نان و ئاڤێن میراتگرێن شیعەیان د ئۆکەیا ھەڤلێرێ دا

نڤیسینا: ھۆگر نێروەیی 

د ئیراقا نوو یا شیعەگەری دا، ھەردەم بەرییا پێکئینانا کابینەیا نوو تەڤ بەرپرسێن ئیراقێ، چ شیعە بن چ سونە بن، سەرەدانا ھەڤلێرا پایتەخت دکەن بۆ وەرگرتنا ئۆکەیا بەرپرسێن ھەڤلێرێ 

دەما لاواز د بن یان د گوپیتکا ھێزا خوەدا بن ھەر پێتڤیا وان ب ئۆکەیا ھەڤلێرێ ھەیە، چونکە ئیراقا نوو وەھا دخوازیت بێ ھەڤلێر چ کابینە دروست نابن. 

لێ ئەڤ جارە شیعە بوویە دو بەرە و دو جەمسەرگیر، ئۆکەیا ھەڤلێرێ ژ نان و ئاڤان بۆ وان گرنگتر و پێتڤی ترە، ھەرکەسێ ئۆکەیا ھەڤلێرێ ب دەست بینیت دێ بیتە حاکمێ ئیراقێ، لەوما ئۆکەیا ھەڤلێر ب دراڤەکێ زۆر ل سەر دانایە، مەبەست ژ دراڤی دراڤێ کاغەز نینە بەڵکو مەبەست ژ دراڤی مەرجێن کوردانە بۆ ئەو کەسێ کابینەیا نوو یا ئیراقێ پێک دئینیت. کیژان بەرە و جەمسەر زێدەتر مەرجێن کوردان جێبەجێ بکەت ئۆکەیا ھەڤلێرێ دێ ب دەستڤەئینیت. 

ھەردەم ئۆکەیا ھەڤلێرێ بەریا پێکئینانا کابینەیا نوو یا ئیراقێ بازارێ وێ گەرم و گۆر بوویە، بەرپرسێن ئیراقێ ھەر ئێک ژ ئالیێ خوەڤە مشتەریە و دراڤێ زۆر پێ ددەن سۆزان ددەن ب تەڤ   مەرجێن کوردان ڕازی دبن، لێ ھەردەما کابینە پێکئینا و جھێن خوە گرتن بێ منەت دبن و پشتا خوە دکەنە ھەڤلێرێ، شیعەیێن دەسھەلاتدار ئێکەم کارتا دەستێن خوە ببەنێ دژایەتیکرنا مافێن گەلێ کوردستانێ یە، نەبتنێ ڕێکەفتنا وەک خوە جێبەجێ ناکەن بەڵکی شەڕعیەتێ ژی پێ نادەن  خوە وەسا دیار دکەن کو حاشایێ بکەن ل سەر وان مەرج و مافێن گەلێ کوردستانێ رێکەفتبن. ئەڤەژی ڤەدگەریتەڤە کو کوردان بەریا پێکئینانا ھەر کابینەیەکێ نوو یا ئیراقێ کارتێن بھێز ھەنە لێ دروستکەرێن بڕیارێ  کو کارت د دەستی دانە لەزێ ژ وان کارتان دکەن ستراتیژی نینن تەڤ کارتان بکاردئینن بێ بەرچاڤگرتنا دورووتیا شیعەیان کو داویێ ھەلوێیستی خوە ب تمامی ھەڤدژ دکەن، ئەڤە ژبلی پارتیێن کوردستانی بەرییا پێکئینانا کابینەیا نوو  ل سەر ئێکگرتنا ناڤمالا کوردی تەکەزێ دکەن، لێ ھەردەما کابینە پێک ھات دبنە چەند بەرە و ناڤمالا کوردی تێکددەن ل گورەی بەرژەوەندیێن خوە یێن شەخسی و تەسکێن حیزبی بڕیاران ددەن.

