پەیوەندییا نهێنی یا واشنتۆن و تارانێ؛ ڕۆل و ناڤبەینكارییا نێچیرڤان بارزانی
سبەهی – بەشێ نووچەیان
ل سەروبەندێ ئاڵۆزی و توندبوونا گۆتارێن سیاسی ل ڕۆژهەڵاتا ناوەڕاست، زانیاریێن نوو دەربارەی بزاڤێن دبلۆماسی یێن نهێنی ل پشت پەردەیان ئاشکرا دبن. ل گۆڕەی ڕاپۆرتەکا ڕۆژنامەڤانی یا ئەمریکی، ئیدارەیا سەرۆکێ ئەمریکا دۆنالد ترامپ کەناڵەکێ پەیوەندیێ یێ گەلەک نهێنی دگەل سوپایێ پاسدارێن ئێرانی ڤەکریە، ل شوینا وێ کو پشتبەستنێ ل سەر کەناڵێن فەرمی یێن دیپلوماسی بکەت.
بێهێڤیبوون ژ دانوستاندکاران و پەنابرن بۆ پاسداران
گۆڤارا “ئەکسیۆس“ ل سەر زارێ ژێدەرێن ئاگەهدار و پلەبلند ئاشکرا کر کو ئیدارەیا ترامپی پشتی گومان ل سەر شیان و دەسەڵاتێن دانوستاندکارێن ئێرانی ل دور ب داویئینانا شەڕی بۆ پەیدابووین، بڕیار دا کو ڕاستەوخوە پەیوەندیێ ب ناڤەندێن بڕیارێ ل تارانێ بکەت.
ل گۆڕەی زانیاریێن ڕاپۆرتێ، دانوستاندکارێن ئەمریکی گەهشتبوونه وێ باوەرێ کو بەرپرسێن وەکی محەمەد باقر قالیباف (سەرۆکێ پەرلەمانێ ئێرانی) و عەباس عێراقچی (وەزیرێ دەروە یێ ئێرانی) خاوەن دەسەڵات و بریاردانەکا بهێز نینن بۆ ئیمزاکرنا چو ڕێککەفتنان. ژ بەر ڤێ چەندێ، واشنتۆنێ هەوڵ دا ب ڕاستەوخوە تێکەلییان دگەل سەرکردەیێن سوپایێ پاسدارێن ئێیرانێ بکەت.
نێچیرڤان بارزانی؛ ناڤبەینکارێ کلیل ل دەڤەرێ
ژ بۆ ئەنجامدانا ڤێ ئەرکێ ئاڵۆز و هەستیار، ئیدارەیا ئەمریکی پەنا بڕیە بەر نێچیرڤانبارزانی، سەرۆکێ هەرێما کوردستانێ. ئەڤ هەڵبژارتنە ژی ژ بەر وێ چەندێ هاتبوو کرن کو بارزانی ب پەیوەندیێن خوە یێن بهێز، هاوسەنگ و نێزیک دگەل بەرپرسێن پلەبلند یێن ئەمریکی و ئێرانی دهێتە نیاسین.
ڕاپۆرت ئاشکرا دکەت کو بارزانی جەخت ل سەر فەڕیا ئاخڤتنا ڕاستەوخوە دگەل ئەحمەد وەحیدی، فەرماندەیێ سوپایێ پاسداران کربوو. ل ١٤ێ گولانێ، بەرپرسەکێ سوپایێ پاسداران گەهشتبوو نڤیسینگەها بارزانی ل هەولێرا پایتەخت، کو ب تەلەفۆنەکا تایبەت و شیفرەکری هاتبوو، دا کو پەیوەندیەکا ئاڤا و پاراستی د ناڤبەرا تاران و واشنتۆنێ دا بکەت.
ڕەتکرنا پێشنیازا هەولێرێ ژ لایێ ئێرانی ڤە
چوارچۆڤێ ڤێ بزاڤا دبلۆماسی فرەهتر لێ هات، دەمێ کو واشنتۆنێ ژ سەرۆکێ هەرێما کوردستانێ خواستى کو مێڤاندارییا دانوستاندنێن نهێنی ل هەولێرێ د ناڤبەرا بەرپرسێن ئێرانی و ئەمریکی دا بکەت. بەلێ ل گۆڕەی ژێدەرێن “ئەکسیۆس”، لایەنێ ئێرانی ژ ئەگەرێن ئەولەهییێ (ئەمنی) پێشنیازا ئەنجامدانا دانوستاندنان ل هەولێرێ قەبوول نەکر.
ئەڤ زانیارییە ئاستێ رۆل و باندۆرا هەرێما کوردستانێ د هاوکێشەیێن سیاسی و تەئکیدکرنا ڕۆلێ هەولێرێ وەکی ناڤەندەکا سەقامگیر ل دەڤەرێ نیشان ددەت، هەرچەندە ئاڵۆزیێن د ناڤبەرا واشنتۆن و تارانێ دا هێشتا ڕووبەڕووی ئاستەنگێن مەزن دبن
