راستییا شەرێ پەرلەمەنتۆیا ترکیێ
ل رۆژا ٢٠٢٤/٨/١٦ پەرلەمەنتۆیا ترکیێ جڤیا و پرسا پەلەمەنتەرێ د گرتیگەهێ دا، جان ئاتالای گۆتوبێژ کر. شەر د ناڤبەرا ئەندامێن پەرلەمەنتۆیێ دا چێ بوو و مست و بوکسان ل هەڤ دا، هندەک کەسان دایە دیار کرن کو ئەندامێن سەر ب ئاک پارتییێ ڤە شەرێ پەرلەمەنتۆیێن کورد یێن سەر ب دەم پارتییێ ڤە کریە. لێ شەرێ ل پەلەمەنتۆیا ترکیێ چو پەیوەندی ب پەرلەمەنتۆیێن دەم پارتییێ ڤە نە بوو، ئەو شەرێ ئەندامێن ئاک پارتییێ و ئەندامێن پارتییا کارکه‌رێن ترکیێ بوو.
شەر ب ڤی ئاوایی بوو:
پەرله‌مه‌نتۆیا ترکیێ ژ بۆ گۆتوبێژکرنا پرسا پەلەمەنتەرێ زیندانکری، جان ئاتالای، جڤیا. جان ئاتالای ل سەر دۆزا پارک ئا گه‌زی هاتیە گرتن و د گرتیگه‌هێ دا یه. جان ئاتالای د گرتیگه‌هێ دا ژ ئالیێ پارتییا کارکه‌رێن ترکیێ وه‌ک پەرله‌مه‌نته‌ر هاته هلبژارتن. لێ ژ ئالیێ پەرله‌مه‌نتۆیا ترکیێ ڤە پەرله‌مه‌نته‌ریا وی نه‌هات په‌ژراندن و ئه‌و د گرتیگه‌هێ دا ما.
ل رۆژا ٢٠٢٤/٨/١٦ پەرله‌مه‌نتۆیا ترکیێ ژ بۆ گۆتوبێژکرنا ڕه‌وشا جان ئاتالای جڤیا.
د جڤینێ دا پەرله‌مه‌نته‌رێ پارتیا کارکه‌رێن ترکیێ، ئەحمه شک ئاخڤتنه‌ک کر و د ئاخاڤتنا خوه دا گۆت: “ل ڤر نه حه‌وجه یه کو ئه‌م به‌حسا رێکاران بکن. ل وه‌لاته‌کی کو بێحقوقی بوویه که‌ڤنه‌شۆپی، ئه‌ز قانوونێ ژ وه را ڕاڤه ناکم. گۆتنێن کو ئه‌م هه‌ری زێده ژ وه دبهیسن، یێن کو هوون خه‌لکه‌کی پێ دخاپینن، ب چەقوکێشیا وه‌یا دینی، ب نه‌ته‌وه‌په‌ره‌ستیا وه یا سه‌خته و یێن کو دزیا وه ئاسایی دبینن، فه‌ساد و بێحقوقیا وه را وه‌ک وه‌لاتیێن مه‌قبوول ده‌رناخن دخاپینن. هه‌ری گۆتنێن کو ئه‌م ژ وه دبهیسن، “خائین” و “فه‌تۆچی” ”قاتل” و ”ته‌رۆرسته”. هوون ژ جان ئاتالای را دبێژن ته‌رۆریست دڤێ هه‌ر که‌س زانبه کو رێخستنا ته‌رۆرێ یا هه‌ری مه‌زن یا ڤی وه‌لاتی ئه‌و که‌سێن کو د ڤێ ڕێزێ دا ب مافیایا خانه‌دانیێ را ده‌وله‌ت هلوه‌شاندنه و ته‌رۆریستێن هه‌ری مه‌زن ل ڤرن.”
پەرله‌مه‌نته‌رێن ئاک پارتیێ ده‌ستێن خوه ل ماسه‌یان دان و شک شه‌رمه‌زار کرن و ئاخڤتنا وی بڕی. لێ شک ئاخاڤتنا خوه به‌رده‌وام کر و گۆت: فه‌یده‌یا وه هه‌موویان وه‌ک یا جان ئاتالای ناگەهه ڤی وه‌لاتی. ده‌ما شک ئاخاڤتنا خوه به‌رده‌وام کر، پەرله‌مه‌نته‌رێ ئاکەپێ ئالپای ئۆزالان هه‌تا جهێ مایکرۆفۆنێ مه‌شیا و ب مست و کولمان ل شک خست. پشتی ڤێ ئێریشا ئۆزالان شه‌ر ده‌رکه‌ت.
