مەسروور بارزانی دەرگەهێ پرسیار و گۆمانان ڤەکر

سەرۆکوەزیرێ بەرێ كو نوکە سەرۆکێ هەرێما كوردستانێ یە، رێزدار نێچیرڤان بارزانی، د گۆتارەکا خوە دا گۆتبوو: ” ل هەرێمێ گەندەلی یا بوویە کولتۆر”، لێ ئەگەرێن بەڵاڤەبوونا گەندلیێ و هەتا گەهەشتیە ڕادێ بکولتۆربوونێ دیار نەکرن. ئەگەر هینگێ دەست ب چارەسەریێ هاتبایە کرن، نە دبوو کولتۆر و نە رەوشا ئابووری و مایەپووچبوونا (ئیفلاس) هەرێمێ دگەهشتە ڤی رەوشا نھا تێدا !

بۆ چارا ئێکێیە بەرپرسەکێ کورد ب وێرەکانە بهێتە پێشبەری خەلکێ هەرێما کوردستانێ و بێژە: “ئەز یێ هاتیمە سەر کاسکا زەر و سەرەڕای ئیفلاسا حوکمەتێ بۆ ڤێ کابینێ ٢٧ ملیار قەرز هێلانە”

ئەڤ وێرەکیا سەرۆكوەزیر بەرێز مەسروور بارزانی ب دیدا من دەستپێکا بخوەداچوونێیە و ئەزموونا شۆرەشێ و حوکمڕانیا کوردی ب چاڤەکێ نوو و رەخنەگرانە بهێتە شرۆڤەکرن، چونکو نەیا بەرئاقلە شاشی هەر دووبارە ببن و یێن هەرێم گەهاندی ڤێ ئاستێ مەترسیدار لێ نەهێتە پرسین و رەنج و کەدا ڤی مللەتێ خوە ل بەر هەوێن جینۆساید و داعش و سیاسەتا برسیکرنا دەولەتا داگیرکەرا عێراقێ گرتی، هەما هۆسا ب ساناهی لێ دەرباز ببن و یا ژ هەموویێ نەخوەشتر ژی ب سەروەری و پەهلەوانی بۆ بهێتە هەژمارتن!

رێزدار مەسروور بارزانی ب ڤێ پێنگاڤا خوە دلێ هەموو کوردپەروەران خۆشکر و دەرگەهەکێ تژی پرسیار بۆ خەلکێ هەرێما کوردستانێ ڤەکر، ئەو دەرگەهێ هەتا نوکە ب قفلێن پاساوانان هاتیە گرتن و هەردەما خەمخۆرەکێ ڤی وەلاتی گازندەك كربایە ژی دا هەوەکا ب خائینکرن و دەستەێن دەرەک ل پشتە، هێتە تاوانبار کرن.

پەیما سەرۆکوەزیرێ کوردستانێ ژ ڤالەهیێ نەهاتیە، بەلکو وەک مرۆڤەک كو هەست ب بەرپرسیاریا دیرۆکێ دکە و دزانە ” ئاڤ د سەر چ ڕا دچە” لەوا بێمننەتانە دەستێ خوە درێژ کرە سەر ڤێ تاڵانکریا هەتا نوکە دهاتە کرن. ب ڤێ پەیامێ شلقەکا بهێز ب تەڤایا خەلکێ هەرێما کوردستانێ و لایەنێن سیاسی کەت، ئەڤ پەیامە ژ بۆ گەلەک لایەنا وەک شۆکەکێ بوو چونکو وەسا هزردکرن ب ڤی دەستوداری دێ بۆ چیتە سەری، لێ ژبیر کرن کو هەر دەما “گۆزک تژی بوو، دێ ژێ رژیت” ، لەوما دبینین ژ ڤەرێژا وێ پەیما دیرۆکی هەوەکا دژ دەستپێکریە و ئەڤەژی ئاساییە، لێ یا ژ هەموویێ حنێرتر سەرۆکا پەرلامانا کوردستانێ دکتۆرە رێواس فائیق بوو دەما گۆتی: “حکومەتی هەرێمی کوردستان ٢٧ ملیار دۆلار قەرزار نیە”، ل شوونا دویڤچوون بۆ پەیما سەرۆکوەزیرێ کوردستانێ کربایە، چونکو کارێ پەرلەمانی دویڤچوون و چاڤدێریکرنا دەستهەڵاتێیە، نەک پاساو ڤەدیتن!

ژ بۆ هەر کەسی دیارە کو گەندەلی ل کوردستانێ گەهەشتیە ئاستەکێ هەری مەترسیدار و سامانێن کوردستانێ یێن سەر عەرد و بن عەرد یێن دهێنە فەرهود کرن و ئەڤە نە تشتەکێ نهێنیە بەلکو “حەیە عەلا سەڵات” دهێتە کرن، ئەڤجا دەستهەڵاتەک هۆسا بە چەوا قەرزا ژی ناکە، ما قەرزکرن ژ فەرهود کرنێ خرابترە، دکتۆرە گیان!

وەک ل سەری من ئاماژە پێکری کو پەیاما سەرۆکوەزیرێ کوردستانێ رێزدار مەسروور بارزانی دەرگەهێ پرسیار و گۆمانێن خەلکێ کوردستانێ ڤەکر، ژبلی هلکرنا گلۆپا کەسک بۆ دۆزگەرێ گشتی بۆ پرسا ٦ ملیار یۆرۆیێن ژ کوردستانێ دەرکەفتین، د ڤێ قەیرانا ئیداری و ئابووری دا کو ئەگەر ڕاست بە ب ڕاستی کارەساتە چەنکو ٦ ملیار یۆرۆ دکارن، ئەگەر باش بهێن مەزاختن دێ بنە سەدەمێ گەشەسەندنا بنخانا پیشەسازیەکا بهێز ل کوردستانێ!

محەمەد چەلکی
2020-05-26

نێرین / شیرۆڤە