ئەرێ ڤێ داخوازییێ، پێدڤی ب ٤٠ سالێن شەڕی و قوربانیدانا پتر ژ ٥٠ هزار جوانێن کورد هەبوو؟
کەنالێ “زاگرۆس ٢٤”، كو كەنالەك كوردی و فارسی یە، دەست ب وەشانا خوە كر و ئارمانج و ستراتیژییا خوە ئاشكەرا كر. كەنالێ زاگۆرس٢٤ کو هەر ئاریان تیڤی یا پەکەکێ یە و ناڤێ خوە گوهەرتی یە، ئارمانج و ستراتیژییا خوە ب ناڤێ ”یەکسانییا ژن و زەلامان، دیموکراسی و هەڤکارییا گەلان و دژایەتیکردنا ناسیۆنالیزمێ” ڕاگەهاند
دەربارێ ئارمانج و ستراتیژییا كەنالێ زاگۆس٢٤، نڤیسكار و لێكۆلەر حامید گەوهەری دبێژە: ئەڤە هەمان پرۆگرامێ پەکەکێ یە بۆ ترکیا و باکورێ کوردستانێ. ب ڕووکەش خوە ب بێلایەن نیشان ددەن، بەلێ دژبەرییا ناسیۆنالیزمێ دکەن، کو ئەڤ چەندە جهێ ڕەزامەندییا ڕژێما ئیرانێ و شوفینیزما ئیرانی یە. ب ڤی ئاوایی، ئەو گۆتارا بەری هەشت سالان یا “موستەفا قەرەسو” دووبارە دکەن ڤە کو گوتبوو: ئەم دەولەتا کوردی ناخوازن! ئەم ناخوازن ترکیایێ دابەش بکن! ئەم دۆزا دیمۆکراتیزەکردنا ترکیایێ دکن! خەباتا مە نە ژ بۆ جودابوونێ یە!”
گەوهەری د بەردەوامیا شرۆڤە یا خوە ل سەر ئارمانج و ستراتیژییا كەنالێ زاگۆس٢٤ چەند پسیارەکێن گرنگ و جەوهەری دکە:
یا ئێکێ: مادەم ل ترکیایێ خەباتا حزبی یا ئازاد هەبوو، ئەرێ ئەو داخوازییا وان پێدڤی ب ٤٠ سالێن شەڕێ چەکداری و کوشتنا پتر ژ ٥٠ هزار مرۆڤان هەبوو؟
یا دووێ: ئەرێ ئەو دزانن ب کارێن خوە یێن تێکدەرانە د وان ٤٠ سالان دا، چ زیانەک گەیاندییە باکور، ڕۆژئاوا و باشورێ کوردستانێ؟
یا سێیێ: بۆچی بۆ دیمۆکراتیزەکردنا ترکیایێ، ڕێکارێن سیاسی و مەدنی نەگرتنە بەر و چەک هەلگرت؟
یا چوارێ: ما پارتییا یاسایی یا (هەدەپێ) ٨١ پەرلەمانتار ل ترکیایێ نەبوون؟ بۆچی ب سیاسەتا خەندەکان مال ل کوردان وێران کر؟
یا پێنجێ: بۆچی پتر ژ ئێک ملیۆن کورد ل کوردستانێ ئاوارە و دەربەدەر کرن؟
یا شەشێ: مادەم ئارمانجا وان دیمۆکراتیزەکردنا ترکیایێ یە، کارێ وان ب پارچەیێن دی یێن کوردستانێ ڤە چ بوو؟ و بۆچی ڕۆژئاوایێ کوردستانێ ژ ڕێبازا وێ یا ڕاستەقینە لادا و نەهێلا کوردێن وێ پشکێ بخوە بڕیارێ ل سەر چارەنڤیسێ خوە بدن؟
یا حەفتێ: بۆچی دەستوەردان د کاروبارێن باشوورێ کوردستانێ دا دکر و ببوونە ئەگەرێ ڕاکێشانا سوپایێ ترکیا بۆ ناڤ ئاخا باشوور؟
ئەرێ گۆتن و کریارێن وان، د چ خانەکا سیاسی یا وەلاتان دا دهێنە لێکدان؟ و ئەرێ ئەڤ داخوازییا پژاکێ، نە هەمان داخوازییا پەکەکێ یە کو ٤٠ سالان شەڕ بۆ کر و پتر ژ ٥٠ هزار مرۆڤان تێدا بوونە قوربانی
