رۆژا پێنجشەمبی ٢٠٢٦/٥/١٤ ب ئامادەبوونا نێچیرڤان بارزانی، سەرۆکێ هەرێما کوردستانێ و فەرماندەیێ گشتی یێ هێزێن پێشمەرگەی، ڕێورەسمێن دەرچوونا خولا (سیهێ) یا پێگەیاندنێ ل کۆلێژا سەربازییا دو ل زاخۆیێ هاتنە ئەنجامدان.
د ڕێورەسمێ دا، کو ب ئامادەبوونا وەزیرێ کاروبارێن پێشمەرگەی و ژمارەکا پلەدارێن پێشمەرگەی ئامادەبوو، (٣٥٩) ئەفسەرێن گەنج یێن هەرێما کوردستانێ کو هەلگرێن باوەرنامەیا بەکالۆریۆسن، پشتی ب دوماهیئینانا (٩) مەهێن خاندنا سەربازی، ئەکادیمی و پراکتیکی، باوەرنامەیا دەرچوونێ وەرگرت و چوونە د ناڤ ڕێزێن وەزارەتا کاروبارێن پێشمەرگەی دا.
ل دوماهیا ڕێورەسمی، سەرۆک نێچیرڤان بارزانی پەیڤەک پێشکێش کر و د ناڤ دا وێڕای پیرۆزباهیێ ل دەرچوویان و مالباتێن وان، رۆناهی ئێخستە سەر پێگەهێ یاسایی و نیشتمانی یێ پێشمەرگەی و بارودۆخێ سیاسی یێ عێراقێ و پێشهاتێن دەڤەرێ. ئەڤە ژی دەقێ وێ یە:
دەرچوویێن هێژا،
پێشمەرگەیێن قەهرەمان
ئامادەبوویێن خوەشتڤى
ڕۆژ باش
هوون ههموو گهلهك بخێر هاتن، سەرچاڤا، بۆ ڕێورەسمێن دەرچوونا خولا (سيهێ) یا پێگەهاندنێ ل کۆلێژا سهربازی یا دویێ ل زاخۆیێ. ئەڤ دیمەنە جهێ شانازیيا مە و هەمی گەلێ کوردستانێيه.
گهلهك خۆشحالم كو ئەڤرۆ پێكڤه شاهدێن دەرچوونا (359) ئەفسەرێن گەنجێن ههرێما كوردستانێي نه. وان پشتى (9) ههيڤا، خوەندنا خوە یا سهربازى، ئەکادیمی و پراکتیکی ب دوماهی ئینا و ئێدى دێ بنه بهشهك ژ هێزێن وهزارهتا كاروبارێن پێشمهرگهى.
جهێ سهربلنديێ و دەستخۆشیێ یە، کو پشتی بدوماهیئینانا خوەندنا زانکۆیى و بهدهستڤهئينانا بهكهلۆيۆرسێ، هوون خوەبهخشانه، ب حەز و ڤيانا خوە هاتنە ناڤ ڕێزێن خوەندنا سهربازى؛ داکو ببنە ئەفسەر د ڕێزێن پێشمەرگاتيێ دا. ئەڤە نیشانا دلسۆزی و وەفاداری و بهرههڤييا هەوەیە بۆ خزمەتکرن و پاراستنا کوردستانێ. ئەڤرۆ د ڤێ ئاهەنگێ دا ئهم هەموو دگەل مالباتێن ههوە پشکدارين و ئهم ههموو ڤێكرا ب وە سهربلندين.
ژ دل، ئو ب گهرمى پیرۆزباهیێ ل هەوە و ل مالباتێن وە یێن هێژا دکەم. ل وان و ل هەوە و ل مه ههموويان پیرۆز بیت. هیڤیا سەرکەفتنێ ل ژيانێ بۆ هەوە دخوازم.
