چما باشاک دەمرتاش خوە ژ بەربژێریا ستەنبۆلێ ڤەکشاند
ل ترکیێ هلبژارتنێن هه‌رێمی نێزیک دبن و هەولدانێن چێکرنا هه‌ڤکاری و تفاقان ژی گەرم دبە، ب تایبەتی ل سەر باژارێ مەزن ستەنبۆلی.
ژ بۆ جەهەپە ستەنبۆلێ وندا نه‌که د ناڤا هه‌ولدانه‌ک مه‌زن دا یه. هه‌روه‌ها ژ بۆ ئاکەپ ژی ستەنبۆلێ بستینه هه‌موو ڕێیه‌کێ دجه‌ربینه. هه‌ردو ئال ژی ژ بۆ سه‌ربکه‌ڤن پێوستیا وان ب هنده‌ک هەڤپەیمانان هه‌یه. د ڤێ پێڤاژۆیێ دا ئاکەپ ب هه‌می ئاوایی هه‌ولدده پارتیا ڕه‌فاهێ ڕازی بکه و ل ستەنبۆلێ به‌ربژێرا ده‌رنه‌خە و هه‌روه‌ها نه ب ئاشکرایی ژی بە ئاکەپ دخوازه ده‌م پارتی به‌ربژێره‌ک ب هێز بۆ ستەنبۆلێ ده‌ستنیشان بکه.
جەهەپە هه‌ولدده کو، ل گه‌ل ده‌م پارتی تفاقێ بکه. هه‌ردو ئالیان ژی گه‌له‌ک هه‌ڤدیتن کرن و دان خوویاکرن کو، ئه‌و ڤێ جارێ لهه‌ڤهاتنه‌کی بکن دێ ب ئاشکه‌ره‌یی بکن و ژ رایا گشتی را راگەهینن. ژ به‌ر کو هلبژارتنێن سه‌رۆککۆماریێ دا هەدەپێ بێ قه‌ید و شه‌رت پشتگریا جەهەپێ کربوو. لێ ڤێ یه‌ک پشتی هلبژارتنێ پۆشمانیه‌ک د ناڤا هەدەپێ دا په‌یدا کر و گه‌له‌ک هاته مناقه‌شه‌کرن ژی.
ل ستەنبۆلێ ده‌م پارتی بریار دا کو دێ به‌ربژێره‌کی ده‌ستنیشان بکە. ژ بۆ ڤێ ژی باشاک ده‌مرتاش سه‌ری ل پارتیێ دا کو ببه به‌ربژێرا دەم پارتیێ ژ بۆ ستەنبۆلێ. د وێ ناڤبه‌رێ دا پەرله‌مه‌نته‌رێ ده‌م پارتیێ سری ساکیک سه‌ردانا سه‌لاحەدین ده‌مرتاش د گرتیگه‌هێ دا کر. پشتی سه‌ردانا خوه ساکیک داخوویانیه‌ک گه‌له‌ک کورت دا و گۆت: ده‌مرتاش گۆتیه نه‌بن پشپالا (دووڤێ) که‌سه‌کی. وندابوونا د هلبژارتنێن گشتی دا روودایی ته‌لاف بکن. تشته‌ک دن ژ ده‌ڤێ ده‌مرتاش نه‌هات گۆتن. به‌ربژێریا باشاک ده‌مرتاش ژی نه‌هات په‌ژراندن و باشاک خانم دا خوویاکرن کو، وێ خوه ڤه‌کشاندیه.
باشاک خانم داخوویانیا خوه دا گۆت: مه دگه‌ل ناوه‌ندا پارتییا خوه هه‌ڤدیتن کرنه و هه‌موو بریار ب هه‌ماهه‌نگیا من و پارتییا من هاتنه داین. د ڤێ داخوویانیێ دا باشاک خانم راستیا مەسەلێ نه‌دا دیارکرن. ژ به‌ر کو ده‌مێ به‌ربژێریا وێ نه‌په‌ژراند و ژێره گۆتن خوه بده ئالیه‌کی. ئه‌ڤ د مه‌دیایێ دا بوو بابه‌تێ نرخاندنێن جودا و هه‌مان ده‌مێ دا د ناڤا ده‌م پارتیێ دا بوو ئەگەرێ نه‌خوه‌شیه‌کی و که‌سێن د ناڤا ده‌م پارتیێ دا ئالیگرێن ده‌مرتاشن عاجز بوون.
باشاک خانم نه‌کاری راستیا خوه بێژه و ب زمانه‌ک دن باشاک خانم ژ ئالیێ نوونه‌رێن قه‌ندیلێ ڤه هاته ته‌هدید کرن.
