پەیاما نەورۆزێ یا سەرۆک نێچیرڤان بارزانی

جەژنا نەورۆز و سەرسالا نوو یا کوردی گەلەک ب گەرمی و ژ دل ل مالباتێن سەربلندێن شەهیدان، ل گەلێ کورد و تەڤایا گەل و پێکهاتە و پێشمەرگە یێن مێرخاس یێن کوردستانێ پیرۆز دکم. هێڤیدارم هەموو ب هەڤرا دگەل خوەشتڤی و عەزیزێن خوە جەژنەکا ب خوەشی د ناڤ  ئارامی و  سەقامگیریا  کوردستانی دا دەرباس بکن.

داخوازێ ژ  وەلاتیێن عەزیز دکم کو د دەما دەرکەتنا دەرڤە و گشت و سەیرانێن ناڤ خوەرستێ جوانێ کوردستانێ دا، هندی ژ وان بێ پێگیریێ ب پاقژی و بژینیێ و پاراستنا ژینگەها دلڤەکەر یا بەهارا وەلاتی بن و خوەپارێزی و رێنماییێن ساخلەمیێن ل بەر چاڤان بگرن.

نەورۆز کو جەژنا ئازادی و نیشانا بەرهنگاربوون و باوەری بخوە هەبوونێ یە، سالا نوو و نووبوونە، ل سەر ئاستا تاک و کەسی، بلا پالدرا نووبوونا هزر و رامانێن مە هەموویان بە و بکەینە دەستپێکەک نوو ژ بۆ ژیان و تێکەلیێن مە، ژ بۆ ئاشتی و هێڤی و گەشبینیێ و ژ بۆ چەوانیا معاملەکرن  دگەل پێشهات و بوویەرێن دەردوورا مە دا.

ل سەر ئاستا گشتی ژی، ژ هەموو دەمان زێدەتر ئەرکێ هێز و ئالیێن سیاسی و پێکهاتەیێن کوردستانێ  ب گشتی یە کو یەکرێز و هەڤگرتی بن و ب هەڤبەشی ب هەڤرا ژ بۆ هندێ ئەم هەموو ب یەکگرتی رووبروویێ دژواری و گەفان ببین و ب سەرکەفتی ژێ دەرباس ببین کار بکین.

 پاراستنا ماف و دەستکەفتیان و قەوارەیێ دەستووری و سیاسی یێن هەرێما کوردستانێ، وەک کا چەوا بەرهەمێ تەکۆشینا هەموو کوردستانیان نە، ئها وەسا ژی بەرپرسیاریا هەڤبەشا مە هەموویانە ژ بۆ هندێ ب هەڤرا بەر ب پاشەرۆژەکا باشتر و رۆناهیتر ب دلرەحەتی پێنگاڤان باپێژین و سەربکەڤین.

د ڤێ هەلکەفتێ دا  جارەکا دن تەکید دکن کو هەرێما کوردستانێ وەک هەرتم بەرهەڤە هەموو پرسگرێکان و ناکۆکیان دگەل حکومەتا فەدەرال یا ئیراقێ ب دیالۆگ و ل گۆر دەستوورێ چارەسەر بکە،  هەرێما کوردستانێ، وەکە هەرتم،  ژ بۆ پرسگرێکێن ئیراقێ فاکتەرێ چارەسەریێ دبە و ژ بۆ ئارامی و سەقامگیریا وەلاتی ، ئالیکار و هەڤکار دبە.

هەر ل ڤر، ژ کوردستانا لێبۆرین، هەڤقەبوولکرن و پێکڤەژیانێ رێز و سلاڤێن نەورۆزێ و بهنێن بەهارێ، ژ بۆ گەلێن ئیراق و هەرێمێ، جیهان و دوستێن گەلێ کوردستانێ ل هەر دەرا لێ بن، هەروەسا ژ بۆ نەتەوەیێن یەکگرتی  کو جەژنا نەورۆزێ کریە رۆژەکا ناڤدەولەتی دنێرین و دگەل هەموویان ژ بۆنا ئارامی، سەقامگیری و ئاشتیێ دا کار دکین.

نەورۆز ل هەموویان پیرۆز بە و هەموو سالان بخوەشی بە.

نێچێرڤان بارزانی

سەرۆکێ هەرێما کوردستانێ 

٢٠ێ ئادارا ٢٠٢٢