چێنابە یەك ژ گرۆپا خیانەتێ ببە والیێ كەركووكێ

که‌مال که‌رکووکی به‌رپرسێ سه‌رکردایه‌تیا پارتیا ده‌مۆکراتا کوردستانێ ل که‌رکووک و گه‌رمیانێ، دداخویانیه‌کێ ده‌ ژ بۆ باسنیوس، به‌رسڤا ئاسۆ مامه‌ند به‌رپرسێ مه‌لبه‌ندێ که‌رکووکێ یێ یه‌کێتیا نشتمانیا کوردستانێ (ینک) دده‌ و دبێژه‌: دلسۆزێن که‌رکووک و ته‌ڤه‌یا کوردستانێ باش دزانن کی بوون یێن خه‌لکێ که‌رکووک و خۆرماتوو خستیه‌ د ناڤا ڤێ ڕه‌وشا دژوار ده‌ كو ئەو ب گرووپا خیانه‌تا ۱۶ێ ئۆکتۆبه‌رێ تێن ئانسکرن.

ئاسۆ مامه‌ند گۆت بوو کو ئه‌ڤە ساله‌که‌ پدک ناخوازه‌ والیه‌ک ژ که‌رکووکێ ڕه‌ بێ دانان و پدک دخوازه‌ والیێ نوو شۆڤه‌نه‌کێ عه‌ره‌ب به‌ نه‌کو یه‌کێ سه‌ر ب ینکێ ڤه‌ به‌.

که‌مال که‌رکووکی به‌رسڤا ئاسۆ مامه‌ند دده‌ و دبێژە:

– والیێ که‌رکووکێ نه‌جمه‌دین که‌ریمه‌ کو ئه‌و ژ ئالیێ جڤاتا ویلایەتا که‌رکووکێ ڤه‌ هاتیه‌ هلبژارتن و ئه‌و ب خوه‌ ژی ئه‌ندامێ پۆلیتبوورۆیا ینکێ یه‌. چما ئه‌و ل سه‌ر پۆستا خوه‌ نه‌مایە؟ جڤاتا ویلایه‌تێ و سه‌رۆکێ وێ جڤاتێ ڕێبوار تاله‌بانی چما ل نه‌ ل جھێ خوه‌ نه‌؟ گه‌لۆ ئه‌و و هه‌موو ئه‌و دلسۆزێن داخوازا نۆرمالیزه‌کرانا ڕه‌وشا که‌رکووکێ دکن نەهه‌قن؟ یان ژی یێن کو که‌رکووک فرۆت و خیانه‌ت کر ڕاست دکن؟

که‌رکووکی د به‌ردوامیا ئاخافتنا خوه‌ دبێژە:

– ئه‌ڤ گۆتنێن ئاسۆ مامه‌ند هه‌ولدانه‌که‌ ژبۆ شێلووکرنا راستیان، ته‌عبیرێ ژ هناڤێن خوه‌ ناکه‌، وه‌که‌ کو د ۱۶ ئۆکتۆبه‌را سالا بۆری ده‌ تێکه‌لی وێ خیانه‌تا مه‌زن بوون و دژی گه‌ل و ئاخا کوردستانێ راوه‌ستان، نها ژی دخوازن ده‌ستێ خوه‌ یێن ب قرێژ ب ملێ پدک پاقژ بکن. نه‌خێر، پدک چ شۆڤه‌ن و چ خیانه‌تکاران قه‌بوول ناکه‌، ب تایبه‌تی خیانه‌تکارێن ۱۶ێ ئۆکتۆبه‌رێ کو گرپووه‌که‌ د ناڤ ینکێ دا باش تێن ناس کرن…. ژ بلی نه‌جمه‌دین که‌ریم چێنابه‌ والیه‌کێ دن یێ ینکێ هه‌به‌، چ گارانتی هه‌یه‌ کو ۱۶ ئۆکتۆبه‌ره‌که‌ دن دوبارە نەکه‌؟ ئه‌م وه‌که‌ پدک تو شۆڤه‌نان و تو خیانه‌تکاران، ب خیانه‌تکارێن ۱۶ئێ ئۆکتۆبه‌رێ ژی ڤه‌، قه‌بوول ناکن.

که‌مال که‌رکووکی هه‌لوه‌ستا پدک ل سه‌ر ڕه‌وشا که‌رکووکێ زه‌لال دکه‌ و دبێژه‌:

– ئاسۆ مامه‌ند لێدخه‌بته‌ ۱۶ێ ئۆکتۆبه‌رێ ژ بیرا خه‌لکی ببه‌. هه‌لوه‌ستا پدکێ دڤێ یه‌که‌م جار ڕه‌وشا که‌رکووکێ وه‌ره‌ نۆرمال کرن، نها که‌رکووک سه‌ربزگه‌هه‌ک مه‌زنه‌. ئه‌م دخوازن ڕه‌وش وه‌ره‌ چاک کرن، جڤاتا ویلایه‌تێ ڤه‌گه‌ره‌ جھێ خوه‌ یێ ته‌بیعی و ئه‌و بخوه‌ بریارا خوه‌ بده‌. که‌سه‌ک ببه‌ والی ده‌ستی وی/وێ د خیانه‌تا ۱۶ ئۆکتۆبه‌رێدا نه‌به‌، کسه‌که‌ به‌، ژ به‌ر ڕه‌وشا نازک یا که‌رکووکێ، هه‌موو ئالی ل سه‌ر ل هه‌ڤ بکن، باشتره‌ که‌سه‌ک بێته‌ره‌ف، دلسۆز به‌ و هه‌موو ئالی ل سه‌ر ل هه‌ڤ بکن و، ھەلبەت، ئه‌ڤ هه‌موو گاڤ پشتی نۆرمالکرنا ڕه‌وشا که‌رکووکێ بێن ئاڤێتن.

نێرین / شیرۆڤە