ژ بۆ خیانەتا خوە ڤەشێرن کوردپەروەران تاوانبار دکن
پەکەکە چقاس بێهێز و لاوز و لبەرتەنگ دبە ئه‌وقاسی هار دبه و ب هه‌موو ده‌زگه‌هێن خوه یێن مه‌دیایێ ژ بۆنا کو سه‌ده‌مه‌کی ژ بۆ تێکچوونا خوه ببینه ئێریشێ پارتییا دەمۆکراتا کوردستانێ (پەدەکێ) و بارزانیان دکه.
وه‌ک گه‌له‌ک جاران، جاردن د مالپه‌را پەکەکی یا ب ناڤێ لێکۆلینێ دا، نڤیسه‌ک ب ناڤێ فه‌رهات شاهین هاتیه وەشاندن و ب کین و نه‌فره‌ت ئێریشێ پەدەکێ و بارزانیان دکه. گه‌له‌ک جاران ل سه‌ر پۆختان و ده‌ره‌وێن مه‌دیایا پەکەکێ هاتیه نڤیساندن و هه‌روه‌ها ل با وان ئه‌خلاقه‌کی سنۆردان یێ شەرمێ نینە، ئەو بێ شه‌رم و ب هه‌زاران بێبه‌ختیان هه‌لوه‌ستا خوه یا د خزمه‌تا دژمنێن کوردستانێ دا به‌رده‌وام دکن.
نڤیسا کو د لێکۆلینێ دا هاتیه وه‌شاندن دا دبێژه: “ تێ دیتن کو ده‌ما ئه‌ردۆگان گەهشت ئه‌نقه‌ره‌یێ، هێزێن پەدەکێ ب ئاوایه‌کی ده‌فاکتۆ ل دژی پەکەکێ هه‌لوه‌سته‌که شه‌ر نیشان دان. ب ئارتێشا ترکی یا داگیرکه‌ر را، کو هێزێن خوه به‌ر ب هه‌رێمێن گارێ، مه‌تینا و خاکورکێ ڤه دگوهه‌رینه برن و هه‌ول دده ده‌رباسبوونا رێ ل گه‌ریلا بگره، ده‌م ب ده‌م ب گه‌ریلایێن ئازادیا کوردستانێ را ژی تێنه هەمبه‌رهه‌ڤ.“
ئه‌ڤ ده‌ره‌وە ئه‌ڤه ده‌مه‌که تێ کرن. ژ خوه ده‌ڤه‌رێن کو ئه‌و به‌حسێ دکن ل باشوورێ کوردستانێ نه و ده‌وله‌تا ترک ب سه‌ده‌ما پەکەکێ هاتیه هه‌رێمێ و ده‌وله‌ت و پەکەکە ب هه‌ڤرا د ناڤا هه‌ماهه‌نگیه‌کی دا هه‌ولددن هێزا پێشمه‌رگه‌یان ل هه‌رێمێ کێم بکن. پەکەکە ل باکورێ کوردستانێ بۆسته‌ک ئاخ ئازاد نه‌کریه. ل باشوور ب جهبوونه و ل دژی ده‌وله‌تبوونا کوردان ته‌ڤدگه‌رن و وه‌ک هێزه‌کا ئارتێشا ئیراقێ د ناڤا چالاکیا دا یه. یێن که‌تین پێشییا ده‌وله‌تا ترک و ئه‌و ئانین باشوورێ کوردستانێ پەکەکە ب خوه یه.
ژ ئالیه‌ک دن ڤه دالقاندنا ئالایێ ترکیێ سەر که‌لها هه‌ولێرێ ره‌خنه دکە و دبێژه: “ئه‌م ڤێ ژ بیر ناکن“.
لێ گه‌ره‌ک باش بێ زانین کو، هه‌ر ده‌وله‌ته‌ک پرۆسودوره‌کا وان هه‌یه کو ب ئاوایی پێشوازیا سه‌رۆککۆماره‌کی بکن. ل فرانسا گه‌له‌ک جارا برجا ئه‌یفه‌ل ب ئالایا هنده‌ک وه‌لاتان هاتیه خه‌ملاندن. ل دوبەی هه‌مان تش تێ کرن، ل کوردستانێ ژی ده‌ما سه‌رۆککۆماره‌ک سه‌ردانێ دکه ئالا وان ڕه‌نگ دده که‌لها هه‌ولێر. ژ به‌ری نها ژی سه‌رۆککۆمارێ فرانسایێ و پاپا وه‌ک سه‌رۆککۆمارێ ڤاتیکان سه‌ردانا کوردستانێ کرنه و ئالا وان ژی ره‌نگ دایه که‌لها هه‌ولێرێ.
ژ بلی ڤێ کی به‌حسا ئالایێ بکه بلا پەکەکە به‌حسێ نه‌که. هه‌موو رایادارێن پەکەکێ ئالایێ ترکان وه‌ک نرخه‌کی خوه یێ هه‌ڤبه‌ش دبینن. ژ رێبه‌رێ وان ئۆجەلان ب خوه ب ڤی ئالایی ئیفتخار دکه. نها ژ بۆ خاپاندنا خه‌لکه‌کی ئه‌ڤ گۆتن قه‌ت نایێ فرۆتن. ئه‌و مه‌ژی د وه‌ختێ خوه دا ده‌ما ئالایێ کوردستانێ ل باله‌فرخانه‌یا ستەنبول و ئه‌نقه‌ره ژی هاتی بلندکرن ره‌خنه‌یێن مه‌زن ل ئه‌ردۆگان کرن کا چما ئالایێ کوردستانێ ل ترکیێ بلند دکە.
