ئەو گورانكاریێن پێدڤیە پارتی ئەنجام بدە

بەری حەفتێوچوار سالان، وەکو ئەڤرو، کاودانێن بزاڤا رزگاریخوازا کوردی پێویستیا دامەزراندنا پارتیا دیموکراتا کوردستانێ سەپاند، ژ وێ رۆژێ تا ئەڤرۆکە پارتی ب قوناغێن جودا-جودا د خزمەتکرنا دۆزا رەوایا خەلکێ کوردستانێ دا یا بەشدارە. فەلسەفا بارزانیێ نەمر ژ خانقین تا زاخۆ ل سەر بنەمایێ دادپەروەریا کومەلایەتی و پێکڤەژیان و خزمەتکرنا تەڤایا تاکێن ل کوردستانێ دژین هاتە پەیرەوکرن و ئێکەم جار د مێژویێ دا پارتی شیایە ب رێکا شورەشا ئیلونا مەزن ژلایێ یاسایێ فە مافێن مللەتێ کورد ل باشوور بکە د چارچۆڤەکێ یاسایێ دا و ب نەچارکرنا حکومەتا عێراقێ بو ئیمزا کرنا رێکەفتنا 11 ئادارێ.

ل سەرهلدانا 1991 ێ، پارتی شیایە سەرکردایەتیا بەرەیێ کوردستانی بک بو بەرچەستەکرنا داخوازیێن خەلکێ کوردستانێ و بناغێ حکومەتا کوردستانێ هات دامەزراندن و پارتی رۆلەک کاریگەر هەبویە د ئازادکرنا عێراقێ و تاکو ئەڤرۆ ژی کاروانێ خەباتا پارتی بەردەوامە.

پارتی ب ستراتیژیەک نەتەوەیی رەفەراندوما گەلێ کوردستانێ پەیرەو کر و ب سەرفەرازی بەرسنگێ هەموو دوژمنان گرت  و ئەڤرۆ ژی سەررێ هەر پارتیەکی/ێ یێ بلندە د وارێ پرسێن نەتەوەیێ دا. پارتی بەردوام ژ بۆ لایەنێن کوردی مساومە کریە پێناڤ رێکخستنا ناڤمالا کوردی و گەلەک جاران پارتی باجا ڤێ چەندێ دایە لێ ژ بەرپرسایەتیێ نەرەڤی یە..

ژ بۆنا قوناغا ئەڤرۆ ژی  پارتی دڤێت ب رەھوریشالڤە ل سەر ڤان ئاستێن ل ژێر گورانگاریان ئەنجام بدە:

حکومەت و پەرلەمان

1- جێبەجێکرنا پروژێ چاکسازیێ، چونکە تاکە پێنگاڤا كو باوەری دنافبەرا حکومەت و خەلکی دا ڤەگەرە پروژێ چاکسازیێ یە.

2- سزادانا بەرپرسێن گەندەل. خەلکێ کوردستانێ نە موستەحقە باجا چەند بەرپرسێن گەندەل بدە، خەلکی قوربانی داینە پێناڤ دادپەروەریێ و شەرمە وەل خەلکێ دلسوز بهێت ئەڤرۆ پەشیمان بن ژ وێ خەبات و قوربانی دانێ.

3- پشتەڤانیکرنا کەسانێن دلسوز و ئەکادیمیناس ل پوستێن ئیداری و حکومی مخابن نوکە بەروڤاژی یە، ئەڤ بوستە بو کورەجاش و خوفرەشان ماینە .خکومەت یا بویە حکومەتا بازرگان و دەوڵەمەندان.

4- گرنگی دان ب سبستەمێ پەروەردێ و تەندەرستی.  

5- خزمەتگوزاریێن باشتر ل گوند و شارێن کوردستانێ بهێنە ئەنجام دان تایبەت پارێزگەها دهوکێ و تایبەتڕ ژی گوندێ سێمێلێ.

6- رێکخستنا هێزێن پێشمەرگەیی ل سەر بنەمایەکێ تشتیمانی.  

7- دورستکرنا ناڤەندێن دبلوماسی بو بهێزکرنا پێگەهێ هەرێمێ ل سەر ئاستێ دونیایا دەرڤە و پەیوەندین هەرێمێ ب رێکا حکەمەتێ بن نەک پارت و لایەنێن سیاسی.

ل سەر ئاستێ حزبی

1- ئەنجامدانا کونگرێ 14 ێ ب شێوەکێ دورست و دوور ژ مایتێکرنا هندەک بەرپرسان، بەلکو ب شێوەکێ سەردەمانە ئەڤ کونگرە بهێت ئەنجام دان. ئەندامێن کونگرەیێ ب هندەک پیڤانێن پارتایەتی بهێن ژێگرتن نەکو هەر بەرپرسەک بخوە کار بکە و کورسیکێن کونگرەیێ پربن ژ کەسانێن بێ ئاست.

2- گرنگیدانا ب کادرێن خوەدان شیان و دلسوز ل جهێ کرینا کادرێن حزبێن دی یێن سیاسی یێن بێ ئاست.

3- گرنگیدانا ب کەسوکارێن شەهیدان و پێشمەرگەیێن شورەشێن ئیلون و گولان و زیندانیێن سیاسی.

4- گرنگیدان ب ناڤەندێن ستراتیزی و ڤەکۆلینان.  

5-  پێداچوون ل رێکخراوێن قوتابی و لاوان و ئاڤرەتان دا.

6- رێکخستن ب شێوزاێ نوکە بهێتە کوهورین بەرەڤ رێکخستنەکا سەردەمیانە.

7-  پەیرەوکرنا فەلسەفا بارزانیێ نەمر، چونکە گەلەك مخابن ل پرانیا دام و دەزگەهێن پارتی دا ئەڤ فەلسەفە هاتیە پشتگوھ هاڤێتن.

رمضان نصرالدین مصطفی

2020.08.15