دەرچوویێن هێژا
ژ ڕۆژا كو پێشمەرگە ههيه و هەتا ئەڤرۆ، پێشمەرگاتى جهێ شانازیێ و سەرفرازيێ و بەرپرسیاریەتييەکا مەزن بوویە. پێشمەرگاتى و پێشمهرگهبوون، ئەرکەکێ گەلەک پیرۆزە و پشکەکا گرنگ يا ناسنامەیا نيشتمانی و نەتەوەیی یا کوردستانێ يه. ئەڤە بەردەوامییا خەباتا دوور و درێژە بۆ پاراستنا گەلێ کوردستانێ ب ههمى پێكهاتێن خۆڤه.
لەوما دەرچوونا هەوە یا ئەڤرۆ و سەرکەفتنا هەوە د خوەندنێ دا، نە دويماهییا ڕێكێ یە. نەخێر، دڤێت بزانن: ئەوا ئەڤرۆ هوون دەستپێ دکەن، دەستپێکا خزمەت و ئەرکێن هەوە یێن نوو یە دگەل دهزگههێن حکوومەتى بۆ خزمەتكرنا کوردستانێ.
ئهڤرۆ باوەرنامەیا هەوە ب تنێ دەستکەفتەکێ ئەکادیمی نیيه، بەلکى پەیمانەکا شەرەفێ و سیمبۆلا دلسۆزی و وەفاداریيا ههوهيه بۆ كوردستانێ. ئەمانەتەکێ مەزنه بۆ خزمەتکرنا گەل و وەلاتێ خوە، ههروهسا نیشانا ئامادهيى و بەرهەڤییا هەوەيە بۆ هەر قوربانيیەکێ د ڕێكا سهرفرازييا وهلاتي دا.
پێشمەرگەی ب درێژاهییا دیرۆکا بزاڤا ڕزگاریخوازا گەلێ کوردستانێ، قوربانیێن گەلەک مەزن داینە. خوینا خوە دايه و ب گیانێ بهرخوەدانێ، بەرەڤانی ل ئاخا کوردستانێ و گەلێ خوە کریە. دیرۆکا پێشمەرگەی یا پڕە ژ قههرەمان و قوربانیێن مەزن بۆ ئازادیێ و بۆ سەرفرازییا کوردستانێ.
دەمێ کو (داعش) مەزنترین ڕێکخستنا تیرۆرستی ل جیهانێ؛ هێرش کریە سەر عێراقێ و کوردستانێ، پێشمەرگە بوون کو ب سهرۆكاتيیا جهنابێ سهرۆك مهسعود بارزانى، ب گیان و خوینا خوە، داعش ل بەرۆكێن شەڕی تێکشکاند و نەهێلا کوردستان بکەڤیتە دەستێ وان تیرۆرستا. ژبهر هندێ، هەتا کورد و کوردستانى بمینن، پێشمەرگە دێ ههر مینين ئیلهامبهخش بۆ گەلێ کوردستانێ و دێ ههر مينن پارێزەر و سیمبۆلێ بەرهڤانى و خوەڕاگريا مللهتێ مه.
د ڤێ هەلکەفتێ دا، جارەکا دی سپاس و پێزانینا هەرێما کوردستانێ پێشكێشى هێزێن هەڤپەیمانییا ناڤدەولەتی ب سهرۆكاتييا ئهمهريكایێ دکەم کو د شەڕێ دژی داعشێ دا پشتەڤانییا پێشمەرگەی کرین. هاریکاریا وان بۆ پێشمەرگهيان و بۆ سوپایێ عێراقێ، پشتەڤانییەکا ستراتیژی و ئێكلاكهر بوو. سپاس پێزانين بۆ هاريكارى و پشتەڤانییا وان یا بەردەوام بۆ پرۆسا چاکسازیێ ل وەزارەتا کاروبارێن پێشمەرگەى.
