پەكەكە خوە ژبۆ ھێرشەكێ ئامادە دكە

ده‌ره‌و د سیاسه‌تێ دا پرانیا جارا دبه‌ وه‌ک ڕاستیه‌کێ و گه‌له‌ک ئالی د جڤاتێ دا ل سه‌ر وێ ده‌ره‌وا وه‌ک ڕاستی تێ قه‌بوول کرن، نرخاندنا دکن و دبن خوه‌دی دیتنه‌کێ و هه‌لوه‌ستا خوه‌ ژی دیار دکن. لێ د ڕاستیا خوه‌ دا ئه‌و تشتا کو ل سه‌ر گۆتوبێژێ دکن نینە، ده‌ره‌وه‌.

خوه‌دییێ ده‌ره‌وێ یانی یێن ده‌ره‌وێ دئافرینن خوه‌ ددن ئالیه‌کی و چاڤێ وان لێ یه‌ کا گه‌لۆ ده‌ره‌وا وان جهێ خوه‌ گرتیه‌ یان نا. ده‌ما دبینن کو ده‌ره‌وا وان جهێ خوە گرتیه‌، ئێدی ئه‌و ب خوه‌ ژی ژێ باوه‌ر دکن. ژ بیر دکن کو ده‌ره‌و وان ب خوه‌ ئافراندیه‌ و هه‌ر د چارچۆڤەیا وێ دەرەوێ دا سیاسه‌تا خوه‌ به‌رده‌وام دکن. مخابن، ده‌ما ل هەمبه‌ر ده‌ره‌وێ ڕاستی ب ئاوایاک هێز و ده‌نگه‌ک بلند نه‌یێ پاراستن، ده‌ره‌و دبه‌ وه‌ک ڕاستییێ.

پرانیا جارا پارتیا كاركەرێن كوردستانێ (پەکەکە) و هه‌ڤالبه‌ندێن وێ ده‌ره‌وه‌کێ دئافرینن و ل گۆرا وێ ژی سیاسه‌تا خوه‌ بڕێڤه‌ دبن.
نها گه‌له‌ک مالپه‌رێن پەکەکێ به‌حسا ئۆپه‌راسیۆنا ترکیێ یا ل ناڤا سنۆرێ باشوورێ کوردستانێ دکن. لێ ده‌ره‌وا دکن. ژ به‌ری هه‌ر تشته‌کی جهێ بنگه‌هین یێ خه‌باتا پەکەکێ نه‌ باشوور، لێ باكورێ کوردستانێ یه‌. لێ پەکەکە ب سیاسه‌تا خوه‌ بوویه‌ به‌لا سه‌رێ خه‌لکێ باشوور و بوویه‌ سه‌ده‌مه‌ک کو ب سه‌دان گوند ڤاله‌ دبن و ترکیا ئێریشێ باشوورێ کوردستانێ دکه‌.

پەکەکە ل گۆرا خوه‌ سه‌ناریۆیێن ده‌ره‌و دئافرینه‌. تێ زانین کو ل هه‌رێمێ پەکەکە وه‌ک هێزه‌ک ئیرانی ته‌ڤدگه‌ره‌. سه‌رۆکێن پەکەکێ ل قه‌ندیل هه‌موو فه‌رمانا خوه‌ ژ ڕژێما ئیرانێ و پاسداران وه‌ردگرن.

مخابن، د ڤێ ده‌ما داوی دا جاردن پوپارتیا دەمۆكراتا كوردستانێ (پەدەکە) ژ خوه‌ ڕا کریه‌ ئارمانج و ب ده‌ره‌وان شه‌رێ پەدەکێ و ده‌ستهلاتا باشوورێ کوردستانێ دکن. پەکەکە ئاماده‌هیا شه‌ره‌کی ل گه‌ل پەدەکێ دکه‌. لێ پەدەکە د ڤێ ده‌ربارێ ده‌ یا هشیاره‌ و ناكەڤە له‌یزتکا پەکەکێ و ماموستایێن ڤێ سیاسه‌تێ.

