تەڤگەرا جوانێن کوردستانێ جارەک دن خوە چالاک دکە
ته‌ڤگه‌را جوانێن کوردستانێ جاردن خوه چالاک دکه و د رۆژه‌ڤا سیاسی یا کوردستانێ دا جهێ خوه یێ گرنگ دگره. وه‌ک تێ زانین ته‌ڤگه‌را جوانێن کوردستانێ د سالا ٢٠١٢ێ دا ل باکورێ کوردستانێ، یه‌که‌مین رێخستن بوو کو ناڤێ کوردستانێ ل خوه کر و سه‌ری ل ده‌زگه‌هێن ده‌وله‌تێ دا. پشتی گه‌له‌ک دادگه و جه‌زاکرنا هنده‌ک ئه‌ندامێن ته‌ڤگه‌رێ ناڤێ کوردستانێ هاته قه‌بوول کرن و هه‌روه‌ها ب ڤی ناڤی خه‌باتا خوه به‌رده‌وام کرن.
ته‌ڤگه‌را جوانێن کوردستانێ پشتی چه‌ندێن سالا ئالایێ کوردستانێ ل دیاربه‌کر و بلند کرن. ته‌ڤگه‌رێ د هه‌موو چالاکیێن خوه دا ئالایێ کوردستانێ هلدان. پرانیا کوردێن ترکیێ ژ بۆ پرۆپاگانده‌یا ده‌وله‌تێ و ده‌زه‌نفارماسیۆنا پەکەکێ ئالایێ کوردستانێ وه‌ک ئالایێ بارزانی یان ژی ئالایێ باکورێ ئیراقێ دهات ناڤکرن. لێ ته‌ڤگه‌رێ ئه‌ڤ ئیماژا خراب و خه‌له‌ت شکاند و وه‌ک ئالایێ کوردستانێ ، وه‌ک سه‌مبۆله‌ک نه‌ته‌وی بلند کر و دا ناساندن.
ته‌ڤگه‌رێ ئادارا ٢٠١١ێ ل قوسێرا مێردینێ ب مناسه‌به‌تا بیرانیا بارزانی یێ نه‌مر جڤینه‌ک د مه‌رجێن گه‌له‌ک نه‌خوه‌ش دا ل دارخست و ئالایێ کوردستانێ بلندکرن و رێبازا ته‌ڤگه‌رێ ل سه‌ر خه‌ته‌ک نه‌ته‌وی و کوردستانی راگەهاندن.
ئه‌ڤ ده‌مه‌ک بوو ته‌ڤگه‌ر یا بێ ده‌نگ بوو. نها جاردن ب داخویانیه‌کی چالاکبوونا خوه ژ رایا گشتی را رادگەهینن.
داخویانیا ته‌ڤگه‌رێ:
مه د سالا ٢٠١٠ێ دا وه‌ک گرووبه‌کا جوانان، ب ناڤێ جوانێن کوردستانێ، ده‌ست ب خه‌باتێن خوه کر. پشتی ده‌مه‌کێ هه‌ژمارا مه زێده بوو و هه‌وجه‌داری ب خه‌باته‌کا رێکوپێکتر چێ بوو. د ئه‌نجاما جڤینا گشتی یا د سالا ٢٠١٢ێ دا مه رێڤه‌بریا خوه دییار کر و ب ناڤێ ته‌ڤگه‌را جوانێن کوردستانێ (ته‌ڤگه‌ر) خه‌باتێن خوه دۆماند.
ئه‌م رێخستنه‌کا له‌گالن. مه د به‌رنامه‌یا خوه دا ژی و د داخویانیێن خوه دا ژی دییار کر کو “له‌گال” و “قانوونی” دو تێگه‌هێن ژ هه‌ڤ جودا نه. ئه‌م نه ل گۆر قانوونا لێ د قادا له‌گال دا تێدکۆشن. مه کۆمه‌له‌یا خوه یا ئه‌ولی یا ب ناڤێ کۆمه‌له‌یا ته‌ڤگه‌را جوانێن کوردستانێ د ڤی واری دا د تیرمه‌ها ٢٠١٣ێ دا ل دیاربه‌کرێ ڤه‌کر. گرنگیا ڤێ کۆمه‌له‌یێ ئه‌و بوو کو د دیرۆکا کۆمارا ترکیێ دا سازیا یه‌که‌مین بوو کو ب ناڤێ کوردستانێ ب ئاوایه‌کی فه‌رمی هاته دامه‌زراندن. پشتی دیاربه‌کرێ مه ل قه‌زێ ل سێرتێ ل جزیرێ و ل سلۆپی ٤ کۆمه‌له‌یێن دن ڤه‌کرن. ژ به‌ر کو د ناڤێ کۆمه‌له‌یێن مه دا کوردستان هه‌یه ئه‌م ژ ئالیێ وه‌زاره‌تا کارێن ناڤخوه‌یی ڤه هاتن ته‌هدیدکرن کو هه‌موو دامه‌زرێنه‌ران ب جه‌زایا هه‌تا ب هه‌تایی بدارزینن. لێ مه سه‌رێ خوه نه‌ته‌واند و مه به‌ر خوه دا. پشتی دو سالان ناڤێ کوردستانێ ب ئاوایه‌که فه‌رمی هات قه‌بوولکرن. ئه‌ڤ گاڤ بوو میناک و پشتی مه گه‌له‌ک پارتی و کۆمه‌له ب ناڤێ کوردستانێ ب ئاوایه‌کی فه‌رمی هاتن دامه‌زراندن.
