ڕێڤنگیا سه‌رخوه‌بوونا کوردستانێ ژ خانه‌قینێ تا کۆماته‌ی
شه‌هید زۆراب
ڕێڤنگیا سه‌رخوه‌بوونا کوردستانێ ژ خانه‌قینێ تا کۆماته‌ی
شه‌هید زۆران عبدالعزیز پشتیوان، یێ به‌رنیاس ل به‌هدینان ب (شه‌هید زۆراب)، ساڵا 1943 ل خانه‌قینێ هاتیه دنیایێ.
بابێ وی، عبدالعزیز پشتیوان، ئێک ژ دامه‌زرێنه‌رێن پارتیا هیوا بوویه و ل خانه‌قینێ ب (مامۆستایێ کوردایه‌تیێ) تێته ناسین.
شه‌هید زۆراب ل ساڵا 1959 ده‌ما ل خانه‌قینێ به‌ڕه‌ڤانیێ ژ به‌رده‌وامبوونا کورسێن زمانێ کوردی دکه‌ت، ب ده‌ستێ ڕژێما ئیراقێ تێته گرتن.
ل ساڵا 1961 دبیته قوتابیێ ئاماده‌یی یا پیشه‌سازی ل به‌غدایێ. لێ ژ به‌ر کو خیرالله طلفاح خه‌زوورێ صدامێ فاشست، ڕێڤه‌به‌رێ وێ قوتابخانێ بوویه، ئه‌و قوتابی یێن عه‌ره‌ب یێن نه‌ژادپه‌ره‌ست ل دژی شه‌هید زۆرابی هاندده‌ت. لێ شه‌هید زۆراب ل هه‌مبه‌ری وان ده‌ستا ناداهێلیت و شه‌ڕه‌کی مێرانه ل هه‌مبه‌ری وان عه‌ره‌ب یێن فاشست ده‌ستپێدکه‌ت. پشتی شه‌هید زۆراب ب تنێ دشێت گه‌له‌کا ژ وان برینداربکه‌ت، ئه‌و ژی تێته بریندارکرن و ده‌رێخستن ژ قوتابخانێ و خوه ڤه‌دگوهێزیته سلێمانیێ.
ل ساڵا 1964 کامه‌رانێ برایێ وی ژی، ل سه‌ر کوردایه‌تیێ، ب ده‌ستێ حکومه‌تا ئیراقێ تێته شه‌هیدکرن.
ژ به‌ر رۆلێ وی یێ قاره‌مانانه ل دژی به‌عسیا، شه‌هید زۆراب ل 8/2/1963 هه‌تا 3/2/1969 ل زیندانێن رمادی، حلله، مۆسل و نوگره سه‌لمان تێته زیندانکرن. ئه‌و د زیندانێ دا وه‌ک مامۆستایه‌ک رۆلێ خوه دبینیت و ده‌رسێن کورداتیی و جڤاکناسیێ دده‌ته زیندانیێن کورد.
ل ساڵا 1970 ژ به‌ر گڤاشتنێن به‌عسیا خانه‌قینێ دهێلیت و دبیته پێشمه‌رگه و ل وان ساڵان دیسان خه‌لکێ وان گوندان فێری خواندن و هشیارکرنا ساخله‌میێ دکه‌ت.
پشتی شکه‌ستنا شوڕشێ ل ئادارا 1975، ب ڕاسپاردنا سه‌رۆک مه‌سعود بارزانی، شه‌هید زۆراب دگه‌ل کۆمه‌کا کادرێن پارتی، خوه دگه‌هیننه چیایێن سه‌رسنوورێ باشوور- باکوور، ل ده‌ڤه‌را به‌هدینان و ئاماده‌کاریێن شوڕشا گولانێ دکه‌ن.
شه‌هید زۆراب د وان دو ساڵێن ده‌ستپێکا شوڕشێ دا، دهه‌لکرن و گه‌شکرنا ئاگرێ شوڕشا گولانێ دا، ل به‌هدینان رۆله‌کی به‌رچاڤ دگێڕیت. ئه‌و د هه‌ردو ئالیێن ڕێخستنی و له‌شکه‌ری دا، گه‌له‌ک زوو ناڤوده‌نگه‌کی باش ل هه‌موو به‌هدینان په‌یدا دکه‌ت.
