نڤیسار

پارتی ھاتیە دوورپێچ كرن

ل گۆر ھندەك ئامارێن ب دەست مالپەرا مە كەتنە دیار دبە كو پارتیا كاركەرێن كوردستانێ (پەكەكە) ئەڤە چەند سالە دگەل ھەڤالبەندێن خوە و دەولەتێن داگیركەر و ب تایبەتی تركیێ لێدخەبتن كو ھەرێما كوردستانێ و ب تایبەتی دەڤەرێن ب زۆنا پارتیێ تێن زانین، كۆنترۆل بكەن و ژ نشكاڤە گۆرزەك كوژەك ل پارتی بدن و قەوارەیا ھەرێما كوردستانێ ب سەر چەند كانتۆنەكان دا دابەش بكەن.

ئەگەر ئەم ل نەخشەیا پارێزگەھا دھۆكێ و بەشەك ژ پارێزگەھا ھەولێرێ بنێرن دیار دبە كو دەڤەرەك گەلەك بەرفرەھ كەتیە د بن كۆنترۆلا چەكدارێن پەكەكێ دا:

ل سەر ئاستێ ھەرێما كوردستانێ 658 گوند دبن دەستێ پەكەكێ دانە. ب تەنێ ئاخا پارێزگەھا دھۆكێ زێدەتر زێدەتر 34-36 % د بن دەستێ پەكەكێ دایە، 250 گوند ل دەڤەرا ئامێدیێ كو دكە 70% ئاخا وێ قەزایێ.

120 گوند ل دەڤەرا زاخۆ كە دكە 35% ئاخا وێ قەزایێ.

ل ئاكرێ 20 گوند.

ل مێرگەسۆر 150 گوند و ل ھەموو پارێزگەھا ھەولێرێ 200 گوند دگەل كامپا مەخموورێ.

ل شەنگالێ ژی دەڤەرەك باش د دەستێ وێ دایە. ئانكو ژ رۆژائاڤا ژ شنگالێ دەست پێ دكە بەر ب زاخۆ، ئامدیێ تا دگەھە رۆژھەلات ل دەڤەرا مێرگەسۆر و سیداكان، ب ڤی ئاوایی پەكەكێ پارتی دوورپێچ كریە.

  پشتی لھەڤھاتن دگەل تركیێ و دەستپێكرنا پێڤاژۆیا ئاشتیێ، پەكەكێ ھێزێن خوە ڤەكشاندن باشوورێ كوردستانێ، ب گوتنەك دن، پەكەكێ 60% ھێزا خوە یا چەكداری و جەبلخانەیا خوە ل باشوورێ كوردستانێ ب جھ كریە، كۆنسەیا سەرۆكاتیا وێ پارتیێ ھەموو ل باشوورە، یەك ئەندامێ كۆنسەیا سەرۆكاتیا پەكەكێ ل باكورێ كوردستانێ نینە كو ئەو بەش قادا راستەقینەیا خەباتا وێ یە.

گەلۆ پشتی پێڤەژۆیا ئاشتیێ  و چارەسەریێ د ناڤبەرا پەكەكێ و دەلەتا تركیێ دا  ل باكور  تێكچوو چما پەكەكێ ھێزێن خوە ژ باشوور نەڤەگەراندن باكورێ كوردستانێ مەیدانا خوە یا خەباتێ و ل وێ بەشێ خەباتا خوە بەردەوام بكە؟

گەلۆ ئەڤ ھێزا مەزن یا چەكداری دگەل ھەموو چەك و جەبلاخانەیێ ل باشوورێ كوردستانێ چ دكە؟

 ئەوا رۆژا ئیرۆ  دقەومە و تركیا ب ھێجەتا شەری تەرۆرێ باشوور داگیر دكە ژ ئەنجامێ وێ لھەڤھاتنا پەكەكێ و تركیێ یە.

چەند سالە پەكەكە ل ڤان دەڤەران ب كێفا دلێ خوە دكە، خالێن گۆمركێ ددانە و گۆمركێ ژ خەلكێ دەڤەرێ وەردگرە. ل ھندەك دەڤەران كانتون ئاڤاكرنە و گوھ نادە یاسا و رێسایێن حكومەتا ھلبژارتیا ھەرێما كوردستانێ. ل وان دەڤەران كو پرانیا ھەری زێدە ئەندام و دۆست و ئالیگرێن پارتیا دەمۆكراتا كوردستانێ نە، ب كێفا خوە وان دگرە، زیندانی دكە و درەڤینە و بێشوونوار دكە بەرزە دكە. ھەتا ڤێ كێلیكێ ژی پەدەكێ ل ھەمبەر ڤان كریارێن نەقانوونی و تێكدەرانە یێن پەكەكێ ھەلوەست نیشنان نەدەیا و تەحەمولا پەكەكێ كریە.

