ل باشوور د بێژن کاک و ل باکور د بێژن هه‌ڤال
ده‌ما مرۆڤ ل مه‌دیا پەکەکێ و شوورکێشێن وێ دنێره ب دژمناتیا پەدەکێ و بارزانیان ده‌ست ڕۆژه‌ڤا خوه دکن و ب ئاوایه‌ک ده‌ره‌وین هه‌تا ئێڤارێ ڤێ یه‌کێ به‌رده‌وام دکن. “نڤیسکار و لێکۆلینه‌رێن” پەکەکێ ده‌ما به‌هسا پەدەکێ و بارزانیان دکن ئه‌و ب خوه ژی ب گۆتنن خوه نه باوه‌رن. لێ فه‌رمان وەسا ژ وان را هاتیه دان و ئه‌و مه‌جبورن وێ فه‌رمانێ ب جھ بینن.
ئه‌ڤ کارێ پەکەکێ یه و ئه‌رکا وێ یه کو دژمنا‌تایا هه‌موو هێزه‌ک کو خوه ل سه‌ر ڕێیا ده‌وله‌تبوونا کوردستانێ دبینه بکه. ژ بۆ پەکەکە بگەهه ئارامانجا خوه یا کو نه‌هێله ده‌وله‌تا کوردی ڕۆژه‌ک ژ ڕۆژا بێ ئاڤاکرن پەدەکە و بارزانییان وه‌ک ئاسته‌نگ دبینه.
ل ڤێ ده‌رێ پەکەکە، وه‌ک به‌ری نها ژی هاتی گۆتن، ئه‌رکا خوه ل دژی خه‌تا نه‌ته‌وی یا کوردستانێ پێکتینه. لێ پرس نه پەکەکە یه، پرس ئه‌ون یێن خوە رەوشونبیر، كەسایەتی و شرۆڤەكارێن سیاسیێن یێن سەربخوە دزانن و خوە وەك نه هه‌ڤالبه‌ندێن پەکەکێ ددن ناساندن، لێ هه‌ر گاڤا کو دەرفەتەكێ ببینن ب ڕێیێن جودا و ب ھەموو شیانێن خوە پشتگریا پەکەکێ دکن. ژ ئالیه‌ک دن ڤه ژی جار ب جار به‌هسا ده‌وله‌تبوونا کوردستانێ دکن. ئه‌و که‌س یان ژی که‌سایه‌تی ژ پەکەکێ خه‌ته‌رترن و دبن گەفەك مه‌زن ل سه‌ر ڕێبازا خه‌تا نه‌ته‌ویا کوردستانی. ئه‌و گرۆپ ل گۆر خوه دله‌یزن و خوه ژ هه‌ردو ئالان ژی نا‌قه‌تینن، لێ نزانن کو د ڕۆژه‌کێ هه‌م ژ ئالیی پەکەکێ ڤه ب خیانه‌تێ بێنه تاوانبارکرن و هێدی ب کێری چ ئالیه‌ک دن نایێن. ژ به‌ر کو پەکەکە ب گه‌له‌ک ئوستاهی ب که‌سایه‌تیا وان دله‌یزه و وان پووچ دکه و تاڤێژه.
ئه‌و که‌س ل باکور پەکەکە یینه و ل باشوور پەدەکە یی نه. بێ گومان د ڤێ خالا زیز دا دڤێت ڕه‌خنه‌یه‌ک ل پەدەکێ ژی بێ کرن کو ڕێ دده ڤان که‌سایه‌تێن کو د سیاسه‌تێ دا قورمچینه، هه‌ستییێ کو بکاربن سه‌رێ خوه پێ بلند بکن د لاشێ وان دا نه‌مایه و ئه‌و هه‌ر تم سه‌رشوورن.
