پەكەكێ ب چەك خوە سەپاند و خەلكێ ب دەنگان رەفز كر

ل ئیراقێ و باشوورێ کوردستانێ هلبژارتنێن پەرله‌مه‌نتۆیا ئیراقێ چێبوون. پەكەكێ ل شنگالێ ژ بۆ پەرله‌مه‌نتۆیا ئیراقێ کاندیدێن خوه‌ ده‌ستنیشان کرن و ته‌ڤلی هلبژارتنا بوو. ل ده‌ڤه‌رێن دن یێن باشوورێ کوردستانێ ژی پشتگریا هنده‌ک ئالیێن سیاسی کر. د ئه‌نجاما هلبژارتنان دا‌ هات دیارکرن کو، پەكەكێ چو ده‌نگ ده‌ستڤه‌ نه‌ئانین و ل شگالێ شکه‌سته‌ک مه‌زن خوار. پەكەكە ب پشتگریا حه‌شدا شه‌عبی ل شنگالێ دمینه‌ ،معاشێن خوه‌ ژی د بن ناڤێ حه‌شدا شه‌عبی دا‌ ژ حکومه‌تا ئیراقێ وه‌ردگره‌ و چه‌کدارێن پەکەکێ وه‌ک ملیسێن حه‌شدا شه‌عبی نه‌. ئه‌گه‌ر هه‌تا وه‌ک ڤێ گاڤێ ئه‌ڤ یه‌ک نه‌ھاتبە دیتن و ھەبوونا پەكەكێ ل باشوور بێ مه‌شروع کرن، ئه‌ڤ یه‌ک ته‌نێ‌ ل گۆرا داخوازێن ده‌وله‌تێن هه‌رێمێ و هێزێن دژاتیا ده‌ستکه‌فتیێن نه‌ته‌وی دکن تێ کرن.

د ده‌ما پرۆپاگانده‌یا هلبژارتنان دا‌ ژ بۆ ئالۆزی و تەڤلیھەڤیا  چێکن پەكەكێ  رێ نەدا کو کاندیدێن پەدەکێ بکه‌ڤن ناڤا شنگالێ و پرۆپاگانده‌یا خوه‌ بکن. مه‌دیا پەكەكێ ئه‌ڤ یه‌ک وه‌ک “به‌رخوه‌دانا گه‌ل” دا نشاندان و ب رۆژا دژی پەدەکێ نووچەیێن شاش و دوور ژ راستیێ به‌لاڤ کرن. لێ د ئه‌نجام دا خه‌لکێ ده‌ڤه‌رێ ب ده‌نگێن خوه‌ به‌رسڤا پەكەكێ دا و ئه‌و ئالیێن کو پەكەكێ پشتگریا وان دکر  ژی د دیرۆکا خوه‌ ده‌ شکه‌ستا هه‌ری مه‌زن خوار.

بێ گومان  نرخاندن و شرۆڤه‌یا هلبژارتنێن باشوورێ کوردستانێ مژاره‌ک گرنگه‌. پەدەکێ سه‌رکه‌فتنه‌ک به‌ربچاڤ ده‌ستڤه‌ ئانی، لێ ئه‌ڤ سه‌رکه‌فتن ل هەمبه‌ر ئالیێن دن یێن سیاسی بدەستڤە‌ ئانیه‌. گه‌ره‌ک سه‌ده‌مێن کێم به‌شداریا خه‌لکێ یا هلبژارتنا  باش بێ نرخاندن و پەدەک ڤێ یه‌کێ وه‌ک کێماسیه‌کی ببینە و ڤێ کێماسییێ ژ هۆلێ راکه‌.

ئیرۆ ل باشوورێ کوردستانێ پەدەکە ده‌وله‌تبوونا کوردا دپارێزه‌ و ئه‌ڤ ریا پیرۆز ژ خوه‌ را‌ کریه‌ ئارمانج. پەدەکە هێزا سه‌ره‌که‌یه‌ و ده‌ستهلاته‌. ئه‌گه‌ر گازنده‌کا خه‌لکێ ژ ده‌ستهلاتێ هه‌به‌ ، دڤێ پەدەکە ڤێ یه‌کێ گرنگ بنرخینه‌  و ڤان گازندا ژ هۆلێ راکه‌. ژ به‌ر کو د سه‌ری دا‌ پەکەکە و هنده‌ک ئالیێن سیاسی دژاتیا پەدەکێ و د که‌ساتیا پەدەکێ دا‌ دژاتیا ده‌ستکه‌فتیێن نه‌ته‌وی و ده‌وله‌تبوونا کوردا دکن. پەدەکە هێزا خوه‌ ژ خه‌لکێ کوردستانێ دگره‌ و نابه‌ چو جارا ڤی خه‌لکی و داخوازیێن وان ئیھمال بکه‌.

د ڤان هلبژارتنا دا‌ رێژه‌یا پشكداریا خەلكێ د دەنگدانێ دا گەلەك كێم بوو‌. پێویسته‌ لێکۆلینه‌ک تایبه‌ت ل سه‌ر ڤێ بێ کرن و ستراته‌ژیا پەدەکێ یا هلبژارتنێن پاشه‌رۆژێ یا پەرله‌مه‌نتۆیا کوردستانێ د ڤێ چا‌رچۆڤەیێ دا‌ بێ دیار کرن.

پەدەکێ د هلبژارتنێن پەرله‌مه‌نتۆیا ئیراقێ دا سه‌رکه‌فتنه‌ک مه‌زن ده‌ستڤه‌ ئانی و نابه‌ ئه‌ڤ سه‌رکه‌فتن ببه‌ سه‌ده‌مه‌ک کو، پەدەکە خوه‌ ب ئاوایه‌ک جدی به‌رچاڤ را‌ ده‌رباس نه‌که‌. پەدەکە مالێ گه‌له‌ و دڤێ ب هه‌موو ئاوایی گوھ ل گه‌ل و داخوازێن وان بگرە‌.

هه‌تا کو پەدەکە سیاسه‌ته‌ک راسته‌قینە رێڤه‌ ببه‌، هێزێن کو دژاتیا وێ دکن‌ دێ هه‌ر شکه‌ستنێ بخون.

ده‌وله‌تێن داگیرکه‌ر  پەكەكێ ژ بۆ ئارمانجێن خوه‌ ب کار تینن و ب ده‌ستێ چه‌کدارێن پەكەكێ ل باشوورێ کوردستانێ دبن گەڤ ل سه‌ر ستاتوویا ل باشوورێ کوردستانێ هه‌یە. ژ ئالیه‌ک دن ڤه‌ هێزێن کوردستانێ و ئیراقی ژی پرانیا جارا پەكەكێ وه‌ک کا‌رته‌کێ ل هەمبه‌ر هه‌ڤ ب کار تینن. ‌

2021.10.19

نێرین/شرۆڤه‌

ن. فرات

نێرین / شیرۆڤە