ژ خه‌ینی ناڤێ کوردستانێ د بلندکرنا ئالایێ ره‌نگین ل باکوورێ کوردستانێ دا ژی مه هه‌لوه‌سته‌ک بێتەعویز نیشان دا. مه بریار دا کو بێی ئالایێ ره‌نگین ئه‌م چو چالاکیان ناکن. گه‌له‌ک جاران د چالاکیان دا مه ژ بۆ ئالایی شه‌رێ ئه‌نته‌گراسیۆنپارێزان ژی کر لێ ئالا چو جار ژ ده‌ستێن مه نه‌که‌ت. د ده‌ستپێکێ دا ئه‌م ته‌نێ بوون لێ پشتی ده‌مه‌کێ پارتی و رێخستنێن دن ژی د چالاکیێن خوه دا ئالا ره‌نگین ب کار ئانین.
ئه‌م گەهشتبوون ئارمانجا خوه. مه د قادا له‌گال دا رێیه‌ک نوو ژ بۆ تێکۆشینا نه‌ته‌وی ڤه‌کربوو و ئاستا تێکۆشینێ ل باکوورێ کوردستانێ بلند کربوو.
ژ خه‌ینی دو میناکێن ل ژۆر هه‌تا سالا ٢٠١٨ێ مه گه‌له‌ک خه‌باتێن خوه کرن و تێکەلی ب جوانێن پارچه‌یێن دن یێن کوردستانێ را خورت کر. لێ ل باکوورێ کوردستانێ شه‌رێ خه‌نده‌کان ده‌ست پێ کر و رێیا تێکۆشینا له‌گال خەتمی. دڤێ یان ئه‌م ببوونا ئیله‌گال، ئان مه‌تۆده‌ک نوو په‌یدا بکرانا یان ژی مه خه‌باتێن خوه ژ بۆ وێ ده‌مێ ب داوی بکرانا. ئیله‌گالبوون د وان شه‌رتان ده نه‌بوو ته‌رجیحا مه و ئه‌م نه ئاماده‌بوون ژ بۆ وێ ژی. مه مه‌تۆده‌ک نوو ژی په‌یدا نه‌کر. لۆما مه بریارا پاسیفبوونێ دا.
ئیرۆ ل باکوورێ کوردستانێ ره‌وش ژ ٥ سال به‌رێ خه‌راپتره. ئێدی رێخستن و شه‌خس و ئالیێن قاشۆ کورد د بن ناڤێ نه‌ته‌ویبوونێ ئه‌نته‌گراسیۆنێ دفرۆشن مله‌تێ مه. خوه ب کورد و کوردستانیبوونێ ب ناڤ دکن لێ دبن دووڤکێن ئه‌نته‌گراسیۆنپارێزان. خه‌تا نه‌ته‌وی و ئه‌نته‌گراسیۆنێ ته‌ڤلیهه‌ڤ بوویه و وه‌ک هه‌ڤ خویا دکن.
مه ژی د ڤان شه‌رت و مه‌رجان دا ب ئارمانجا زه‌لالکرنا خه‌تا نه‌ته‌وی و ئه‌نته‌گراسیۆنێ ژ هه‌ڤ جودا بکن و زه‌لالکرنا مێژیان بریار دا کو جاره‌که دن چالاک ببن. ئه‌م دێ هه‌ول بدن کو خه‌تا نه‌ته‌وی ژ نه‌زه‌لالیێ پاقژ بکن و د مەژی و دلان دا خورتتر بکن. ب ڤێ ئارمانجێ و ب ڤێ مناسه‌به‌تێ ئه‌م بانگی هه‌موو جوانێن کورد و کوردستانی دکن کو ئه‌م د ڤێ رێیێ دا مل ب مل بمه‌شن.
ته‌ڤگه‌را جوانێن کوردستانێ
٢٠٢٣/١٢/١٢