گه‌له‌ک جارا ئه‌و گرۆپ خه‌لکه‌کی ب دژمنه‌تیا پەکەکێ ب ناڤ دکن و ددن خوویاکرن کو، ” چ کارێ وان نه‌مایه ته‌نێ دژمنه‌تیا پەکەکێ دکن”. گه‌لۆ مرۆڤ ژ ڤان که‌سێن دو روو یێن كو ھەر رۆژ ڕه‌نگێ خوه ل گۆرا که‌یفا خوه دگوهه‌رن دکاره چ بێژه؟ یه‌ک تشت هه‌یه كو ئەو كەسێن ب وی ئاوایی ته‌نێ خوه دخاپینن و هه‌ر گۆتنا ئەو دبێژن دێ ڕۆژه‌کی ده‌رکه‌ڤه پێشیا وان و سیاسه‌تا کو ئەو ل باشوور د بێژن کاک و ل باکور د بێژن هه‌ڤال دێ سه‌رێ وان بخوه.
ئیرۆ پەکەکە گه‌له‌ک ڤه‌کری خوه ژ بۆ شه‌رێ دژی پەدەکێ ئاماده دکه. پەكەکە ڕۆژانه دژمناتیا پەدەکێ و بارزانیان دكە و ئەو سژمناتی ژ خوە وه‌ک ستراته‌ژیه‌ك سیاسی دانایە، پەکەکە هه‌موو نربھا و پیرۆزیێن کوردستانێ ڕه‌د دکه و هه‌ول دده سه‌مبۆلێن کوردستانێ ژ هۆلێ ڕاکه و ناڤێ کوردستانێ بده ژبیر کرن. یان مرۆڤ هه‌ڤالبه‌ندێ ڤێ سیاسه‌تێ یه، یان ژی مرۆڤ ل دژه. ڕێیه‌ک دن نینە.
ئاشكەرا یە د ڤێ ده‌ما داویێ دا ل باکورێ کوردستانێ و ترکیێ به‌هسا هلبژارتنێن پارله‌مه‌نتۆیێ یێن پێشوه‌خت دھێتە کرن، پارتیێن سیاسی بخوە ل تفاقا دگه‌رن و هه‌ول ددن هه‌ر یه‌ک ژ ئالیێ خوه ڤه ده‌نگێن زێده بگرە و پرۆپاگانده‌یان دکن و ل تفاقا دگه‌رن. ئه‌ڤ یه‌ک بوویه ئەگەر كو جارەك دن سه‌یدڤانێن پارله‌مه‌نتۆیێ د ناڤا کوردان دا که‌تنه د ناڤا لڤینەكێ دا. هه‌ول ددن خوه ب هەدەپێ شرین بدن نیشاندان دا کو هەدەپە وان بکه بەربژێر ژ بۆ پارله‌مه‌نتۆیێ. ژ بۆ ڤێ یه‌کێ دژتیا پەدەکێ و خه‌تا نه‌ته‌وی دکن. ژ بۆ وان کو ئەو ببن پارله‌مه‌ته‌ر ژ هه‌ر تشته‌کی دن گرنگتره. به‌رژه‌وه‌ندیێن که‌سایه‌تی و ئه‌ڤینا پارله‌مه‌نتۆیا ترکیێ چاڤێن وان کور کریه.
ئه‌و وسا باوەر دكن کو ده‌ما ئەو دبن پارله‌مه‌نته‌ر ل باشوور ژی بهایێ وان زێده دبه و پتر دبن خوه‌دی قیمه‌ت. لێ که‌سایه‌تی نامینه. بهابوونا ڤان که‌سان ل باشوورێ کوردستانێ ئه‌نجامێ خه‌له‌تیه‌ک سیاسییه و دڤێت د ڤێ یه‌کێ دا بالا پەدەکێ بھێتە کشاندن و هه‌تا بھێنە ڕه‌خنه کرن.
سیاسه‌تا دوروو مالا کوردا خراب کریه و بوویه سه‌ده‌مه‌ک بنگه‌هین کو کورد ل سه‌ر ڕێیا نه‌ته‌وەیی د سیاسه‌تێ دا قه‌لس بن.
2020.09.13
