د. عەلی کەمال ئۆزجان ل زانکۆیا توندجەلیێ وەک سەرۆکێ پشکا سۆسیۆلۆژیێ و ڕاوێژکارێ ڕێکتۆری کار دکەت. عەلی کەمال کەسایەتیەکێ نێزیکی دەزگەهێن حەساس یێن دەولەتێ یە و د هەمان دەم دا گەلەکێ نێزیکی عەبدولا ئۆجەلانی یە.
ل دەمێ هەلبژارتنێن ٢٣ێ حزەیرانا ٢٠١٩ێ، د ناڤبەرا ئۆجەلان، سەلاحەدین دەمیرتاش و قەندیلێ دا بۆ هەلوەستێ هەلبژارتنێن هەرێمی ناکۆکیەک پەیدابوو. ئۆجەلانی دخواست کو هەدەپە چ هەلوەستان وەرنەگریت و بێلایەن بمینیت. لێ دەمیرتاش و قەندیل ب ئیسرار دخواستن پشتەڤانیا جەهەپێ بکەن. د ڤێ ئالۆزیا د ناڤبەرا پەکەکێ دا، عەلی کەمال ئۆزجان داخواز ژ دەولەتێ کر کو بچیتە ئیمرالیێ و ئۆجەلانی ببینیت و هەلوەستێ ئۆجەلانی بگەهینیتە ڕایا گشتی و دەنگدەرێن هەدەپێ.
عەلی کەمال ئۆزجانی سەرەدانا ئیمرالیێ کر و هەڤدیتنەک د گەل ئۆجەلانی ئەنجامدا. ئۆجەلانی نامەیەک دا عەلی کەمالی داکو ئەو نامە بۆ خەلکی بهێتە ئاشکراکرن. لێ هەدەپێ ڕێ نەدا کو ئەڤ نامە ژ لایێ عەلی کەمال ئۆزجانی ڤە بهێتە ئاشکراکرن. هەدەپێ ئەڤ نامە سانسۆر کر و پشکەک ئەوا کەس تێنەگەهیت ئاشکرا کر. ئەڤ چەندە پاشان گەلەک هاتە بەحسکرن و گۆتۆبێژکرن.
ڤان ڕۆژان دیسا عەلی کەمال ئۆزجان گۆتنێن توند د دەربارێ دەم پارتیێ دا ب کار دئینیت. عەلی کەمال ئۆزجان د داخۆیانیەکا خوە دا بەحسا دەم پارتییێ دکەت و دبێژیت: “ژ بلی من کەس بەحسا ئۆجەلانی ناکەت؛ ژ بەر کو ئەو وی نانیاسن. ئەو هەموو بێکێرن، هەموو سادەن (سافن)، هەموو ماددەپەرستن (ماتریالیستن).”
عەلی کەمال ئۆزجان د بەردەوامیا داخۆیانیێ دا گۆت:
“سەرۆکێ ناوچەیێ یێ کو ڕۆژێ ٥ جاران دبێژیت ‘سەرۆک’،
سەرۆکێ پارێزگەهێ یێ کو ١٠ جاران دبێژیت ‘ڕێبەری’،
ئەندامێ ڕێڤەبەریێ یێ کو ١٥ جاران دبێژیت ‘ڕێبەر یان سەرۆکایەتی’،
و ئەندامەکێ پەرلەمانی یێ کو ٢٠-٣٠ جاران دبێژیت ‘بڕێز ئۆجەلان’ ماف هەیە ببیتە ئەندامێ پەرلەمانی.
ژ بەر ڤێ چەندێ، هەر کەس د پراکتیکێ دا ژ بۆ گۆتنا ڤان گۆتنان دبنە ڕێز.”
