شەوتاندنا ئالا و سەمبۆلان رەوشتێ پەکەکێ یە
ل باشوورێ کوردستانێ باژارێ سلێمانییێ، هندەک خوه‌نده‌ڤانێن زانینگه‌هێ ژ بۆ بجیهئانینا هندەک داخوازێن گرێدایێ خوه‌نده‌ڤانیێ ده‌ست ب خوه‌پێشاندانان کرن. د سه‌ری دا پرانیا خه‌لکه‌کێ و ئالیێن سیاسی و هه‌تا ده‌زگه‌هێن حکومی داخوازێن خوه‌نداڤانان ماقوول دیتن و حکومەتا هه‌رێما کوردستانێ ل سەر ڤێ مژارێ جڤیا و د بەرژەوەندیا داخوازێن خوه‌نده‌ڤانان دا چەند بریار دان.
لێ ڕه‌وشا خوه‌پێشاندانان بەر ن ئاقارەک دن هاته گوهه‌رتن و خوه‌پێشانده‌ران ده‌ست ب شه‌وتاندنا هندەک ناوه‌ندێن پارتیێن سیاسی و حکومی کرن. هه‌روه‌ها هندەک ئاڤاهییێن وه‌ک پرتووکخانه‌یا شه‌وتاندن. گه‌له‌ک ڤه‌کری هات خویاکرن کو پەکەکە ب ئاوایه‌ک چالاک د ناڤا خوه‌پێشاندانان دا رۆلەک مەزن هەبوو و هه‌وله‌ک مه‌زن دا کو ڕێبه‌ریا خوه‌پێشانده‌ران ب ته‌مامی بکه و به‌رێ خوه‌نده‌ڤانان دا توندی و توژیێ. هه‌تا هندەک ئالیگرێن پەکەکێ د ده‌ربارێ ڕێبه‌ریا خوه‌پێشاندانان دا داخوویانی به‌لاڤ کرن و تایبه‌تی ده‌ستهلاتا کوردستانێ وه‌ک دژمن ب ناڤ کرن.
خوه‌پێشاندان گاڤ ب گاڤ به‌ر ب توندی و توژیێ ڤه چوون و بێرێزی ل هەمبه‌ر نرخ و سه‌مبۆلا کوردستانێ کرن. خوه‌پێشانده‌ران ئالا کوردستانێ ئاڤێتن ئه‌ردێ و پێلێکرن و بێ ئه‌ده‌بیه‌ک مه‌زن ل هەمبه‌ر ئالا کوردستانێ کرن. ژ به‌ری نها ژی ل چه‌ند ده‌ڤه‌رێن جودا یێن کوردستانێ هێزێن داگیرکه‌ر بێڕێزی ل هەمبه‌ر ئالا کوردستانێ کریبوون. ل باکورێ کوردستانێ ل گه‌له‌ک جهان ئه‌فسه‌رێن ئارتێشا ترکا ئالا کوردستانێ شه‌وتاندن و دانین ئه‌ردێ و ل سه‌ر ڕێڤه‌چوون. ده‌ما ۱٦ێ جۆتمه‌هێ دا هه‌رکه‌سی دیت کو، چەکدارێن شیعه ل که‌رکووکێ جاردن بێرێزیه‌ک مه‌زن ل هەمبه‌ر ئالا کوردستانێ کرن.
ئیرۆ د ڕۆژا مه دا پەکەکێ د خوه‌پێشاندانێن سلێمانیێ دا ل هەمبه‌ر ئالا کوردستانێ بێرێزیا هه‌ری مه‌زن کر. بێرێزیا پەکەکێ ل دژێ ئالا کوردستانێ نه جارا ئه‌وله. ل ڕۆژاڤایێ کوردستانێ ژی گه‌له‌ک جارا چه‌ته‌یێن چه‌کدارێن پەکەکێ ئالا کوردستانێ شه‌وتاندنه و ئانینه خوار و پێلێکرنه. تشتا کو ئارته‌شا ترک و ملیسێن شیعه ل دژی ئال کوردستانی کرین پەکەکێ ژی هه‌مان تشت ل همبه‌ر نرخ و سه‌مبۆلا کوردان دکه.لێ ئه‌و دژمن و پەکەکە “ته‌ڤگه‌ره‌ک کوردستانی” تێ ناساندن.
ل ڤێ ده‌رێ هه‌لوه‌ستا خه‌لکێ کوردستانێ و ب ڤێ یه‌کێ ڤه گرێدایی هه‌لوه‌ستا حکومەتا کوردستانێ گه‌له‌کی گرنگه.
پێدڤیە پشتی خوه‌پێشاندانان یێن ده‌ست ب توندوتووژیێ کری و ئالا کوردستانێ ئاڤێتن ئه‌ردێ بهێنە جەزا کرن و ئه‌و که‌سێن توندوتووژی کرین و تایبه‌تی یێن ئالا کوردستانێ قه‌تاندن و ئاڤێتین ئه‌ردێ بێنه ته‌سبیت کرن. ته‌سبیتکرنا وان گه‌له‌ک ساناهی یە و د ڤێ ده‌ربارێ دا گه‌له‌ک ڤیدیۆ و وهێنه هه‌نه. پشتی ئه‌ڤ که‌س بێنه ته‌سبیت کرن دڤێ ده‌زگه‌هێن ئه‌وله‌هیێ وان بگرن و یێن هه‌موه‌لاتیێ باشوورێ کوردستانێ بن بهێنه دادگه‌هکرن و دادگه‌ه د ده‌ربارێ وان دا بریارێ بده. لێ یێن کو نه هه‌موه‌لاتیێن باشوورێ کوردستانێ نه ،دڤێ دەملدەست ژ سنۆرێ کوردستانێ ده‌رێخن و وان ده‌رسنۆر بکن.