هەروەسا پێويسته ئاماژێ بدهينه گرنگییا هەماهەنگی و هەڤکارییا ناڤبەرا پێشمەرگەى و هێزێن سوپایێ عێراقێ بۆ بهرهنگاربوونا تیرۆرێ. کارێ هەڤپشکێ هەردولا پێویستە بۆ پاراستنا ئاسایش و ئارامیێ ب تایبەتی ل دەڤەرێن ماددەیێ (140)، چونكى ب باوهرييا مه داعش هێشتا مەترسی و گەفە ل سەر ئاسایش و تهناهييا عێراقێ و ڤێ دەڤەرێ.
د ڤێ ڕۆژێ دا، د ڤێ ههلكهفتێ دا، سەرێ ڕێزێ بۆ خوینا شەهیدێن خوە دچەمینین، چ پێشمهرگه، چ یێن سوپایێ عێراقێ، چ حەشدا شەعبی، کو گیانێ خوە کرينە قوربانی بۆ پاراستنا وهلاتى.
ئامادەبوویێن هێژا،
د ڤێ هەلکەفتێ دا پێويسته بێژين كو: پرۆسا ئێکگرتنا هێزێن پێشمەرگەی وهكى پێویست بڕێڤە ناچیت و ئەو پێشکەفتنا کو پێويست بوو، ههتا نها نەبوويه. گەلێ کوردستانێ ب سالايە ل هيڤييا ئێکگرتنا پێشمەرگەیه. دۆستێن مەيێن هەڤپەیمانییا ناڤدەولەتی، پشتەڤانی و پلان و هاریکارییا پێشکێش دکەن، چاڤەڕێنه كو ئهم ئیرادەیهكا سیاسی یا دروست يا بهێز نيشان بدهين. بهلێ مخابن ههتا نۆكه نههاتيه كرن و ڤێ ئێكێ زيانهكا مهزن گههاندييه ناڤێ ههرێما كوردستانێ.
ژ هەمیێ گرنگتر، ئەڤ دەرچوویێن گەنج و دلسۆزێن ئەڤرۆ ئهم دبینین، هەژی وێ چەندێنە بچنە ناڤ هێزەکا نيشتمانى یا ئێکگرتی. ئهڤ ڕهوشه هيچ نه يا باشه و ئهم قهت ژێ ڕازى نینن.
دگەل هندێ ژی، ديسا دبێژم: ئێكگرتنا پێشمهرگهى پێويستييهكا چارهنڤيسسازه بۆ ههرێما كوردستانێ و پێدڤييه سهركهڤيت. ئەم ل سەرۆکاتییا هەرێما کوردستانێ و حكومهتا ههرێمێ دێ بهردهوام بين، دێ ئهركێ خوە بينين بۆ هندێ ئهڤ كاره بێته ئهنجامدان و ئهڤ پرۆسهيه سهركهڤيت. بۆ ڤێ چهندێ دگەل دۆستێن مە ل هەڤپەیمانییا ناڤدەولەتی دێ بەردەوام بین.
پێشمەرگە بهشهكه ژ سیستەما بەرهڤانيێ یا عێراقێ. ئهڤ كۆلێژه بخوە ژى ل زاخۆیێ وهكى كۆلێژهكا سهر ب وهزارهتا بهڕهڤانيێ يا عێراقێ ڤە، نيشانا ڤێ چهندێ يه. ژبهر هندێ دڤێت عێراق هەموو ئهرك و پێگيرى یێن خوە یێن یاسایی و دهستوورى بەرامبەر پێشمەرگەی بجى بینیت و هاریکاری و پشتەڤانی و چەک و تەقەمەنییا بۆ پێشمەرگەی دابین بکەت.
پێشمەرگە نە مەترسیيە، بەلکى پارێزەرێ وهلاتييه و بهرێ ژى ل شهڕێ ئازادييا عێراقێ، ل پاراستنا ئاسايشا بهغدایێ و ل شهڕێ دژى داعشێ، ئهڤه ب ڕۆنى پێشمهرگهى يا سهلماندى كو پارێزهرێ وهلاتي يه.
