دالیا مسلم چ ئاشكەرا كر

ژ ئێكەمین دەستكەفتیێن سەرھلدانێ ل باشوورێ كوردستانێ سالا 1991ێ ل باشوورێ كوردستانێ ھلبژارتن و دامەزراندنا ئێكەمین پەرلەمان و حكومەتا ھەرێما كوردستانێ بوو.  پارتیا كاركەرێن كوردستانێ (پەكەكە) یەكەمین ھێز بوو كو ل دژیی پەرلەمان و حكومەتا ھەرێما كوردستانێ راوەستا و ئەو سازیێن شەرعیێ و فەرمی یێن باشوورێ كوردستانێ ناس نەكرن. پشتی كێمتر ژ سێ ھەیڤان پەكەكێ ل دژی وان دەستكەفتیێن باشوورێ كوردستانێ شەر دەست پێ كر.

پشتی پەكەكێ خوە باش چەكدار و بھێز كری وێ دو گەرێن دن یێن شەری د سالێن 1995 و 1997 دەست پێ كرن و ھەتا سلا ێ 1998 ێ وان شەران بەردەوام كر. ئەو شەر ھەموو ب شكەستنا پەكەكێ  ھاتن وو زیانەكا گەلەك مەزن ب دۆزا كوردی كەت.  ھەتا رۆژا ئرۆژ ژی ئەڤ شەرە ب ئاوایەكی دن یێ بەردەوامە.

د ڤان شەران دا ب سەدان چەكدارێن پەكەكێ ژ تركیا خوە رادەستی پارتیا دەمۆكراتا كوردستانێ (پەدەكە) كر، ب سەدان چەكدار ب دیل كەتنە دەستێ پێشمەرگەی و پرۆسەسا دەستژێبەردان ژ رێزێن پەكەكێ دەست پێ كر و ھەتا نھا ژی بەردەوامە.

ھەر ھێز و ئالیەك ژ بۆنا مەرەم و ئارمانجێن خوە یێن تایبەتی دكارە پەدەكێ ب رادەستكرنا  چەكدارێن پەكەكێ ب تركیێ تاوانبار بكە. لێ بەلێ ب چ ئاوایی چێنابە پەكەكە پەدەكێ ب ڤێ چەندێ تاوانبار بكە، ژ بەر كو پەكەكە ژ ھەموو ئالیان باشتر دزانە و سەربۆرەك درێژ د ڤی واری دا دگەل پەدەكێ ھەیە دزانە كا پەدەكە چەند ب پرەنسیپ و ئەخلاقێ نەتەوەیی پابەندە.

پەكەكە و چەكدارێن وێ یێن د شەران دا ئێخسیر  د بوون باش دزانن كا چەند جاران پێشمەرگەی پێناسێن (كملیك) خوە كرینە د بەریكێن وان دا داكو ژ بەرۆكێن شەری دوور بكن و چ گومانا تركیا نەكەڤە سەر وان؟ چەند جاران پێشمەرگەی چەكدارێن پەكەكێ د ناڤ كۆمێن خوە دا ڤەشارتنە و ھەر زوو كنج و جلێن وان گۆھەرتنە دا كو ژ بەر چاڤێن تركان وندا بكن؟ چەندا جارا چەركدارێن كەچ یێن تەسلیم د بوون یان ئێخسیر دبوون جلێن ژنان  ل وان كرنە ھەتا ژ بەرەیێن شەر دووركرنە و گەھاندینە بارەگایێن پەدەكێ؟

 پەدەكێ نە ب تەنێ ئەو رادەست نەكرن لێ دیتنا وان ژی ژ لایێ تركا ڤە ھێالا سۆر بوو، بریارەكا بنبر و بێ گەنگەشە بوو و د ڤی واریدا پەدەك چ جارا نەكەتە ژێر گەف و گڤاشتنا تركیێ ئەو تركیا پەكەكە بوویە ئەگەرێ ھاتنا وان بۆ ناڤ ئاخا باشوورێ كوردستانێ.

