ڕێیێن ده‌مۆکراتیک ل چاره‌سه‌رییا دیالۆگا د ناڤ کوردان دا بگه‌ره‌.

لێ گاڤا پەکەکە وان ده‌ستکه‌فتنێن کوردا بکه‌ قوربانا پاریێ خوه‌ ئان هه‌رێمه‌کێ؛ ب ناڤێ (کانتۆنا ئان ژی هه‌رێما مه‌دیا) دڤێ ئه‌م کوردێن باکور ب ده‌نگه‌ک بلند نه‌ ڕازیبوونا خوه‌ ل هەمبه‌ر هه‌لوستێن پەکەکێ یێ نه‌ د به‌رژه‌وه‌ندیا مڵه‌تێ کورد دا، بقیرینن.
ئه‌و ڕۆژ ژی ئیرۆ یه‌….
ژبەر كو پەکەکێ ژ نوو ڤه‌ ده‌ست ب شه‌رێ ده‌ستکه‌فتنێن کوردستانا ئازاد کریه‌.
پەکەکە بوویه‌ که‌له‌ما چاڤێ کوردان. پەکەکێ ده‌ست و پشت دایه‌ داگیرکه‌رێن کوردستانێ و شه‌رێ پارتیا دەمۆكراتا كوردستانێ (پەدەکە) و ڕومه‌تا مله‌تێ کورد مالباتا به‌رزانیان دکه‌.
پەکەکە شه‌رێ هێژاییێن کوردان دکه‌. پەکەکە نه‌ ته‌نێ مخالفێ خوه‌، هه‌روها زاروکێن وان یێن سێ سالی ژی دکووژه‌.
پەکەکە ب ناڤێ هه‌رێمێن خوه‌سه‌ر پارچه‌کرنا کوردستانێ ژ خوه‌ ڕا کریه‌ شیعار.
ب کوورت کورمانجی؛ پەکەکێ سوندا تار و مار کرنا کوردستانێ خواریه‌. ژ وێ بۆنا ڤێ ژی دڤێ ته‌مامێ کوردان ب ده‌نگه‌کی بلند بقیرن و بێژن؛ ئێدی به‌سه‌ ژ زلم، ده‌ک و دۆلابێن ته‌ ڕا پەکەکە

نووری چه‌لیک
2020.04.18

نێرین / شیرۆڤە