ئامادەبوویێن هێژا،
دەڤەرا مە ئەڤرۆ د ڕهوشهكا گران و ئالۆزدا دەرباز دبیت. گرژیێن هەرێمی، کاریگەرییا خوە ل سەر هەموویان کریە. ئەم ل هەرێما کوردستانێ تهئكيدێ ل سەر هەلویستێ خوە یێ جێگیر دکەین کو ئەم دگەل چارەسەرى یێن ئاشتیانەينه بۆ هەموو کێشە و ناكۆكييان. مه نهڤێت عێراق و هەرێما کوردستانێ ب چو ڕەنگەکێ ببيته بهشهك ژ ڤان كێشه و ئالۆزيان.
د ڤێ چارچۆڤێ دا، ئەم ب گەشبینی چاڤەڕێی کارکرنێينه دگەل حکومەتا بهێت ل بەغدایێ و دگەل سەرۆکوەزیرێ دهستنيشانكرى ڕێزدار (عهلى زهيدى)، ب گیانێ ههڤپشكييا نيشتمانى یا ڕاستەقینە و لهسهر بنهمايێ دهستوورێ عێراقێ ئەم ئامادهينه پێکڤە کار بکەین بۆ خزمەتکرنا هەموو عێراقێ، ب شێوەیەکێ کو سيستهمێ فيدرالى و مافێن دەستووری يێن ههرێما كوردستانێ و یێن هەموويان، بهێنە پاراستن و تهناهى و گەشەپێدان و ئاڤەدانی بۆ هەموو عێراقێ بێ جوداهى بێنه مسۆگهركرن.
هەرێما کوردستانێ يا فيدرالى پشکەکا گرنگا عێراقێ يه. پاشەڕۆژا عێراقێ و يا ههرێما کوردستانێ پێکڤە گرێدایي یە. سەرکەفتنا مە ئێکە، تهحهددى و چارهنڤيسێ مە ژى هەڤپشکن. بهێزبوونا بهغدایێ، ئانكو بهێزبوونا ههرێما كوردستانێ، بهێزبوونا ههرێما كوردستانێ، هێزهكه بۆ بەغدایێ. ژ بهر هندێ کارێ هەڤپشک یێ ل سەر بنەمایێ دەستووری و ڕێزگرتنا دولایەنە و ههڤپشكييا نيشتمانى، بتنێ ڕێكە بۆ ئاڤاکرنا عێراقەکا بهێز و تهنا کو خزمەتا هەموو وەلاتیێن خوە بکەت. ئەم د ئیرادەیا خوە دا جددینە بۆ چارەسەریا ههموو كێشه و ناكۆكييا لسهر بنهمايێ دهستوورى.
دەرچوویێن خۆشتڤى،
ژبیر نەکەن: کۆلێژا سهربازى پەروەردەکرن و پێگەهاندنا هەوە، گرتیە سهر ملێ خوە، داکو وەک فەرماندەیێن خوەدان شیان، ئهرك و بهرپرسياريهتييا خوە بجى بينن. داكو دگهل پاراستنا کوردستانێ، بەرەڤانیێ ژ دادپەروەریێ و مرۆڤایەتیێ بکەن. بنەما و بەهایێن بلندێن نيشتمانی و قوربانیدان و دیسپلین، بنەمایێن سەرەکینە؛ کو پێویستە هەردەم د هزر و دلێ هەوەدا بن. هوون پێشمهرگه، سوپايێ ههموو كوردستانێ نه ب ههموو پێكهاتێن خوەڤه. ڕۆلێ هەوە ب تنێ د مەیدانێن شەڕیدا نیيە. ڕۆلێ ههوه نه ب تنێ فێربوونا هونهر و تهكنيكێن سهربازي يه، بەلکى دڤێت ئەرکێ هەوە بەرفرەهتر بيت بۆ ئاڤاکرنا جڤاکێ تهنا و ئارام. بۆ ڕهتكرنا تونڕهويێ، دهمارگيريێ و تيرۆرێ.
