"پێویستە تەحەمولا سوێدێ بەرامبەر تركیێ ب داوی بە"

پشتی کو چه‌ند پارله‌مه‌نته‌رێن پارلەمەنتۆیا سوێدێ یێن ئەسل ‌ کورد یێن سه‌ر ب پارتیا کارکه‌رێن سۆسیالده‌مۆکراتا سوێدی ڤە، پرۆژه‌ بریاره‌ک پێشکێشی پارله‌مه‌نا سوێدێ کری کو سوێد مافێن كوردان ب پەژرینە و پشته‌ڤانیا دۆزا کوردی بكە، مه‌دیایا ترکیێ ده‌ست ب هه‌لمه‌ته‌کا به‌رفره‌ھ ل دژی سوێدێ کرن. مه‌دیایا سوێدی ژی به‌رسڤا ترکیێ ددن و داخواز ژ حکومه‌تا وه‌لاتێ خوه‌ دکن کو بالیۆزێ ئه‌نقه‌ره‌ ل ستۆکهۆلم ژ سوێدێ بێ ده‌رخستن.

ڕۆژنامه‌یا “ئافتۆنبلاده‌ت” یا سوێدی د ڤی ده‌رباری دا ‌ڕاپۆره‌کا گرنگ به‌لاڤکریه‌ و ۱۷ ڕۆژنامه‌ و سازیێن مه‌دیایی یێن ترکیێ‌ خستنه‌ ناڤا لیسته‌یه‌کێ کو ژ بەر وێ پرۆژه‌پێشنیارا‌ چار پارله‌مه‌نته‌رێن سوێدێ، ل دژی وان پارله‌مه‌نته‌ران، پارله‌مه‌ن و حکومه‌تا سوێد ده‌ست ب هه‌لمه‌ته‌کا راگەھاندنێ كرنە و وان پارله‌مه‌نته‌ران ب “پشته‌ڤانێن ته‌رۆرێ، خیانه‌تکرن ل سوێدێ” تۆمه‌تبار دکن.

ڕۆژنامه‌یێ نڤیسیه‌ كو، ئه‌و مه‌دیا و سازیێن ترکیێ هه‌موو کرێگرتیێن حکوومه‌تا ئه‌نقه‌ره‌ و سه‌رۆکێ ترکیێ نه‌ و ئه‌ڤی کارێ ترکیێ‌ ژی ب ده‌ستێوه‌ردانا د کاروبارێ ناڤخوه‌یا سوێدێ دا ب ناڤ دکه.
ڕۆژنامه‌یا “ئافتۆنبلاده‌ت” یا سوێدی ‌ دنڤیسە كو پارله‌مه‌نته‌رێن سوێدێ ژ ئه‌سلێ خوه‌ ژ هه‌ر گه‌له‌کی بن، داویێ دا ئەو ‌ وه‌لاتیێن سوێدێنه‌ و ب داخوازا خوه‌ دکارن پرۆژه‌ بریار و یاسا د ھەر وار و پرسەكێ دا ‌ پێشکێشی پارله‌مه‌نا سوێدێ بکن.

د ڕاپۆرێ دا هاتیه‌ به‌حسکرن کو ئه‌و پرۆژه‌ بریارا پارله‌مه‌نته‌رێن سوێدێ ژ ئالیێ ۱۳ پارله‌مه‌نته‌ران ڤه‌ هاتیه‌ ئیمزاکرن و پێشکێشی سه‌رۆکا‌تیا پارله‌مه‌نێ کرنه‌، لێ به‌لێ مه‌دیایا ترکیێ‌ ته‌نێ ئێریشی چار ژ وان ۱۳ پارله‌مه‌نته‌ران کریه كو ئەو چار پارلەمەنەتر ئەسلێ خوە كوردن‌. ئه‌ڤه‌ ژی واته‌یا وێ یه‌کێ دده‌ کو ترکیه‌ زانیاریێن‌ هوور ل سه‌ر پارله‌مه‌نته‌رێن سوێدی هه‌یه‌ و سیخوریێ ل سه‌ر وان ده‌ دکه‌. ژ بۆ وێ یه‌کێ ژی ئه‌و ب ته‌ڤاهی ھەموو پرۆپاگەندەیێن مەدیایا تركیێ ڕه‌د دکن و داخوازێ ژ حکومه‌تا سوێد دکن كو به‌رانبه‌ر تركیێ بێهه‌لوه‌ست نه‌بە.

ڕۆژنامه‌یا “ئافتۆنبلاده‌ت” یا سوێدی‌ دنڤیسە: ئێریشا وه‌لاته‌کێ‌ بیانی ل سه‌ر نوونه‌رێن هلبژارتیێن پارله‌مه‌نا وه‌لاتێ مه‌، ب چ ئاوایه‌کێ نایێ قه‌بوولکرن، پێویسته‌ تەحەمولا سوێد به‌رانبه‌ر کارێن زێدەگاڤیێن ئه‌ردۆگان ب داوی ببه‌ و ب توندی ڤێ رەفتارا تركیێ شه‌رمه‌زار بکە و بالیۆزێ ترکیێ‌ ژی ژ ستۆکهۆلم بشینە ئه‌نقه‌رەیێ‌.

نێرین / شیرۆڤە