سیاسی

ئاستەنگێن گەرا دویێ یا دانووستاندنان

د ده‌مێن ده‌رباسبوویی دا ده‌ست ب گه‌را دویێ یا دانوستاندنێن ناڤبەرا ئه‌نەکەسە و ته‌ڤده‌م هاته‌ ڕاگەهاندن کو ب هه‌ستیارترین گه‌را دانوستاندنان تێ زانین. چاڤکانی تەئكیدێ ل وێ یه‌کێ دکن کو دۆسیه‌یێن ئالۆزێن د ناڤبه‌را هه‌ر دو ئالیان دا هه‌تا نها چاره‌سه‌رنه‌بوونه‌ و زه‌حمه‌ته‌ ژی د ده‌مه‌ک کێم دا‌ وان هه‌موو ناکۆکی و جووداهیان ب داوی بینن و ڕێکه‌فتنا داویێ و گشتگیر د ناڤبه‌را هه‌ر دو به‌ره‌یێن کوردی یێن ڕۆژاڤایێ کوردستانێ دا ڕابگەهینن.

چاڤکانێن ب دەست مە كەتنە بەحسا وێ یه‌کێ دکن کو دانوستاندنا کورد – کورد ل ناڤچه‌یێن ڕۆژهلاتێ فراتێ ب سه‌رپه‌ره‌شتیا نوونه‌رێ ئەمریکایێ و فه‌رمانده‌یێ هێزێن سووریایا‌ ده‌مۆکراتیك مه‌زلووم ئه‌بدی ده‌ستپێکریه‌ و گه‌را دویێ بەردەوامە‌ و هه‌تا نها ژی پێرسگرێك‌ مانه‌ و نه‌کارینه‌ نێزیکبوونێ د ناڤبه‌را نێرینا هه‌ر دو ئالیان دا دروست بکن.

چه‌ند چاڤکانیه‌ک‌ ل ناڤ ته‌ڤده‌م و ئه‌نەکەسێ ئا‌شکه‌ره دكن کو ئاسته‌نگی و کێشه‌ و ناکۆکیێن زێده‌ ل به‌ر دانوستاندنان دروست بوویه‌ و زه‌حمه‌ته‌ د پاشه‌رۆژه‌کا‌ نێزیک دا‌ هه‌ر دو ئالی بگەهن ڕێکه‌فتنێ و کێشه‌یان یه‌ک ئالی بکن، ژ به‌ر کو ل ڤێ گه‌را دانوستاندنان دۆسیه‌یێن گران و هه‌ستیار تێنه‌ گوفتووگۆ کرن.

محیه‌دین ئیسۆ چالاکڤان و نڤیسکارێ کورد ڕۆژاڤا د ڤی ده‌رباری دا‌ ئاشکه‌ره‌ کریه‌ كو ئه‌و کێشه‌یێن د ناڤبه‌را هه‌ر دو ئالیان دا هه‌نه‌، به‌رهه‌مێن ناکۆکیێن ڕۆژه‌کێ نینن‌، به‌لکو یێن ده‌مه‌ک‌ درێژن، د هه‌مان ده‌می د‌ا پارتیا یه‌کێتیا ده‌مۆکراتیك “پەیەدە”چ ده‌مه‌کی خوە وه‌کی پارتیه‌کا‌ کوردی ل سووریایێ ب ناڤ نەكریە‌.

هه‌روەها ئیسۆ گۆت: ڕێکه‌فتن ل سه‌ر پرسێن سیاسی، کارگێری و سه‌ربازی، پێویستی ب وێ یه‌کێ هه‌یه‌ كو پەیەدە خوە ژ سیاسەت و ئیدیۆلۆژیا ئالیێن ده‌رڤه‌یێ ڕۆژاڤایێ کوردستانێ دوور بكە، لێ به‌لێ ئه‌و نکارە دەست ژ گرێدان و ئیدیۆلۆژیا خوه‌ یێن سیاسی ببن. د ده‌مه‌ک دا پێویسته‌ هه‌مو وه‌کی کوردێن ڕۆژاڤا هزر بکن و ل گه‌ل برایێن خوه‌ ل پێکهاتێن دن گوفتووگۆ بکن و ب ھەڤ را بگەهن شێواز و چارچێوه‌یه‌ک ‌ هه‌ڤبه‌ش ژ بۆ هه‌موو خه‌لکێ ڕۆژاڤایێ كوردستانێ، دا کو ب ھەڤ را بكارن ناڤچه‌یێ ل سه‌ر برێڤه‌ ببن و هزرا برێڤه‌برن و دارشتنا سیاسه‌ت و ئابۆریا ناڤچه‌یێ ل سه‌ر بنگه‌ها خه‌لکێ ناڤچه‌یێ بە.

ئیدیۆلۆژی و بریارو سیاسەتا وه‌لات و گرووپێن دن کو ته‌ڤده‌م دخوازه‌ ل سه‌ر خه‌لکێ ناڤچه‌یێ بسه‌پێنە، ھەتا ئه‌گه‌ر به‌ره‌ڤاژیا به‌رژه‌وه‌ندیێن گشتی یێن خه‌لکێ ڕۆژاڤایێ کوردستانێ ژی بە، ژ بۆ وان ئاسته‌نگی نینه‌ و ب بریارن ل سه‌ر وێ یه‌کێ کو ب زۆرێ بیسه‌پێنن. به‌رێ چه‌ندین هه‌ولێن دن ھاتینە دان، لێ ئه‌و چ ده‌مه‌کێ ده‌ستبه‌ردارێ وێ ئیدیۆلۆژیا و گرێداییبوونێن خوه‌ یێن ئالیێن ده‌ره‌کی نه‌بوون، ژ بۆ وێ یه‌کێ نەکارین ل ده‌ستپێشخه‌ریێن به‌رێ سه‌رکه‌فتی بن و نها ژی ل ڤێ گه‌را دانوستاندنان ڕه‌وش گرانه‌ و نه‌ هێسانه‌.