تایبه‌تی، پشتی پێڤاژۆیا ڕه‌فه‌راندومێ و ته‌نگاسیا ل باشوورێ کوردستانێ و ل هەمبه‌ر ئێریشێن ده‌وله‌تێن داگیرکه‌ر ل سه‌ر کوردستانێ، پەدەکێ شیا ل به‌رخوه‌ بده‌ و ژ وێ قۆناغا زه‌حمه‌ت دەرباس ببە. پشتی هلبژارتنێن عیراق و کوردستانێ ژی پەدەکێ سه‌رکه‌فتنه‌كا مەزن بده‌ستڤه‌ ئانی و ئه‌ڤ یه‌ک بوو شووژنا چاڤێن دژمنا و ڤێ یه‌کێ ڤه‌ گرێدایی پەکەکێ ده‌ست ئێریشێن مه‌دیایی کر.

نها ڕه‌وشا باشوور به‌رب خوه‌شییه‌کێ ڤه‌ دچه‌، تایبه‌تی هلبژارتنا سه‌رۆکێ هه‌رێما كوردستانێ و دامه‌زراندنا حوکومه‌تا هه‌رێما کوردستانێ دبه‌ ده‌ستپێکا پێڤاژۆیه‌ک نوو ژ بۆ کوردستانێ. بێ گۆمان د ڤێ پێڤاژۆیێ دا پێوه‌ندیێن کوردستانێ دگه‌ل ده‌وله‌تێن جیران گه‌له‌ک گرنگن. لێ پەکەکە ژ ڤێ یه‌کێ عاجزه‌ و دژاتیا پەدەکێ دکه‌.

ژ ئالیه‌ک دن، ڕه‌وشا نها پەکەکە تێ دایه‌ گه‌له‌کا ئالۆزه‌. ل ڕۆژاڤایێ کوردستانێ، ته‌ڤگه‌را پەکەکێ د ناڤا گوهه‌رتنه‌کی دا یه‌. پەیەدە پێوه‌ندیێن خوه‌ دگه‌ل ترکیێ ئاشکه‌ره‌ کرن و هێدی هێدی هه‌ولدانه‌ک ڤه‌شارتی هه‌یه‌ کو خوه‌ ژ قه‌ندیل دوور بێخه‌.

ل باکور ڕه‌وشا وان گه‌له‌کی خرابه‌ و نکارن ته‌ڤگه‌ره‌کی بکن. هەدەپە ب خوه‌ ژی که‌تیا د ناڤا ئالۆزیه‌ک سیاسی دا. هەدەپە د ناڤبەرا قه‌ندیل و ئیمرالی دا گێژ بوویه‌. چه‌پێن ترک د ناڤا هەدەپێ دا پشتگریا قه‌ندیل دکن و هه‌تا ڤێ گاڤێ ژی سه‌رده‌ستن و مه‌کانیزما بریارێ د ده‌ستێ وان دا یه‌.

ئۆجەلان پشتی هه‌ڤدیتنان د په‌یامێن خوه‌ دا ل دژی قه‌ندیله‌ و په‌یامێن ئۆجالان و سیاسه‌تا قه‌ندیل ب هه‌ڤرا ناگونجن.

ئێدی ئۆجەلان ئیمرالی وه‌ک ده‌زگه‌هه‌کی ب کارتینه‌ و ئیمرالی دبه‌ ناوه‌نده‌ک یا سیاسه‌تا پەکەکێ. گوهه‌رتنێن گرنگ چێدبن.

هه‌تا زھنیه‌تا پەکەکێ ل قه‌ندل نه‌ھێت گوهه‌رتن گه‌له‌ک زه‌حمه‌تی ل پێشیا پەکەکێ هه‌نه‌ و سیاسه‌تا کو ڕێڤه‌ دبن زه‌ره‌ره‌ک مه‌زن دگەهینه‌ ته‌ڤگه‌را ئازادیا کوردستانی. پەکەکە دبە ته‌هدید ژ بۆ ده‌ستکه‌فتنێن نه‌ته‌وی یێن کوردستانی. ژ بۆ ڤێ یه‌کێ ڤه‌شێره‌ ده‌ره‌وا دکه‌ و بوویه‌ ناوه‌ندا ئافراندنا ده‌ره‌وێن سیاسی.

2019.06.18
ئەنالیز/ ن.فرات

نێرین / شیرۆڤە