د ڤێ ناڤبه‌رێ دا جاردن دو پەرله‌مه‌نته‌رێن ده‌م پارتیێ ژ بۆ کو سه‌لاحەدین چو به‌رته‌کان نیشان نه‌ده سه‌ردانا گرتیگه‌هێ کرن و بالا ده‌مرتاش کشاندن. پەرله‌مه‌نته‌رێ ده‌م پارتیێ یێ ئەنتالیا، مه‌همه‌ت روشت تریاک، و پەرله‌مه‌نته‌رێ باتمانێ، ساروهان ئۆلوج، سه‌ردانا سه‌لاحەدین ده‌مرتاش کرن و پشتی سه‌ردانا خوه ژ ده‌ڤێ ده‌مرتاش داخوویانیه‌ک دان و گۆتن: “رێزدار باشاک ده‌مرتاش ئیرۆ داخویانیه‌ک دا و دیار کر کو بەربژێریا خوه ڤه‌کشاندیه. ئه‌م دخوازن هوون بزانن کو ئه‌ڤ هه‌موو بریار د چارچۆڤه‌یا زانینا پارتیا مه دا و د ئه‌نجاما گۆتووبێژێن هه‌ڤبه‌ش دا هاتنه گرتن. د ڤێ مژارێ دا په‌یامه‌کا وی (سه‌لاحەدین ده‌مرتاش) پر زه‌لاله هەیە. ئه‌م دخوازن وێ ب وه را پارڤه بکن. تشتا کو ده‌میرتاش گۆت ئه‌ڤه: داخویانیا نامزه‌دیێ یا باشاک ژ بۆ خورتکرنا پارتییا مه بوو و داخویانیا وێ یا ڤه‌کشینێ ژی ب ئاگاهیا پارتییا مه بوو.“ ئه‌ڤ هه‌موو پێڤاژۆ ب هه‌ڤ را هاتنه مه‌شاندن، دڤێ گه‌لێ مه بزانه، گه‌لێ مه ژ مه باوه‌ر بکه، ئه‌م دزانن ئه‌م چ دکن.“
د ڤێ مژارێ دا سه‌لاحەدین ده‌مرتاش، مخابن، راستیا ناڤه‌رۆکا هه‌ڤدیتنا خوه و پەرله‌مته‌رێن ده‌م پارتیێ نابێژه. تشتا کو گۆتنێ دڤێ تو بێژی وێ دبێژه. راسته د ناڤا ده‌م پارتیێ دا پشتگرێن ده‌مرتاش گه‌له‌کن، لێ نابە کو ئه‌و ژی پشتگرێن خوە بخاپینه.
ژ ئالیه‌ک دن ڤە، د ڤێ پێڤاژۆیێ دا کەسێ به‌حسا هه‌لوه‌ستا قه‌ندیل و داخوویانیا ئه‌ندامێ کۆنسه‌یا سه‌رۆکاتیا پەکەکێ موستافا کاراسو نه‌کر. موستافا کاراسو د داخوویانیه‌کێ دا به‌حسا گرنگی و به‌رده‌وامیا تفاقا هەدەپێ و جەهەپێ کر. کاراسو به‌شه‌ک ئاخاڤتنا خوه یا کو، د مه‌دیایا پەکەکێ دا کری دبێژه: “ل ترکیێ کورد و عه‌له‌وی دو هێزێن ده‌مۆکراتیک و دینامیکن. ته‌کۆشینا وان یا هه‌ڤبه‌ش ژ بۆ ده‌مۆکراسیێ پێوسته. دڤێ د ڤان هلبژارتنان دا گوه بدن هه‌ڤ. دڤێ هه‌ر که‌س د ده‌ربارێ تفاقێ دا هه‌ستیار به. پێوسته ئه‌ڤ ته‌کۆشین ئاوایه‌ک هه‌ڤبه‌ش و ب خۆرتکرنا تفاقان و هه‌مبێزکرنا تفاقێن هه‌یی به‌رده‌وام به. هنده‌ک ئالی دخوازن ڤان تفاقان خراب بکن. دڤێ گه‌لێ کورد گوه نه‌ده وان. ئه‌و ئالیێن تفاقان خراب دکن نه دۆستێن کوردانه. ئه‌و ده‌مۆکراتیکبوونا ترکیێ ناخوزن.“
جاردن بریار هه‌ر بریارا قه‌ندیلێ یە، ئه‌ڤ هه‌لوه‌ستا قه‌ندیلێ شکاندنا سه‌لاحەدین ده‌مرتاشه و به‌رده‌وامیا هه‌لوه‌ستا قه‌ندیل یا دژاتیا ده‌مرتاش بخوه‌یه کو، ده‌ما چالاکیا چه‌کدارێن پەکەکێ ل مه‌زتلیا مه‌رسینێ چێبوویی، ده‌مرتاش ئه‌ڤ چالاک شه‌رمه‌زار کربوو و قه‌ندیل هه‌لوه‌سته‌ک توند ل هەمبه‌ر ده‌مرتاش نیشان دابوو و ئه‌و نه ب شۆره‌شگه‌ری ئیتیهام کربوو.
ئیرۆ سیاسه‌تا کو ده‌م پارتیێ به‌ر ب کوردبوونێ ڤه دبە، جاردن ژ ئالیێ قه‌ندیل ڤه هاته ئاسته‌نگکرن.
ره‌وش ئه‌ڤه کی چه‌وا دنرخینه ئازاده. لێ د نرخاندنان دا دڤێ هه‌لوه‌ست هه‌به، ئیستیقرار هه‌به، گۆتنا ئیرۆ تێ گۆتن سبه‌هی نه‌یێ ئینکار کرن.
د سیاسه‌تێ دا ده‌ما مرۆڤ دکه‌ڤە دووڤ کاروانه‌کی گه‌له‌ک زه‌حمه‌ته کو رێیا خوه بگوهه‌رە، ژ به‌ر کو هه‌ڤسارێ د ده‌ستێ خه‌لکه‌ک دن دا ئارمانجا ته ژی دده دیار کرن. هه‌تا هه‌ڤسارێ ده‌م پارتیێ د ده‌ستێ چه‌پێن ترکێن که‌مالیست دا به، بلا که‌سه‌ک به‌حسا کوردبوونا وان ژی نه‌که. ئه‌گه‌ر هنده‌ک که‌س یان ژی ئالی دخوازن ده‌م پارتیێ به‌ر ب کوردبوونێ ڤه ببن و سیاسه‌ته‌ک کورده‌واری رێڤه‌ببن بلا هه‌ولبدن هه‌ڤسارێ وان ژ ده‌ستێ که‌مالیستان ده‌رێخن.
٢٠٢٤.١.٨
نێرین/شرۆڤه
ن. فرات