به‌رده‌وامیا نڤێسێ دا دبێژه: “ هه‌ر چه‌ندە رایه‌دارێن پەدەکێ ب گۆتنا “ل گۆری پرۆتۆکۆلێ” هه‌ول دان به‌رته‌کێن چێبوون ژ هۆلێ راکن ژی، ئه‌ڤ وێنه ژ بۆ پەدەکێ وێنه‌یێ وه‌ستاندن و ته‌سلیمیه‌تێ یه. ما نه ئه‌و خایین-هه‌ڤکارێ مه‌زن ب ناڤێ مه‌سعود بارزانی بوو، کو دگۆت “ئه‌م دخوازن وه‌ک هه‌رێما فه‌ده‌ره یا کوردستانێ ببن پارێزگه‌هه‌ک ترکیێ”؟ ما ته‌سلیمکارێن دن ئێن ب ناڤێ مه‌سرور و نێچیرڤان ده‌ستێن ئه‌ردۆگان نه‌گرتن و خه‌تا “ئه‌م یێن ته نه، وه‌ک کو تو دخوازی ب کار بینه” نه‌کشاندن؟
ڤه‌کریه ئه‌و زهنیه‌تا که‌سایه‌ته‌ک وه‌ک سه‌رۆک بارزانی ب “خیانه‌تێ“ و نێچیرڤان و مه‌سرور بارزانی ب ته‌سلمیه‌تێ ئیتهام دکه، ژ به‌ری هه‌ر تشته‌کی ئەو ئه‌ولی خیانه‌تێ ل خوه و مله‌تێ کورد دکن. ئه‌و ژ بۆ خیانه‌تا خوه ڤه‌شێرن قه‌هره‌مانا ب خیانه‌تێ ئیتهام دکن.
نها ئه‌ڤ پۆختان و بێبەختیا پەکەک دکە، ب ته‌نێ دکاره ببه پێکه‌نوکه‌ک ژ بۆ که‌سایه‌تێن سیاسی و کوردستانی. گه‌لۆ پەکەکە چ ژ پرۆتۆکۆلا فام دکه؟ هه‌تا وه‌ک ڤێ گاڤێ چه‌ند رایادارێن پەکەکێ ب پرۆتۆکۆل سه‌ردانا ده‌ڤه‌ره‌کی کرنه یان ژی پێشوازیا هنده‌کان کرنه؟ یان ژی هه‌ڤدیتنه‌ک کرنه؟ ئه‌و ته‌نێ پرۆتۆکۆلا سیخووریێ تێدگەهن و هه‌ڤدیتنێن وان ب ته‌نێ ده‌زگه‌هێن ئیستخباراتێن وه‌لاتان را و ده‌وله‌تا کوور را هه‌نه. ژ ئالیه‌ک دن، ب وژدان، گه‌لۆ که‌سه‌ک دیتیه کو ل ده‌ره‌کی مه‌سعود بارزانی، وه‌ک د نڤیسێ دا تێ ئیدیعاکرن، گۆتیه : “ئه‌م دخوازن وه‌ک هه‌رێما فه‌ده‌ره یا کوردستانێ ببن پارێزگه‌هه‌ک ترکیێ”… ده‌روا بکن ب لباس.
گه‌له‌ک ئیتهامێن بێ ئه‌خلاقی کرنه، لێ راستی ده‌ما مرۆڤ هه‌ولدده به‌رسڤا ڤان پیسه‌کان ژی دده ژ خوه فه‌دی دکه.
لێ خاله‌ک هه‌یه کو دڤێ تایبه‌تی مه‌دیایا باشوورێ کوردستانێ ڤێ یه‌کێ ببینه. ده‌وسا پرۆپاگانده‌یا ده‌مرتاش و تورک بکن، بلا راستیا خوه ببینن و به‌حسا وان تۆهمه‌تێن پەکەکێ بکن و ب ئاوایه‌کی به‌رسڤا وان بدن. نه هه‌ما ببه‌زن به‌ر لنگێ که‌سایه‌تێن ده‌م پارتیێ و مایکرۆفۆنا درێژی به‌ر ده‌ڤێ وان بکن. پەکەکە واجبێ خوه دکه، ئه‌رکا وان ئه‌وه کو رێ ل ده‌وله‌تبوونا کوردا بگرن و نرخێن کوردا یێن نه‌ته‌وی ژ هۆلێ راکن و بدن ژ بیر کرن. ژ بۆ ڤێ ژی ئێریشێ پەدەکێ و بارزانیان دکن. لێ کوردێن دن ته‌ڤی مه‌دیایا خوه چ دکن؟ ئه‌ڤ پرسه‌که کو گه‌ره‌ک هنده‌ک ب وژدانا خوه به‌رسڤا وان بدن.
بلا که‌سه‌ک د ده‌ربارێ پەکەکێ دا خوه نه‌خاپینه، پەکەکە ته‌هدیتا هه‌ری مه‌زنه ل سه‌ر ده‌ستکه‌فتیێن باشوورێ کوردستانێ.
پەکەکێ ل باکور جڤاتا کورد تێکدا و هه‌ولدده وان ده‌وله‌تا ترک را و که‌مالستان را ئه‌نته‌گره بکه، بحەلینە.
پەکەکێ ل ڕۆژاڤایێ کوردستانێ ده‌مۆگرافیا وه‌لات گوهه‌رت و عه‌ره‌ب کرنه پرانی..
پەکەکێ ل رۆژهلاتێ کوردستانێ سخووریێ ژ رژێما ئیرانێ را دکه.
۱۸.٦.۲۰۲٤
نێرین / شرۆڤه
