سیاسی

ل ترکیێ هلبژارتن و پرسا کورد

گه‌له‌ک جارا د ده‌ما هلبژارتنان دا به‌حسا پرسا کورد ل باکورێ کوردستنێ و ترکیێ تێ کرن. لێ د بنگه‌هێ خوه‌ دا هه‌ر ئالیه‌ک ته‌نێ وه‌ک پرۆپاگانده‌یا خوه‌ به‌حسا پرسا کورد دکه‌ و ل گۆرا بەرژەوەندیێن خوه‌ هنده‌ک تشتان تینه‌ رۆژه‌ڤێ. یانی هه‌ری زێده‌ کورد دبن ماتریالێ هلبژارتنا. تایبه‌تی ژی ده‌ما به‌رپرسێن پارتییان سه‌ردانا باژارێن کوردا دکن ئه‌ڤ پرس دکەڤە رۆژه‌ڤێ. یان د ده‌ما هلبژارتنان دا ته‌نێ ژ بۆ خاپاندنێ ڤێ پرسێ دکن رۆژه‌ڤ.

پارتیێن ترکان ڤێ دکن، لێ گه‌لۆ کورد چه‌وه‌ پێشوازیا داخوویانی و گۆتارێن پارتییان کو ب ئارمانجا پرۆپاگانده‌یێ ژ بۆ بده‌ستخستنا چه‌ند ده‌نگان دکن، چ دبێژن؟ ئه‌ڤ یه‌ک گرینگه‌. ژ به‌ر کو کورد، پرانی پرسا خوه‌ د چارچۆڤه‌یا کو ئالیێن سیاسییێن ترک داتینن هۆلێ دا گۆتوبێژێ دکن. ل باکورێ کوردستانێ کۆلانا و چایخانا دا گۆتوبێژا هه‌ری به‌رفره ل سه‌ر گۆتارێن سه‌رۆکێ پارتییان و به‌رنامه‌یێن کانالێن ته‌له‌ڤزیۆنا دا، مناقه‌شه‌یا رۆژنه‌مه‌ڤان و سیاسه‌تمه‌دارێن ئالیگرێن پارتییان تێ کرن.

مخابن ئیرۆ ل باکورێ کوردستانێ ئالیه‌ک کو ب هێز بکاربه‌ راستیا پرسا کورد بینە هۆلێ و د چارچۆڤه‌یا بده‌ستخستنا مافێن نه‌ته‌وی یێن کوردان دا، کێماسی ل باژارێن کوردان رۆژه‌ڤه‌ک سیاسی بئافرینه‌ نینە. سه‌ده‌مێ ڤێ یێ بنگه‌هین سیاسه‌تا کو پەکەکە و ده‌ردۆرا وێ رێڤه‌ دبن یه‌. پەکەکێ پرسا کورد خه‌تماندیه‌ و رێ ل هه‌موو جوره‌یێن داخوازیێن نه‌ته‌وی یێن کوردا گرتیه‌. کورد کرنه‌ دووڤکێ سیاسه‌ته‌ک چه‌پا که‌مالست و نه‌ته‌وه‌په‌ره‌ستێن ترک. ل باکورێ کوردستانێ هه‌تا ئه‌ڤ راستی تایبه‌تی ژ ئالیێ پارتی و رێخستنێن کوردان ڤه‌ نه‌یێ دیتن و ڤه‌کری به‌حسێ نه‌کن هه‌ول نه‌دن خه‌تماندنا کو پەکەکێ پێکانی ژ هۆلێ رانەکن ، چو جارا نکارن پێشیا خوه‌ ببینن. ئه‌ڤ راستیه‌که‌ ده‌ما ئه‌ڤ راستی نه‌یێ دیتن، هه‌ر ئالیه‌ک مه‌حکومە رۆژه‌کی بکه‌ڤه‌ ل دووڤ سیاسه‌تا پەکەکێ. ژ خوه‌ هه‌ر ده‌ما هلبژارتنان دا ئه‌ڤ یه‌ک ڤه‌کری تێ دیتن.

گه‌ره‌کە ژ بۆ کوردا نه‌ گۆتنێن رۆژانه‌ د قادێن پرۆپاگانده‌یێ دا تێن کرن بنگه‌ه بێ گرتن. ئه‌گه‌ر پارتییه‌ک یان ژی ئالییه‌ک سیاسی ل هەمبه‌ر پرسا کورد درووستبه‌ و خوه‌دی دیتنه‌کێ به‌، بلا د به‌رنامه‌یا خوه‌ دا ڤه‌کری جوره‌یێ چاره‌سریا پرسا کورد بکه‌ و دا کو ل گۆرا وێ ژی بێ نرخاندن.

گه‌له‌ک جاران، تایبه‌تی ده‌نگده‌رێن کورد کو ده‌نگێ خوه‌ ددن پارتیێن گرێدایی پەکەکێ (پارتیا که‌سک ئا چه‌پ) ده‌ما ژ وان تێ پرسین، دبێژن: “ ئه‌م دێ ده‌نگێ خوه‌ بدن خوه‌.“ لێ مخابن ده‌ما تو ژێ دپرسی تو کیی؟ که‌ر و لال دبن و به‌رسڤ نینە. یانی نکاره‌ بێژه‌ ئه‌ز کیمه‌. ئه‌گه‌ر بزانبه‌ ئه‌و کیه‌، ناسناما وی چیه‌ و ئه‌و چه‌وا دکاره‌ ژ بۆ مافێ خوه‌ یێ نه‌ته‌وی تێبکۆشە دێ ژ خوه‌ بزانبه‌ به‌رسڤا خوه‌ ژی بده‌. نکارن بێژن، ئه‌م کوردن، وه‌لاتێمه‌ داگیرکریه‌، ئه‌م ژ بۆ بکاربن ل وه‌لاته‌ک سه‌ربخوه‌ دا ژیانه‌ک ئازاد بژین تێدکۆشین. ئه‌م دۆزا مافێن خوه‌ یێن نه‌ته‌وی دکن.

چه‌ند رۆژ مان ژ هلبژارتنان را، دێ ده‌رباس ببه‌ لێ پرسا کورد وه‌ک خوه‌ بێ چارەسەری دمینه‌. گه‌ره‌ک هێزکرنا هه‌ستێن نه‌ته‌وی ئارمانجا یه‌که‌م به‌ و ئه‌م وه‌ک کورد کێماسی بکاربن خوه‌ ناسبکن.

Back to top button