چه‌ند چاڤکانیه‌ک ژی ل ناڤا ئه‌نەکەسی و ته‌ڤده‌م ب “سکای نیوس” ڕاگەهاندنه‌ کو دانوستاندنێن وان ژ بۆ گه‌را دویێ به‌رده‌وامن‌، بێیی وێ یه‌کێ کو چ پێشڤه‌چوونه‌ک هه‌بە، ژ به‌ر کو ناکۆکیێن هه‌ر دو ئالیان ل سه‌ر سێ دۆسیه‌یێن سەرەكی نە:

1- دۆسیه‌یا سیاسی و مه‌رجه‌عییه‌تا ڕۆژاڤایێ كوردستانێ کو ل گه‌را یه‌که‌م یا دانوستاندنان دا بریارا وێ دابوون، لێ به‌لێ ناڤه‌رۆکا دروستکرنا وێ مه‌رجه‌عیه‌تێ هه‌تا نها کێشه‌یه‌کا زێده‌ ل سه‌ر هه‌یه‌ و ته‌ڤده‌م دخوازه‌ 60% ئه‌ندامێن وێ مه‌رجه‌عیه‌تێ ئه‌و ب خوه‌ بن و ته‌نێ 40% ژ بۆ ئه‌نەکەسێ بە، بێیی وێ یه‌کێ كو هه‌سابێ ژ بۆ پارتیێن دن یێن کوردی بکن کو ل ده‌رڤه‌یێ ته‌ڤده‌م و ئه‌نەکەسێ نه‌. ل به‌رانبه‌ر دا ئه‌نەکەسە داخواز دکه‌، به‌شێن هه‌ر دو ئالیان نیڤ ب نیڤ بن ل ناڤا مه‌رجه‌عیه‌تێ و به‌شه‌ک ژی ژ بۆ پارتیێن دن ده‌ینن، لێ به‌لێ ته‌ڤده‌م دابه‌شکرنا ب ڤی ئاوایی ب ته‌ڤاهی ڕه‌د دکه‌ و ئه‌ڤێ ژی وها کریه‌ هیچ پێشڤه‌چوونه‌ک ل سه‌ر وی واری دا‌ نه‌بە و دروستکرنا مه‌رجه‌عیه‌تێ پاش بکه‌ڤە. ژ بلی وێ ل گه‌را یه‌که‌م دا‌ بریارا دروستکرنێ دان و لۆگۆیا وێ ژ بۆ وێ هاتبوو چێکرن و به‌لاڤکرن.

2- دۆسیه‌یه‌کا پرسا برێڤه‌برنا کارگێری و ئابۆریا ناڤچه‌یێن ڕۆژهلاتێ فراتێ یە، ژ بلی ڤێ ژی ل سەر سیسته‌ما خوه‌ندن و فێرکرن و سامانێن خوه‌زایی و چاواییا دابه‌شکرنا داهاتان ناكۆكیێن کوور ل سه‌ر هه‌نه‌، نها ئه‌ندامێن ته‌ڤده‌م ده‌ست ل سه‌ر ته‌ڤاهیا ده‌ستهلاتا ڕۆژهلاتا فراتێ دا گرتنه‌، لێ به‌لێ ئه‌نەکەسە دخوازه‌ ‌ د برێڤه‌برنا دۆسیه‌یا کارگێری و ئابۆری و ته‌ناهی دا ڕۆلا وێ کێمتر نه‌بە به‌شداریه‌کا‌ ڕاستەقینە بکه. ژ بۆ وێ یه‌کێ داخوازا دووباره‌ دارشتن و ڕێکخستنا سیسته‌ما کارگێری و ئابۆری و فێرکرنێ دکه‌، لێ به‌لێ ته‌ڤده‌م ئه‌ڤێ‌ ڕه‌د دکه‌ و ئاماده‌یه‌ سیسته‌مێ وه‌کی خوه‌ بهێلە و چه‌ند پۆستێکا ب ئه‌نەکەسێ بده‌.

3- هه‌ستیارترین دۆسیه‌ ژی مه‌سه‌له‌یا هێزێن ئاساییش و سه‌ربازی یه‌، ب گشتی هه‌ژمارا هێزێن کورد و پێکهاتەیێن دنێن ناڤا هەسەدێ و ب له‌شکه‌رێ ڕۆژاڤا ژی دگەهه‌ نێزیکی 100000 سه‌ربازان. ئه‌نەکەسە داخوازا ڕێکخستن و پێداچوونه‌ک نوو ل ئاساییشا ڕۆژاڤا و هەسەدێ دکه‌، هه‌تا ب ته‌ڤاهی دووباره‌ بێنه‌ دارشتن و نوونه‌رێ وان و پێکهاتەیێن دن ژی ب هێژایی ب برێڤه‌برنا دۆسیه‌یا ئاساییشێ دا به‌شدار ببن و لەشكەرێ ڕۆژ ژی ڤه‌گه‌رن، ل سه‌ر ئه‌ڤه‌ ژی ته‌ڤده‌م گه‌له‌ک هه‌ستیاره‌ و هه‌رده‌م خوه‌ ژ وێ یه‌کێ دده‌ پاش و ناخوازه‌ لەشكەرێ ڕۆژ ژی ڤه‌گه‌رە ڕۆژاڤایێ کوردستانێ.

باز ئه‌حمه‌د
2020.09.05

Back to top button