پەکەکە تشتا ده‌مه‌کی ل باکورێ کوردستانێ کری و ڕه‌وشا خه‌لکێ تێکبری، ئیرۆ ل باشوورێ کوردستانێ دخوازه بجه‌ربینه. خوه‌نده‌ڤانان ب کارتینن. سلێمانی کرنه ناوه‌ندا ته‌ڤگه‌را خوه، هندەک ئالیێن سیاسی پشتگریا پەکەکێ دکن. ئارمانجا پەکەکێ هلوه‌شاندنا حکومەتا هه‌رێما کوردستانێ یه تێکبرنا ستاتوویا کو ئیرۆ ل باشوورێ کوردستانێ هه‌یی و ده‌ستکه‌فتیێن نه‌ته‌وی ل باشوورێ کوردستانێ یه..
دڤێ ڤێجا مه‌ژییێن ژەنگێ گرتین ڤێ یه‌کێ ببینن و ئێدی ڕێ نه‌دن کو پتر پەکەکە ل پێ ل ڕوومه‌تا وان بکه.
پێدڤیە ڤێجا هه‌ر ئالیه‌ک سیاسی، تایبه‌تی مه‌دیایا باشوورێ کوردستانێ یێن کو خوه ددن نیشاندان ئه‌و ده‌ستکه‌فتیێن نه‌ته‌وی ل کوردستانێ دپارێزن ل خوه ڤەگەرن و د سیاسه‌تا وه‌شانا خوه یا پرۆ پەکەکێ دا ل خوه مکور بێن و ل هەمبه‌ر هه‌موو جوره‌یێن توندوتووژیێ ده‌رکه‌ڤن و ئه‌وێن بێرێزی ل هەمبه‌ر ئالا کوردستانێ کرین ته‌شهیر بکن و سیاسه‌تا وان ئالیان یا قرێژ ژ رایا گشتی را بدن ناساندن.
ئه‌گه‌ر ڤێ یه‌کێ نه‌کن ئه‌و مالا خوه ب ده‌ستێ خوه خراب دکن.
بێ گومان د ڤێ ده‌ربارێ ده گه‌له‌ک تشت هه‌نه کو بێنه گۆتن. هه‌ر ئالیێ ڕێ دایە پەکەکێ کو ل باشوور ب کێفادلێ تەڤبگەرە، ئەو ژی شریک و سەبەبێ ڤان بوویه‌رانە و د ڤێ ده‌ربارێ ده به‌رپرسیاریا وان هه‌یه. هه‌روه‌ها ئه‌و مه‌دیایا کو ب ئاوایه‌کی بوویی ئاله‌تێ پرۆپاگاندا پەکەکێ ژی خوه‌دی به‌رپرسیاره.
خاله‌ک دن، گه‌لۆ کا ئه‌م به‌رێ خوه بدەنێ ئه‌و مه‌دیا باشوورێ کوردستانێ کو ڕۆژانە ڕووپه‌لێن مالپه‌رێن خوه ب نووچه‌یێن پەکەکێ، هەدەپێ و ده‌زگه‌هێن گرێدایی پەکەکێ دخه‌ملینن، دێ ل هەمبه‌ر ڤان خوه‌پێشاندانان و بێڕێزیا ل هەمبه‌ر ئالا کوردستانێ هاتی کرن چ بکن. گه‌لۆ دێ داخوویانیێن هەدەپێ و ده‌مرتاش کو ڤێ توندوتووژیێ و بێرێزیا ل هەمبه‌ر ئالا کوردستانێ بوه‌شینن یان نا؟ گه‌لۆ دێ په‌یامنێرێن وان ل دیاربه‌کر ڤێ پرسێ ژ به‌رپرسێن هەدەپێ بکن؟ وێ بکاربن ژ سانجار و بولدان ڤێ پرسێ بپرسین دیتنا وان ژ ڕایا گشتی یا کوردستانێ ڕا ئه‌شکه‌ره بکن؟
ئه‌ڤ تشت تێن گۆتن ژ به‌ر کو هه‌ر ئالیه‌ک سیاسی، هه‌ر ده‌زگه‌هه‌ک مه‌دیایی کو ل هەمبه‌ر سیاسه‌تا پەکەکێ یا دژی کورده‌واریێ تۆله‌رانس نیشاندایی، ل باشوور پەکەکە ئانیه ڤێ ڕاده‌یێ و مخابن ئیرۆ پەکەکە بوویه ته‌هدیدا هه‌ری مه‌زن ل سه‌ر سه‌روه‌ریا هه‌رێما کوردستانێ.
نێرین/شرۆڤه
