سەرۆکێ هەرێما کوردستانێ: دڤێت حکومەتا عیراقێ قەرەبوویا قوربانیێن ئەنفالێ بکەت
هەولێر – ئەڤرۆ سێشەمبی، ٢٥ێ تەباخا ٢٠٢٦ێ، نێچیرڤان بارزانی، سەرۆکێ هەرێما کوردستانێ، د پەیامەکێ دا ب هەلکەفتا ٣٨ سالیا تاوانا ئەنفالا بەهدینان، داخواز ژ حکومەتا فیدرالا عیراقێ کر کو قەرەبوویا ماددی و مەعنەوی یا مالباتێن قوربانییێن ئەنفالێ بکەت و تەکەز ل سەر ب هێزکرنا تەبایی و ئێکڕێزییا ناڤخوەیی کر.
د پەیاما سەرۆکێ هەرێما کوردستانێ دا هاتیە، کو ژ ٢٥ێ تەباخێ هەتا ٦ێ ئیلۆنا ١٩٨٨ێ، د قۆناغا داویێ یا پێلێن ئەنفالێ دا، رژێما وی دەمی یا عیراقێ خەلکێ سڤیل، ئاڤ، ئاخ، هەوا و ژینگەها دەڤەرا بەهدینان ب چەکێن قەدەغەکری کرە ئارمانج. سەرۆکێ هەرێمێ د ڤێ بیرانینێ دا ب رێز و حورمەت ڤە سەری بۆ گیانێ پاکێ شەهیدێن ئەنفالا بەهدینان و هەمی ئەنفالکریێن کوردستانێ دچەمینیت.
نێچیرڤان بارزانی ئاماژە ب وێ یەکێ کر کو ئەنفال تاوانەکا مەزن یا دژی مرۆڤایەتیێ بوو، کو ژ ئالیێ دادگەها بلندا تاوانێن عیراقێ ڤە وەک تاوانا جینۆساید، تاوانا شەر و تاوانا دژی مرۆڤایەتییێ هاتیە ناسکرن. ل سەر ڤێ بنەمایێ، سەرۆکێ هەرێمێ داخوازا خوە ژ حکومەتا فیدرالا عیراقێ دووپات کریە بۆ قەرەبووکرنا مالباتێن قوربانیێن ئەنفالێ و هەمی قوربانیێن تاوانێن رژێما بەرێ، هەڤدەم دیار کریە کو دڤێت بزاڤێن هەرێمێ بۆ ناساندنا ئەنفالێ ل سەر ئاستێ ناڤدەولەتی وەک جینۆساید د بەردەوام بن.
د بەشەکێ دی یێ پەیامێ دا، سەرۆکێ هەرێمێ رادگەهینیت کو دڤێت دیرۆکا پڕ ب تاوان و وێرانکرنا رابووری ببیتە پەند و دەرسەکا هەمیشەیی بۆ عیراقێ، دا کو رێ ل بەر دووبارەبوونا هەر جورە ستەمکاری و پێشێلکاریەکێ بهێتە گرتن و مافێن دەستووری یێن گەلێ کوردستانێ و هەمی پێکهاتەیان د پاراستی بن. ژ بۆ ڤێ یەکێ ژی، تەکەزیێ ل سەر ب هێزکرنا تەبایی، ئێکڕێزی، پێکڤەژیانا ئاشتیانە و هەڤکاریا د ناڤبەرا هەمی ئالیێن سیاسی دا دکەت، دا کو بشێن پاشەرۆژەکا ئارام و ئێمن بۆ گەلێ کوردستانێ مسۆگەر بکەن.
ل داویێ، سەرۆکێ هەرێما کوردستانێ وێڕای هنارتنا سلاڤان بۆ گیانێ پاکێ شەهیدان، ب رێز و پێزانین ڤە هەلوەستێ نیشتمانی و مرۆڤدۆستانە یێ خەلکێ هەولێرێ و دەوروبەران ب بیر ئینا، کو د رۆژێن دژوار یێن کەمپا جێژنیکانێ دا ب هەوارا لێقەومایێن بەهدینان ڤە چوون و هاریکاریا وان کرن.
