هەڤدیتنا عەبدولا ئۆجەلانی یا ل ڕێکەفتی ٢٨ێ نیسانا ٢٠٢٦ێ هاتە ڕاگەهاندن. ئەڤ هەڤدیتنە د مەدیایێن نێزیکی پەکەکێ دا ب زمانێ ترکی هاتبوو بەلاڤکرن. مە ژی ئەڤ یەکە وەک خوە وەرگێڕا سەر زمانێ کوردی و ئەم بەلاڤ دکەین.
هەڤدیتنا ئۆجالانی ب ڤی ڕەنگی هاتیە بەلاڤکرن:
بەشێ دوویێ یێ نڤیسینێن هەڤدیتنا عەبدولا ئۆجەلانی ل “ئیمرالی”، کو ژ لایێ ئاژانسا (سۆر) ڤە ب سەرناڤێ (٢٨ نیسانا ٢٠٢٦ێ راپۆرتا تایبەت یا مەحموود ئۆرال هاتیە بەلاڤ کرن.
چەند تەوەرێن سەرەکی د ناڤ خوە دا دگریت:
- ڕەوشا تەندروستی یا وی
- پێشڤەچوونێن ل ڕۆژئاڤا
- پێڤاژۆیا بەردەوام دگەل دەولەتێ
- ڕەخنە ل سەر قەندیل و پارتییا دەم
- داخویانیێن توند ل سەر خەتا بارزانی
- هەڤسەنگییا سیاسی ل ڕۆژهەلاتا ناڤین
.ئەم دێ دڤێ خەلەکێ دا دیتنێن وی یێن ل سەر رێبازا بارزانی و نەتەوەپەرستییا کورد وەشینن
ڕەخنەیێن توند ل سەر ڕێبازا بارزانی:
ئۆجەلان ئیدیعا کر کو بارزانی بزاڤێ دکەت خوە ل سووریێ ب هێز بکەت و گۆت:
“بارزانی، چەوا هەولێرێ ب ڕێڤە دبەت، دخواست ل سووریێ ژی هەبوونەکا مینا یا هەولێرێ پێکبینیت. ئەمریکا و ئیسرائیل ژی د ڤێ مژارێ دا قەناع کربوون. ترکیا ژی یا نێزیک بوو کو بکەڤیتە د ڤێ داڤێ (خەفکێ) دا.”
ئۆجالان ئیدیعا کر کو د حوزەیرانا ٢٠٢٤ێ دا ب پشتەڤانییا ئەمریکا و ئیسرائیلێ پلانەک هەبوو. لێ ئۆجەلان دبێژیت کو وی هەڤدیتنەک دگەل مەزلووم عەبدی کر و دژایەتییا خوە بەرامبەر وێ پلانێ بۆ وی دیار کر. ئۆجەلانی د ڤێ دەربارێ دا گۆت:
“من گۆت دێ بارزانی و ئیسرائیل ببنە هێزا سەرەکی ل سووریێ. ئەز ب ئاشکرا ل دژی وێ راوەستام. من نەڕازیبوونا خوە دیار کر و داخواز کر کو عەبدی خوە ژ ڤێ یەکێ ڤەکێشیت. عەبدی گوهـ ل من گرت و پلانا وان پووچ دەرکەت.”
ئۆجەلانی ل دۆر بارزانی هەلسەنگاندنێن خۆ بەردەوام کرن و گۆت:
“من بەری نوکە دگەل بەرپرسێن پەیوەندیدار ئاخاڤتن کریە. من گۆتبوو کو ئەز سەردانا بارزانی بۆ جەزیرێ ب مەترسی دبینم. دەرکەفتنا وی ب چەکدارێن وی ڤە نە سەردانەکا ئاسایی بوو؛ مەرەما وی یا ڕاست ئەوە کو پەیامەکێ بۆ من بنێریت. من ئەو ل سەر تەلەڤیزیۆنێ دیت و من بەرپرس هایدار کرن. ب ڤی هەلوەستی، ئەو دخوازیت بێژیت: ‘ئاپۆ کییە؟ ئەڤ جهە یێن منن.’ ئەز ڕێ نادەم ئەو وێ کەیفێ ب دەست بێخیت. وەک چەوا من بەری نوکە ژی گۆتی، تورەبوونا من گەهشتیە خالەکا مەترسیدار.”
ئۆجەلانی، کو ڕێبازا بارزانی وەک “عەشایەری، مالباتی و دەستهەلاتداری” ب ناڤ کر، ئیدیعا کر کو ئەو ژ مێژە و هەتا نوکە ل دژی ڤێ ڕێبازێ شەڕی دکەت:
“چل سالە بارزانی ل دژی من سیاسەتەکا عەشایەری، مالباتی و دەستهەلاتداریێ بڕێڤە دبەن. پشتی کو ئەڤ پێڤاژۆیە ب دوماهی بهێت، دێ هەر کەس بینیت کا ئەز دێ چ جۆرە تێکۆشانەکێ ل دژی وان بکەم.”
“دڤێت نەتەوەپەرستێن کورد بهێنە ئاستەنگکرن”
ئۆجەلان دەربارەی گەنگەشەیێن ل سەر نەتەوەپەرستییا کوردی هەلسەنگاندنێن گرنگ کرن و گۆت:
“وەک چەوا خانم پەروینێ بەری نوکە بەحس کری، دڤێت ئەو نەتەوەپەرستێن کورد یێن دخوازن خوە ژ نوو ڤە ڕێکبخەن، بهێنە ئاستەنگکرن. ئەز وسا دبینم کو ئەڤ ڕێبازە (خەتە) ب ڕێیا کەمال بورکایی و ئیبراهیم گوچلو دهێتە بڕێڤەبرن. حەمڕەش ڕەشۆ هەبوو؛ ئەو ئالیگرێ بارزانی بوو، وی مستەفا بارزانی وەک ڕێبەرێ خوە ددیت. وی چەند زمان دزانین و بەرەڤانی ل خوەسەریا کوردان دکر. من ل شامێ ل دژی وی ژی شەڕ کر.”
تێبینی: هەموو هەڤدیتنا وی دێ د دەمەک نێزیک دا هێتە وەشاندن
