سەرۆك بارزانی بریارەك دیرۆكی دا

ل سه‌ر فه‌رمانا سه‌رۆک بارزانی و د چارچۆڤه‌یا یه‌کخستنا هێزێن پێشمه‌رگه‌ دا، یه‌کینه‌یا 80 یا پێشمه‌رگه‌ یێن سەر ب پارتیا ده‌مۆکرات یا کوردستانێ (پەدەکە) ڤە تێكەلی ھێزێن پێشمەرگە یێن سەر ب وه‌زاره‌تا پێشمه‌رگه‌ دبن و ب ئاوایه‌کی کرداری ژی چه‌ند گاڤ ب وێ ئاراسته‌یێ ڤه‌ هاتنه‌ ئاڤێتن.

سه‌رۆکێ کۆمیته‌یا پێشمه‌رگه‌ د پەرلەمه‌نتۆیا کوردستانێ دا، ڕیڤینگ هرۆری کو ژ فراکسیۆنا پەدەکێ یه‌، ل سەر ڤێ مژارێ دبێژە: “سه‌رۆک بارزانی یه‌کینه‌یا 80 ڕاسپاردیه‌ کو ئاماده‌کاریان بکه‌ و خوه‌ ب ڕێکخستن بکه‌، تا کو د بن فه‌رمانا وه‌زاره‌تا پێشمه‌رگه‌ دا کار بکه‌ و هه‌موو فه‌رمانێن ل سه‌ر یه‌کینه‌یێن دن ئێن وه‌زاره‌تا پێشمه‌رگه‌ تێن جبجیکرن، ل سه‌ر یه‌کینه‌یا 80 ژی جبجی ببن.”

هه‌روها ڕیڤینگ هرۆری گۆت: “ئه‌م ب هێڤی نه‌ کو یه‌کینه‌یا ۷۰ یا هێزێن پێشمه‌رگه‌ ژی هه‌مان گاڤان باڤێژه‌، تا کو هه‌موو هێزێن پێشمه‌رگه‌ د بن سیبه‌ره‌کێ ده‌ کۆم ببن و ببن هێزه‌که‌ یه‌کگرتی و فه‌رمانان ژ وه‌زاره‌تا پێشمه‌رگه‌ وه‌ربگرن.

یه‌کینه‌یا 80 یا پێشمه‌رگه‌ سه‌ر ب پەدەکێ ڤه‌ یه‌ و یه‌کینه‌یا 70 ژی سه‌ر ب یه‌کتیا نشتمانی یا کوردستانێ (یەنەکە) ڤە یە و هه‌ژمارا پێشمەرگە یێن وان ھەر دو یەكینەیان د سه‌ر 100 هه‌زار پێشمه‌رگه‌یی ڕا یه‌.

نها كار ل سەر وێ یه‌کێ دھێتە کرن کو ئه‌و هه‌ر دو یه‌کینه‌ د بن فه‌رمانا وه‌زاره‌تا پێشمه‌رگه‌ یا هه‌رێما کوردستانێ دا کار بکن و ھەموو فەرمانێن خوە ژ وەزارەتا پێشمەرگە وەربگرن. ب فەرمانا سەرۆك مەسعود بارزانی د ناڤا ڤان چەند رۆژێن نێزیك دا دێ یەكینەیا 80 تەڤلێ ھێزێن سەر ب وەزارەتا پێشمەرگە ڤە ببن. هه‌ڤپه‌یمانیا ناڤده‌وله‌تی یا ل دژی داعشێ ژی د ناڤ ھەولدانان دایە كو ئەڤ پرۆسەس سەربكەڤە.

نها ئه‌و مایه‌ كو یەنەکە ژی بریارا خوە بدە و یه‌کینه‌یا 70 یا هێزێن پێشمه‌رگه‌ بێخە د بن فه‌رمانا وه‌زاره‌تا پێشمه‌رگه‌ دا و ب تەنێ فەرمانێن خوە ژ وێ وەزارەتێ وەربگرە.

لێ ھەتا نھا یەنەكێ دڤێ پرۆسەسێ دا ب كریاری چو گاڤ نەھاڤێتنە،

وه‌زاره‌تا پێشمه‌رگه‌ د چارچۆڤه‌یا یاسایا چاکسازیێ دا، ل گۆر خالا 39 ێ چاکسازیێ د وه‌زاره‌ت و یه‌کینه‌یێن 80 و 70 دا دکه‌.

نێرین / شیرۆڤە