تركیا ئێریشی رۆژھلاتێ فراتێ دكە

سه‌رۆکێ ترکیا، تەیب ئه‌ردۆگان، د ئاخاڤتنه‌کا خوه‌ دا به‌حسا سوریێ کر و دا خوویاکرن کو دێ ترکیا ل هەمبه‌ر ڕۆژهلاتێ فراتێ ئۆپه‌راسیۆنه‌کێ بکه‌.

ئه‌ردۆگان د ئاخاڤتنا خوه‌ دا گۆت: باکورێ سوریی دبه‌ باشوورێ ترکیا، ل وێ ده‌ڤه‌رێ هه‌ولدانه‌ک هه‌یه‌ کو کوریدۆرەكا ته‌رۆرێ ڤه‌کن.

ئه‌ردۆگان به‌حسا پید/یپگ کر و گۆت: ئه‌م دبێژن ئه‌و ته‌رۆریستن ، لێ، هه‌ڤپه‌یمانیا مه یا ستراته‌ژیک، ئەمریکا دبێژه‌ کو ئه‌و نه‌ ته‌رۆریستن. ئه‌م ژ ئەمریکایێ ڕه‌ دبێژن ئه‌و به‌شه‌ک ژ پ ک ک ێ نه‌، ڕاستیا وان ل هۆلێیه‌ هون ژ بۆ چ ب وانره‌ ته‌ڤدگه‌رن. ژ بۆ منبجێ ژی هه‌تا ڤێ گاڤێ مه‌ تو ئه‌نجامه‌ک ده‌ستنه‌خستیه‌. نها برێز سه‌رۆکێ ئەمریکا دبێژه‌ کو ئه‌م دێ هه‌تا 30 ڕۆژێن دن هه‌موو تشتان چاره‌سه‌ر بکن، کا ئه‌م ببینن دێ چ كن.

د به‌رده‌وامیا ئاخاڤتنا خوه‌ دا ئه‌ردۆگان دبێژه‌: ئه‌م هێڤیدارن، وان پاقژ بکن. ل ئێدلبێ مه‌ پێشی ل تراژیدیەک مه‌زن گرت. نها دور هات  ئه‌م ھەبوونا ته‌رۆرستان ل ڕۆژهلاتێ فراتێ پاقژ بکن. ل منبجێ حیله‌ و لیستۆک هه‌مبه‌ری مه‌ بکارئانین، هه‌تا نها ژی، وه‌ها دۆم دکه‌. ئەمریکا ژ مه‌ ڕه‌ تشته‌کی دیار دکه‌، لێ دیسا ڕێخستنا ته‌رۆرێ د شه‌رێ دژی داعشێ دا بکار تینه‌. هه‌ری داوی دخوازه‌ 30 هه‌زار ته‌رۆریستان ڕاهێنان بکه‌. ژ مه‌ ڕه‌ ژی دبێژه‌: تشته‌ک وه‌ها نینه‌. مه‌دیا جیهانێ هه‌موو ڤێ یه‌کێ دزانه‌، د ده‌ستێ وان دا زانیارێ هه‌نه‌. ئه‌ڤ ڕاسته‌؟ هوون دزانن چ دکن؟

د داویا ئاخاڤتنا خوه‌ دا ئه‌ردۆگان گۆت: “ئەمه‌ریکا پێوه‌ندیێن خوه‌ لگه‌ل ڕێخستنا ته‌رۆرێ هه‌ر ڕۆژا دچه‌ پێش دخه‌. د ده‌ستێ خوه‌ دا ئالایێن وان هلددن”.

“گرێدایی ڕۆژهلاتێ فراتێ مه‌ بالا وه‌ کشاند، مه‌ ئاماده‌کاری ژی کرن. ئامه‌داکاریێن مه‌ گەهشتنه‌ قۆناغا داویێ. د ناڤ چه‌ند ڕۆژان دا، ئه‌م ده‌ست ب ئۆپه‌راسیۆنا ڕۆژهلاتێ فراتێ دکن. ئه‌م ڤێ یه‌کێ ڕادگەهینن! ئارمانجا مه‌ نه‌ سه‌ربازێن ئەمریکا نه‌. ئارمانجا مە ڕێخستنا ته‌رۆرێ یه‌!

ئه‌ڤ ئاخڤتنا ئه‌ردۆگان پشتی سه‌ردانا نوونه‌رێ تایبه‌ت یێ ئەمریکایێ ل سوریه‌ هاته‌ کرن، دیارە هه‌مان تشت ترکیا ژ ئەمریکایێ ڕه‌ گۆتیه‌، ترکیا كا چه‌وا ل هەمبه‌ر عه‌فرینێ و هنده‌ک ده‌ڤه‌رێن دن ئۆپه‌راسیۆن کرن، نها ژی خوه‌ ئاماده‌ دکن کو ل هەمبه‌ر ڕۆژهلاتێ فراتێ ژی ئۆپه‌راسیۆنه‌کێ بکن.

ل ھەمبەر ڤان گەفێن تركیا، یەكینەیێن پاراستنا گەل (ی پ گ) باسكێ لەشكەریێ پ ك ك ل رۆژاڤایێ كوردستانێ كەتیە د حالەتێ ئامادەباشیێ دا و وان ڤێ جارێ گەفێن دەولەتا تركیا ب جدی وەرگرتنە.

نێرین / شیرۆڤە