د دەست دا ئەنجام سفرە

رۆژاڤایێ کوردستانێ به‌ر ب رەوش و پێڤاژۆیه‌ک نوو ڤه‌ دچە، هه‌تا ب ئاوایه‌ک دن مرۆڤ دکارە بێژە به‌ر ب هه‌بوون و نه‌بوونێ ڤه‌ دچه‌. ڤێ رەوشا ل رۆژاڤایێ کوردستانێ هەیە گەلەک کەس ب حسی و عاتفی دنرخینن، ده‌ما بوویه‌ره‌ک چێدبه‌ نابه‌ کو مرۆڤ ب ته‌نێ ڕوویه‌ک یان ژی ئالیەکێ وێ بوویەر و پرسێ شرۆڤە بکه‌. نرخاندن و هه‌لوه‌ستێن حسسی و عاتفی گه‌له‌ک جارا دبه‌ سه‌ده‌مه‌ک کو ڕاستیا ل سه‌ر عه‌ردێ هەیە ل به‌رچاڤان وندا دبه‌.

باکورێ سوریێ یان ژی خوه‌سه‌ریا باکورێ سوریێ نه‌ گه‌له‌ک خه‌ما کوردانه‌ و نه‌ پرسگرێکه‌کا کوردستانیه‌. ئه‌گه‌ر ئه‌ڤ ڕاستی نه‌یێ دتین گه‌له‌ک تشت به‌ر چاڤان وندا دبن و ڕاستی نایێ دیتن. پرسگرێکا کوردا ڕۆژاڤایێ کوردستانێ یه‌. مله‌تێ کورد ل ڕۆژاڤایێ کوردستانێ یه‌، نە باکورێ سوریێ یە.

پشتی لهه‌ڤهاتنا ئەمریکا و ترکیێ و هه‌روه‌ها ڕوسیا و ترکیێ، سیاسه‌تا نه‌ کوردستانی یا پارتیا کارکەرێن کوردستانی (پەکەکێ) ل ڕۆژاڤایێ کوردستانێ ڕێڤه‌ دبر ئیفلاس کر. پێدڤیە ئه‌ڤ بێ دیتن. لێ پەکەکە پرۆپاگانده‌یێن ڕۆژانه‌ ژ ستراته‌ژییێن ده‌م درێژ گرینگتر دبینه‌ ، ڤێ یه‌کێ دکە دا کو کورد ڕاستیا هه‌یە نه‌بینه‌.

ژ به‌ری هه‌ر تشته‌کی هێزێن سوریا دەمۆکراتیک (هەسەدە) نه‌ هێزه‌ک کوردستانیه‌، هێزه‌کا سوریه‌. یەکینەیێن پاراستنا گەل (یەپەگە) هێزه‌ک یا پەکەکێ یه‌. ئه‌گه‌ر، ل گۆر لەهەڤهاتن و رێکەفتنێن هەنە، یەپەگە ۳۲ کیلۆمه‌ترا ژ سنۆرێ ترکیێ (کوردستانا باکور) دوور بکەڤه‌ ل ڕۆژاڤایێ کوردستانێ جهێ وان نامینه‌. ژ به‌ر کو ژ سنۆر کووراهیا ۳۲ کلۆمه‌تران گه‌له‌ک جهان دا ئاخا ڕۆژاڤایێ کوردستانێ نامینه‌.

چاڤدێریا ڕوسیا و ترکیێ ل سه‌ر سنۆر ۱۰ کلۆمه‌تران پرانیا جهێن کو کورد لێ نشته‌جینه‌ تێخه‌ د بن کۆنترۆلێ دا. گه‌لۆ، عامودێ، دربێسیێ، دێرکێ چه‌ند کلۆمه‌تران ژ سنۆر دوورن؟ دڤێ ئه‌ڤ بێ دیتن.

تشتا کو نها ئاشکرایە، یەپەگە دبە دو بەش، به‌شه‌ک مه‌زن تەڤلی هێزێن ڕژێما سوریێ دبە. ژ ئالیه‌ک دن ڤه‌ به‌شه‌ک ژ یەپەگێ ل سه‌ر ئاخا سوریێ د گه‌ل ئەمریکا بیرێن په‌ترۆلێ بپارێزن. یانی ب ئاوایه‌ک دن دبن هێزێک ئەمریکی ل هه‌رێمێ. دێ یەپەگە ڤێ بالانسێ چەوا راگرە هەتا نوها نەدیارە.

د ڤێ پێڤاژۆیێ دا ده‌ستورا نوو یا سوریێ تێ گۆتوبێژ کرن. ٥۰ ئه‌ندامێن کۆمته‌یا ده‌ستوورا نوو یا سوریێ هه‌نه‌. ژ ڤان ب تەنێ یه‌ک کورد ب ناڤێ ئه‌نەکەسێ د ناڤ وێ کەمیتەیێ دا هەیە. نها هێڤیا هه‌ری مه‌زن یا ڕۆژاڤایێ کوردستانێ ئه‌وه‌ کو کا گه‌لۆ هه‌تا چ ڕاده‌یێ بکاربن مافێن کوردا بێخن ده‌ستوورا سوریێ دا. ئیرۆ ژ ڤێ پێڤه‌ چ ده‌ستکه‌فتیه‌ک دیار ناکە.

ئه‌گه‌ر پرسه‌ک بێ کرن و بێژن گه‌لۆ به‌ده‌لێ خوینا ۱۲ هه‌زار شه‌رڤانێن کورد چییه‌؟ نه‌ پەکەکە و نه‌ژی که‌سه‌ک، هه‌تا ئه‌وێن کو ئیرۆ د خوه‌پێشاندانێن د بن ئالا پەکەکێ دا دقێرن ژی نکارن به‌رسڤا ڤێ پرسێ بدن.

ئیرۆ ڕه‌وش ئه‌ڤه‌ ، لێ سبه‌هی چ دبه‌ نایێ زانین. ژ به‌ر کو ئاکتۆرێن سیاسی هه‌ر گاڤێ دکارن بێنه‌ گوهه‌رتن. لێ ئه‌گه‌ر کورد ل سه‌ر لنگێ خوه‌ نه‌سه‌کنن و سیاسه‌ته‌ک نەتەوەیی و کوردستانی ڕێڤه‌ نه‌بن ، ئه‌نجام هه‌ر د ده‌ست ده‌ سفره‌.

نووچە/ئەنالیز

نێرین / شیرۆڤە