لایەنێ ھەمبەر ژی کو شیعە یێن دەسھەلاتدارن مفای ژ پەرتەوازیا ناڤمالا کوردی وەردگرن، شوورێ وان دو سەرە، ل دەسپێکێ نەرم و نیانن گوتنێن خوەش دکەن کوردان مینا ئامرازەکێ بکاردئینن بۆ گەھشتنا ئارمانجا خوە، ھەردەما گەھشتنە ئارمانجا خوە سیاسەت و ھەڵویستێ خوە ل نەرمیێ دگۆھڕن بۆ ڕەقیێ و ھەڤدژیا مافێن کوردان دکەن، کوردان ژی چ کارت  دەستی دا نامینن چونکە ب لوژیکی ئەو ڕۆژ ل بەرچاڤان نەبوینە کو تێدا شیعە دورووتیا خوە خۆیابکەن، دەرئەنجامدا کوردان چ  ئەلتارناتیڤ د دەستان دا نامینن کۆ بکاربینن بۆ وان ھەڵویست و دورووتیا شیعەیان سفر ب دەست بن ب چەند گاڤا پاشڤە دچن.

ھەردەم پرسگرێکا جەوھەری یا کوردان ئەو بویە بەرییا پێکئینانا کابینا نوو بھێزە و چەندین کارت د دەستی دا ھەنە بکاربینیت لێ پشتی پێکئینانا کابینا حکومەتێ  رۆژ ل دیڤ ڕۆژێ لاواز دبیت ھەیا دگەھیتە داوییا کابینێ  ب تمامی ل دەرڤەی ھاوکێشەیا دەسھەلاتێ و دروستکرنا بریارێ ل سیاسەتا ئیراقێ دبیت.

   پسیارا جەوھەری، ئەرێ کوردان چ ئەڵتارناتیڤ نینن یان ھەیا نھا دورووتیا شیعەیان نەنیاسیە، یان کورد د سیاسەتێ دا  لاوازن نکاریت خوە ل گەل پشھاتێن نوو و  رەوشا دروستکری یا ئیراقێ بگونجینیت یان نکاریت ھەمبەری تەحەددیێن ئیراقێ ب ڕاوستیت.

ئەگەر دروستکەرێن حکومەتا نوو یا ئیراقێ ھەمان میراتگرێن عەقلەیەتا بەرییا خوە بن، من گۆمان نینە دێ ھەمان حکومەت بیت  ھەمان عەقلیەت و ئایدۆلۆژیا و ڕق و کین دێ ھەمبەری کوردان ھەبیت و ل ھەمبەری مافێن کوردان ب توندتر دێ ڕق  و کینا خوە دەرکەن، ئەرێ وی دەمی کوردان دێ چ کارت دەستان دا بیت و گاڤێن لەز ھاڤێژیت بۆ وان تەحەدی و ئاستەنگێن دروست دکەن ژ ئالیێ شیعەیێن دەسھەلات دار ڤە. 

دەرفەتەکا زێرین و پڕ بھا بۆ کوردان دروست بوویە، د ماوێ چەند ساڵێن بوری دا کورد ب ڤی قاسی بھێز نەبوینە، دروستکەرێن بریارێ دکارن ڤێ دەرفەتێ ب لوژیکی و ستراتیژیانە  بکاربینن کو چاوان بەرییا پێکئینانا کابینەیا نوو ل سەر رێکەفت بوون ب تێوری پشتی پێکئینانا کابینەیێ ڕێکەفتنێ وەک خوە پراکتیزە بکەن کو تەڤ مافێن گەلێ کوردستانێ تێدا زامن ببن، ئەگەر ئەڤ جارە مافێن کوردان بن پێ کرن و رێکەفتن وەکی خوە نەچوو  د بوارێ جێبەجێ کرنێدا وی دەمی کورد تاوانبارە و نە شیعەیێن دەسھەلات دار، چونکە خویا دبیت ب درێژاییا 18 ساڵێن بوری کوردان ئەزمون ژ سیاسەتا تەحلا دورووتیا شیعەیان وەرنەگرتیە  و نەشیایە سیاسەتا خوە ل گۆڕەی دورووتیا شیعەیان بگۆھڕیت.

نێرین / شیرۆڤە