پەیاما سەرۆکێ هەرێما کوردستانێ ب هەلکەفتا سالڤەگەرا ئەنفالێ
ئەڤرۆ ئەم ٣٨مین سالڤەگەرا ب ئێش یا هێرشێن رەش یێن ئەنفالا سالا ١٩٨٨ێ دکین. ئەو تاوانێن هۆڤانە یێن رژێما بەعس یا بەرێ یا عیراقێ ئەنجامداین، کو پتر ژ ١٨٢ هزار زارۆک، ژن، زەلام و گەنجێن بێگونەھ یێن کوردستانێ تێدا بوونە قوربانی. ئەنفال تەنێ تاوانەک نەبوو، بەلکو بزاڤەکا بێ ئەنجام بوو بۆ ژناڤبرنا تەڤاهییا گەلەکێ ئاشتیخواز، کو برینێن وێ هەتا نوکە ژی ل سەر جەستەیێ نیشتمانی د دیارن.
د ڤێ بیرانینێ دا، ئەم سەرێ رێز و حورمەتێ ل بەر گیانێ پاقژێ شەهیدان دچەمینین و سلاڤێن دلسۆزیێ بۆ مالبات و کەسوکارێن وان یێن خۆراگر دهنێرین. ل دووف بڕیارا دادگەها بلندا یا تاوانان یا عیراقێ، ئەم تەئکید دکەین کو بەرپرسیارەتیا حکومەتا فیدرال یا عیراقێ یە کو قەرەبوویا ماددی و مەعنەوی یا کەسوکارێن قوربانیان بکەت.
ل سەر ئاستێ نێڤدەولەتی، ئەم دێ د بزاڤێن خوە دا بەردەوام بین دا کو ئەنفال وەک جینۆساید بهێتە ناسین. وەک ئەرکەکێ مرۆڤی و نیشتمانی، ئەم دێ د پرۆسەیا لێگەرین و ڤەگەراندنا تەرمێن پاقژ یێن شەهیدان بۆ باوەشا وەلات کێماسیێ نەکن و هەر تشتێ ژ دەستێ مە بهێت دێ ئەنجام دەین، چونکی دڤێت خزمەتەکا زێدەتر پێشکێشی کەسوکارێن ئەنفالکریان بهێتە کرن.
د ڤێ بیرانینێ دا، تەئکید دکەین کو پاراستنا قەوارەیێ دەستووری یێ هەرێما کوردستانێ و دەستکەفتێن مە، تەنێ ب هەڤگرتن و کارێ هەڤپشک یێ هەموو ئالیێن سیاسی و پێکهاتەیان دبیت. ئەڤە مەزنترین وەفادارییە بۆ خوینا شەهیدان و گارانتییا پاشەرۆژەکا باشترە بۆ نەڤیێن مە کو ئەم ب هیڤی ڤە لێ دنێرین.
سلاڤ و رێز بۆ گیانێ پاقژێ شەهیدێن ئەنفالێ و هەمی شەهیدێن کوردستانێ.
نێچیرڤان بارزانی سەرۆکێ هەرێما کوردستانێ ١٤.٠٤.٢٠٢٦