لێ مخابن ھندەك كەس كو خوە ب بێلایەن و چاڤدێرێن سیاسیێ بناڤ دكن، ل ھەمبەر ڤان كریار و پیلانێن پەكەكێ و تركیێ ژ بۆ تێكدانان قەوارەیا قانوونیا ھەرێما كوردستانێ چاڤێن خوە دگرن و ڤی ھەلوەستێ نەتەوەیی، وەلاتپارێزی و كوردپەروەرانە یێ پارتیا دەمۆكراتا كوردستانێ  نابینن و ھەر دەما تركیا ئێریشی سەر باشوور كر دەڤێ وان ڤەدبە و ب ئاوایەكی نە واقعی و ئێریشی سەر پەدەكێ دكن و وێ ب تەنێ تاوانبار دكەن.

وەرن دا ئەم ب چاڤێن ڤەكری، مەژیەكێ پاقژ، وژدانەكا ساڤی ب ھەستەكا نەتەوەیی خالا دەینینە سەر حەرفان :

  1. ئەڤە زێدەتر ژ دەھێ سالانە پارتیا كاركەرێن كوردستانێ ل ڤان دەڤەران كو ب زۆنا پارتی تێ ب ناڤ كرن ب  یا خوە دكە و گوھ نادە یاسایێن ھەرێما كوردستانێ و پارتی دەنگ ناكە.
  2. خەلكێ وێ دەڤەرێ كو پارتینە دگرە و زیندانی دكە و درەڤینە و بێشوونوار دكە و پارتی دەنگ ناكە
  3. زارۆكێ خەلكێ ب دارێ زۆرێ دەبە چیا، مەژیێ وان دشۆ و چەكدار دكە و پارتی دەنگ ناكە
  4. خالێن گۆمركێ دانینە و پەرەیان ژ خەلكێ دچن سەر گوندێن خوە وەردگرە و پارتی دەنگ ناكە
  5. ب ناڤێ كانتۆنان ئیدارە د ناڤ ئیدارەیا ھەرێما كوردستانێ دا ئاڤاكرنە پارتی دەنگ ناكە
  6. خوەپیشاندانان دژی تركیێ دكە و وێنەیێن ئۆجەلان و سلۆگانێن دژی تركیێ بلند دكە  و پارتی دەنگ ناكە
  7. خوەپیشاندنان دژی ھەرێما كوردستانێ  دكە و سلۆگانێن ژناڤبرنا حكومەتا كوردستانێ بلند دكە و پارتی دەنگ ناكە

پەكەكێ ھەموو لڤ و تەڤگەر و چالاكیێن خوە ھەر بگرە ژ چالاكیێن چەكداری، جڤاكی، ھونەری و رەوشەنبیری…ھتد  ژ باكور ڤەگوھازتینە  باشوورێ كوردستانێ، گەلو كەسەك دكارە میناك ھوسا كو ل جھانێ ھەبە بەرچاڤ بكە.

د سەر ڤێ یەكێ ھەموویێ را پارتی چەند سالە تەحەمولێ دكە و دگەلەك واران دا ئالیاكاریا پەكەكێ ژی كریە و دكە، لێ ھێشتا پارتی تاوانبارە؟

ل گۆر یاساییێن ناڤدەولەتی، مە بڤێت نەڤێت، پەكەكە د لیستەیا تەرۆرێ دایە، ئەگەر حكومەتا ھەرێما كوردستانێ و دەلەتا عیراقێ ل دژی پەكەكێ دەرنەكەڤن و وێ ژ باشوور دەرنەخن، یاسایێن ناڤدەولەتی ماف ب تركیێ ددە كو ھەر دەما بخوازە ب ھێجەتا شەرێ تەرۆرێ دەرباسی باشوور ببە، ڤێ یەكێ دوور و نێزیك چ تێكەلی ب ھەرێما كوردستانێ و ب پارتیێ ڤە نینە.

Nasrat Hacî

2020.06.24

Back to top button