رۆژنامه‌یا زی گاردیان، کو یه‌ک ژ ڕۆژنامه‌یێن سه‌ره‌کی یێن ئینگلیستانێ یه ئیدیعا کر کو، پشتی ترکیێ ئه‌ندامەتیا سوێدێ یا ناتۆیێ په‌ژراند، کوردێن ل سوێدێ خوه د ناڤ خه‌ته‌رێ دا دبینن.
د نووچه‌یێ دا تێ گۆتن، “کورد دفکرن کو سه‌رکه‌فتنا دیپلۆماسیا ستۆکهۆلمێ زرارێ دده وان و ب ئاوایه‌کی سیسته‌ماتیک دبن ئارماجا ده‌وله‌تا سوێدێ”. ل گۆر ڕۆژنامه‌یا گاردیان، ل سوێدێ ٥۰ هه‌تا ۱۰۰ هه‌زار نفووسا کوردان هه‌یه. پرانیا ڤان که‌سان ژ ترکیێ، ئیراق، ئیران و سووریێ هاتنه سۆێدێ.
د نووچه‌یێ دا نرخاندنێن نڤیسکار کوردۆ باکسی کو ب نێرینێن خوه یێن ل دژی ترکیێ تێ ناسکرن، هەنە. نڤیسکارێ ٥۸ سالی وها دبێژە: “من ل سوێدێ ده‌مه‌ک وسا دژوار ده‌رباس نه‌کریه“.
پشتی پێڤاژۆیه‌ک ب ناکۆک، مه‌جلسا مه‌زن یا ترکیێ د ۲۳ێ چله‌یێ دا پێشنوومه‌یا ئه‌رێکرنا ئه‌ندامەتیا سوێدێ یا ناتۆیێ قه‌بوول کر. به‌ری ڤێ یه‌کێ ترکیێ ژ سوێدێ دخوه‌ست کو د چارچۆڤه‌یا تێکۆشینا ل دژی ته‌رۆرێ دا پێشی ل چالاکیێن پەکەکێ و فه‌تۆ بگره. سوێد ژی قانوونێن خوه یێن ل دژی ته‌رۆرێ ل گۆر وێ توندتر کرن. ئه‌نقه‌ره‌یێ هه‌روها داخواز کر کو پێڤاژۆیا ئه‌ندامەتیا یه‌کیتییا ئه‌ورۆپایێ (یه) ژ نوو ڤه بێ ده‌ستپێکرن و چالاکیێن شه‌وتاندنا قورانێ، کو ژ ئالیێ وه‌لاتێن مسلمان ڤه ڕاستی به‌رته‌کێن مه‌زن هاتن، بێن قه‌ده‌خه‌کرن.
رێڤەبەرێ ئه‌نستیتویا لێکۆلینێن ترکی یا زانینگه‌ها ستۆکهۆلمێ پائول ت. له‌ڤین ژی وەها دبێژە: “ته‌ڤی کو پەکەکە ژ سالێن ۱۹۸۰ئی و ڤر ڤه ل سوێدێ وه‌ک ڕێخستنا ته‌رۆرێ تێ ناسین، ڕایه‌دارێن سۆێدێ، ل گۆر گه‌له‌ک وه‌لاتێن دن یێن ئه‌ورۆپایێ، ل هه‌مبه‌ر ڕێخستنێ تۆله‌رانسترن”.
ل ئالیێ دن د نووچه‌یێ دا هات ئیدیعاکرن کو سازیا ئه‌وله‌کاریا ناڤخوه‌یی یا سوێدێ، پۆلیسێ ئه‌وله‌کاریێ (سێپۆ) ژ بۆ کو ئه‌رێکرنا سه‌رۆککۆمار ڕه‌جه‌پ تەیب ئه‌ردۆگان ب ده‌ست بخه، کوردان ژ نێزیك ڤه دشۆپینه. هه‌روه‌ها هات ئیدیعاکرن کو حکومه‌تا ستۆکهۆلمێ هه‌سابێن بانکایێن کۆمه‌له‌یێن کوردان گرتیه و هندەك په‌نابه‌ر ژ ئالیێ سێپۆ ڤه هاتنه لێپرسین و ده‌ستوورا ڕوونشتنێ یا هنده‌ک په‌نابه‌رێن کورد ژی هاتیه به‌تالکرن.
كەردو باکسی گۆت کو ٤۲ په‌ناخوازێن ل سوێدێ دژین ب وی را تێکلی دانینه و سێپۆ ژ بۆ به‌تالکرنا ده‌ستوورا ڕوونشتنا وان ڕاپۆره‌ک ئه‌وله‌هیێ پێشکێشی ده‌زگه‌هێن ده‌وله‌تێ کریه.
ژ ئالیێ دن ڤه د داخویانیا کو سێپۆیێ ژ گاردیانێ را شاندیه تێ گۆتن کو سێپۆ چو کێمنه‌ته‌وه و ئه‌تنیکان ناكە ئارمانج و دبێژە: “د چارچۆڤه‌یا خه‌باتێن خزمه‌تا خوه دا، ئه‌م چالاکیێن ڕێخستنێن کو ژ ئالیێ ڕێخستنێن ناڤنه‌ته‌وی وه‌ک یه‌کیتییا ئه‌ورۆپا و نه‌ته‌وه‌یێن یه‌کبوویی ڤه وه‌ک کۆمێن ته‌رۆریست تێن پێناسه‌کرن دکن ئارمانج. یه‌ک ژ ڤان ڕێخستنان پەکەکە یه”.
د داخویانیا دائیره‌یا پەنابەران. یا سوێدێ دا تێ گۆتن کو سه‌رلێدانێن په‌نابه‌ری و هه‌موه‌لاتیبوونێ ل گۆر قانوونێ تێن لێکۆلینکرن و “ژ پێڤاژۆیا سیاسی سه‌ربخوه تێن کرن”.
ئی پ