بەرپرسیاریەتييا پاراستنا بەهایێن ئازادى، ئاشتى، دیموکراسی، مافێن مرۆڤی و جڤاكا مهدهنى يا ڤهكرى، پێكڤهژيانێ و قهبوولكرنا ئێكودو، ل سەر ملێن هەوەیە. ببنە سهركرده و ببنه نموونە بۆ پاراستنا دادپەروەریێ و بەرەڤانیکرنێ ژ مافێن هەموو وەلاتیێن هەرێما کوردستانێ و عێراقێ.
باوهرييا مه ههموویان ب هەوە دهێت کو هوون دێ شێن بەرەنگاری تهحهدييا ببن و د ئەرکێن خوە دا سەرکەڤن، داکو ب باشترین شێوە خزمەتا وهلاتێ خوە بکەن. ببنە هێزا نيشتمانی یا کوردستانێ د چارچۆڤەیێ وەزارەتا کاروبارێن پێشمەرگە دا. چو جارا نەبنە بهشهك و لایەنەکێ کێشە و ململانێ یێن سیاسی.
ل دوماهیێ
ب گهرمى سپاسى و دهستخۆشيێ پێشكێشى ڕێزداران ڕاگر و مامۆستا و بەرپرس و ڕێڤەبەرێن کۆلێژا سهربازى يا زاخۆیێ دکەم. کار و خزمەت و دلسۆزییا وان جهێ پێزانینەکا مەزنە. ئەرکێ وان يێ پیرۆز و ڕۆڵێ وان گەلەکێ گرنگە بۆ باشترکرن و پێشڤهبرنا ئەرکێن پێشمەرگەی و پێگەهاندنا نڤشهكێ نوو ژ پارێزەرێن وهلاتى، کو ل سەر زانستێن سهربازى و ڤيانا نيشتمانى پەروەردە بووینە. سپاسيا ههوه هەموویان دكهم، دهستخوەشيێ ل ههوه هەموویان دكهم، ل ڕاگرێ كۆڵێژێ و ههموو ئهفسهرێن وه.
سلاڤ و ڕێز بۆ گيانێ پاقژێ هەموو شەهیدێن كوردستانێ، یێن كو خەبات کرین و گیانێ خوە بۆ کوردستانێ كريه قوربان دا ئهم ئهڤرۆ پێكڤه ڤێ ئاههنگێ بگێڕين. سلاڤ بۆ شەهیدێن زیندی، بۆ هەموو وا قههرەمانێن کو د ئەرکێ پاراستنا کوردستانێ دا بریندار بووین. ژ ڤێرێ سلاڤ و ڕێزێن من قهبوول بكهن، دهسێ وان ماچى دكهم. هيڤييا ساخبوونێ ب ئانههييا خودێ بۆ وان هەموویان دخوازم.
جارەکا دی ب گەرمی و ژ دل پیرۆزباهیێ ل هەوە هەموویان دکەم دهرچوويێن هێژا. هیڤیا سەرکەفتن و سهرفرازيێ بۆ هەوە هەموویان دخوازم. هيڤى دكهم خودێ هاريكارێ ههوه بيت دڤێ ژيانا وه دهستپێ كرى. ب ئانههييا خودێ ههوه ببينم ب خۆشى و سهلامهتى و سهركهفتن.
دڤێت سپاسييا ئيدارەیا سهربخوە يا زاخۆیێ ژى بكهين كو هاريكاريا كۆلێژێ كريه و ئهم وان پێشكهفتنان ژى دبينين يێن كو ل باژێرێ زاخۆیێ ئهنجام داىن. هيڤيا مە ئهوه ههموو لا بهردهوام و سهرفراز و سهركهفتى بن. كوردستان ههر ئاڤهدان بيت و هوون ژى پارێزهرێن كوردستانێ سهرفراز و سهركهفتى بن.
گەلەک سپاس.