ئیرۆ پیلانا وان ژ ھەر دەمێ زەلالترە، پەكەكە ب سیاسەتا خوە و تێكەلیێن دگەل دەولەتا تركیێ رێ ژ تركیێ را خوەش دكە كو باشوورێ كوردستانێ داگیر بكە. ئەگەر ئەڤ نە سیاسەت و ئارمانجا پەكەكێ و تركیا بە، گەلۆ پەكەك ل باشوورێ كوردستانێ چ دكە؟  پەكەكێ ھێزا خوە یا سەرەكی ل باشوور ب جھ كریە و مەیدانا خوە یا راستەقینە كو باكورێ كوردستانێ یە ڤالا كریە، ژ ھەموو بوھا و پیرۆزیێن نەتەوەیی دوور كەتیە، ژ سلۆگانا كوردستانا مەزن داكەتیە “ئازادیا گەلان،جومھوریا دەمۆكراتیك و ئازادیا ئۆجەلان”. ب كوشتنا دو پۆلیسان پرۆسەسا ئاشتیێ  بەرھاڤێتی كر و شەرێ خەندەكان دەست پێ كر. ژ ئەنجامێ شەرێ خەندەكان باژارێن كوردان ھاتن وێرانكرن و كاڤلكرن و خەلكێ وان كۆچبەر و دەربەدەری كولانێن  باژارێن تركی بوون.

  • ئەرێ د ناڤا ڤان چەند سالان دا ب تەنێ دالیا موسلم كەتیە دەستێ پەدەكێ؟
  • ئەرێ ئەو چەكدارێن ب رۆژا د بن گەفێن چەكان دا باجێ ژ خەلكێ گوندێن باشوورێ كوردستاێ وەردەگرن و ب شەڤ ب جلێن مەدەنی، كراسو پانتەلۆنانێ كابۆیی، ب پەرەیێ باجا گوندیان ل كافەتێری و خوارنەگھێن دھۆكێ دخون و ڤەدخون پەدەكە وان نابینە؟
  • ئەرێ فروكێن تركیێ ل ئاسمانان سەیارەیێن چەكدارێن پەكەكێ ل سەر عەردی دبینە لێ پەدەكە وان ل سەر جادو كۆلانێن خوە نابینە؟
  • ئەرێ دەما فروكن تركی بۆمبەبارانا بارەگا و كۆمێن چەكدارێن پەكەكێ دكە بریندارێن وان ل كیڤە تێن دەرمان كرن؟
  • ئەرێ د 30 سالێن دژمناتیا پەكەكێ ژئ بۆ باشوورێ كوردستانێ ب تایبەتی دژمناتیكرنا پەدەكێ، چ چەكدار، بەرپرس و سیاسەتمەدارەك  مەزنتر و گرنگتر ژ دالیایێ نەكەتیە دەستێ پەدەكێ؟

مرۆڤ ھەموو ھەست و سۆزە د چ رێخستن و سیستەمێ لەشكەری دابە ژی ژ ھەست و سۆزا ناھێتە خلاس كرن. راستە پەكەكێ دسپلینەك توند و خورت ھەیە،ژ بۆ كۆنترۆلكرنا تێكەلیێن ئەڤینیێ د ناڤبەرا چەكدارێن كور و كەچ دا و ھەتا رادەیەكێ تێدا سەركەفتی ژی بوویە، لێ حالەت دێ ھەر ھەبن و گەلەك حالەت چێبوونە و دێ بەردەوام چێ بن ژی، ئەگەر دالیا موسلم و ھەڤالێ خوە یەك ژ وان حالەتان بە چ گونەھا پەدەكێ یە؟

 سپاس ژ بۆ دالیایێ گەلەك تشت ئاشكەرا كرن.

گ. مەتین

     2020.07.24

نێرین / شیرۆڤە