د ئێک ژ گه‌ڕێن پێشمه‌رگاتیێ دا، شه‌هید زۆراب دگه‌ل کۆمه‌کا پێشمه‌رگا ژ کۆماته‌ی خوه به‌ردده‌نه دۆرێن باژاڕێ دهۆکێ ژ بۆ کارێ ڕیخستنی و له‌شکه‌ری، لێ مخابن هه‌ڤالێن وی کو هه‌موو خه‌لکێ ده‌ڤه‌رێ بوون، خوه ڕاده‌ستی دوژمنی دکه‌ن و شه‌هید زۆرابی، ل ده‌ڤه‌ره‌کێ، کو بۆ وی یا نه‌ناس و بیانی بوو، وی بتنێ دهێلن. لێ شه‌هید زۆراب ب زیره‌کی و مێرخاسیا خوه شیا، پشتی هه‌موو ئه‌رکێن خوه ب دروستی ئه‌نجام داین، بزڤریته‌ڤه باره‌گای، بێی کو بکه‌ڤیته ناڤ داڤێن پیلانا دوژمنی.
ل رۆژا 25/5/1977 ێ، ساڵه‌کێ پشتی هه‌لبوونا شورشێ، د ده‌مه‌کی دا کو شه‌هید زۆراب ژ گه‌ڕه‌کا ڕێخستنێ ژ ناڤ کووراتیا ده‌ڤه‌رێ ڤه‌دگه‌ڕیت بۆ باره‌گایێن پێشمه‌رگه‌ی ل نێزیک سنوورێ باکوور-باشوور و به‌ری ئه‌و بگه‌هیته باره‌گایێ خوه ل کۆماته‌ی، ئه‌و ل وارگه‌هێ (زۆما) بێلمبیرێ، یا کو دکه‌ڤیته ناڤبه‌را زنارا کێسته و سنوورێ باکور ل ده‌ڤه‌را به‌رواری بالا، ل وێرێ و ل باره‌گایێ نه‌مر ئه‌حمه‌د شانه ل ده‌ف هه‌ڤالێن خوه یێن پێشمه‌رگه بێنا خوه ڤه‌دده‌ت و ئه‌و خه‌ریکی باڵاڤا خوه‌یه. ئاها د وی ده‌می دا له‌شکه‌رێ به‌عسیا ب 9 هه‌لیکۆپته‌رێن شه‌ڕکه‌ر هێرش کره سه‌ر وان و ل هه‌رچار ڕه‌خێن وان له‌شکه‌ر به‌ردانه سه‌ر ئه‌ردی و پشتی شه‌ڕه‌کی دژوار تا کو ئێڤاری و کوشتنا 43 له‌شکه‌ران ژ هێزا له‌شکه‌رێ دوژمنی، شه‌هید زۆراب دگه‌ل 13 هه‌ڤالێن خوه یێن دی شه‌هید دبیت. تەرمێن هندەک شەهیدان دوژمنی برن و ل دێریشکێ ل ده‌ڤه‌را کانیماسێ ڤه‌شارتن، کو شه‌هید زۆراب ژی ئێک ژ وان بوو، یێن ماین هه‌ر ل وێ ده‌ڤه‌رێ و ل جهه‌کی بناڤێ خه‌نۆکه‌ی و ل دۆله‌کێ، کو پشتی هینگێ بناڤێ دۆلا شه‌هیدان هاتیه ناڤکرن، هاتنه ڤه‌شارتن.
ژ هه‌ژی گۆتنێ یه کو شه‌هید زۆراب ته‌نێ نێزیکی دو ساڵا ل ده‌ڤه‌را به‌هدینان وه‌ک کادر خه‌باتکریه و ئه‌ڤه 44 ساڵ ژی د سه‌ر شه‌هیدبوونا وی ڕا ده‌رباز بوون، لێ ئه‌و شیایه ب کاریزمایا خوه یا کورداتیێ ناڤوده‌نگه‌کێ وه‌سا بخوه په‌یدا بکه‌ت، کو هه‌موو ده‌مان ئه‌و دچاڤێن خه‌لکێ به‌هدینان و هه‌موو کوردستانێ دا وه‌کی چیایه‌کی بلندێ شانازی و سه‌رفرازیێ یه.
وه‌ک رێزگرتنه‌ک ژ بۆ ڤی قاره‌مانی، ل ده‌ستپێکا ساڵێن 1980 یان ڕێکخراوا باره‌گایێ لقا ئێکا پارتی ل ناڤ شورشێ، بناڤێ ڤی شه‌هیدی هاتبوو ناڤکرن، هه‌روه‌سا ڤێ دوماهیێ ژی قوتابخانه‌یه‌ک ل دهۆکێ ب ناڤێ (شه‌هید زۆراب) هاتیه ناڤکرن.
ل دوماهیێ دبێژم ئه‌گه‌ر عه‌شقا کوردستانێ و ئازادیا وێ نه‌بیت، نه گه‌له‌ک بساناهیە تو ل خانه‌قینێ ژ دایک ببی و بھێی خوه ل بێلمبیرێ بده‌یه شه‌هیدکرن.
گۆڕا ته و ته‌ڤایا شه‌هیدێن کوردستانێ ب گول به زۆرابێ نه‌مر.
