ژ بۆ شەهید شڤانێ هرۆری
وارێ منۆ فرەکا بایی
ژ چیایەکێ بەفر لێ مایی
ژ بۆ شەهید شڤانێ هرۆری
ل سەرێ سبەھا 14ێ گولانا 1988ێ، ھێشتا تاری، بەری رۆژ ھاتبا وی واری، بەری ھێلین ڤالا بووبان، بەری پالە ھشیار بووبان، پێنج عەگیدێن وەلاتی، پێنج خوەشمێر و ژێھاتی، یێن كۆ ھێڤی دابوون رۆژێ، گەش كربوون پەرێن بشكوژێ، جھێن پێیێن وان بووبوون رێكێن چیایێن مە، داستانێن وان بووبوون چیرۆك ژ بۆ زارۆكێن مە، ئارمانجا وان پێنجان وەكی یا ھزار ھەر پێنجێن دی ئازادیا وەلاتێ مە، ژ چیایێ گامنێركی ھاتن خوارێ و كەفتن بووسەیەكا مینێن دژمنێ كۆلەدار و ئاخێ ل بن پێیێن وان كر ھەوار. لەشێن وان پارچە پارچە بوون و پارچەیێن وان ھەمیان بوون یەك. پێیێن وان وندا بوون، رێ نەدیتن. خوینێ ھەمی ئەردێ مە داپۆشی، ئەردێ مە ژی ژ بنێ پێیان كر قێژی، خوە ڤەقوتا، وێ بھارێ خوە ژ كولیلكێن خوە داقوتا و ھەر كر قێژی: ئەڤ بیابانی نووژن، جەرگ و دلێن من دسۆژن.
دو ژ وان پێشمەرگەیان شەھید بوون و شڤانێ ھرۆری ژی بریندار بوو. شتلەكێ سپیندارا بلند، 26 بھاران كەسك كری. دێمەكێ نازك و سپی، تاڤێ بری. دەستەكێ خاكان و چۆخكەكێ ببەریك، دەستەكێ وی تڤەنگ و یێ دی قەلەم، … د تلەكا دەستێ وی یێ راستێ دا خەلەكەكا زراڤ و زێرین، د دلێ وی دا ئەسمەرەكا شەنگ و باخچەیەكێ كەسك و رێزەكا چیایێن بەفرین.
ئەو بریندار بوو لێ نە قێریەك ژ گەوریا وی دەركەفت، نە نالینەك ژێ ب سەر كەفت. عەمەرێ تروانشی ب وان خوین و برینان ڤە ل بنێ دارەكا كەزانێ سەرێ وی دانا سەر رانێ خوە، چاڤێن وی تژی رۆندك بوون و ژۆر دا ھاتن خوارێ. عەمەری گازی وی كر، گازیەكا نەرم وەكی بارانێ: شڤان، برا، دێ نەمرە. شڤان، برا، وەلاتەكێ ب ھێڤیا مە ڤە، خوە رابگرە. شڤان، برا، بابێ تە تو تەنێ ھەیە، جەرگێ وی نەبرە. شڤان، برا، تو زاڤایێ سالێ یی، خەزالا تە ل ھێڤیا ھەمبێزكرنا تە یە، رابە ھەرە. چاڤكەسكێ من، تو بەرانێ یەكانە یێ بابێ خوە یی، ئەو ل ھێڤیا نەڤیكەكی یە دا چیچێ زەرێ ژ بۆ وی ببێژت و دەمێ رادبت وەستیكان ژی دا ببێژت وی: دێ وەرە، باپیرۆ، وەرە.
نە ھەرێ، نە برینێن وی خوە دا یەك، نە خوین راوەستیا، نە زەراتیا مرنێ ئەو بەردا. شڤانی سەرێ خوە سەرئەڤراز كر و ب ھەر دو لێڤان خەبەر دا: عەمەرێ من، ئەڤ پارەیێن كۆ د بەریكا من دا مانە بگەھینە پێشمەرگەیان. ئەو وەكی ئاریكاری ھاتنە. عەمەرێ من، بابێ من ئەز تەنێ ھەمە، لەوما وی ئەز ب نازداری مەزن كرمە. عەمەرێ من، وێ كێركا د بەریكا من ئا چەپێ دا وەكی دیاری بدە بابێ من.
وی ئەو گۆتن كرن، پاشی ھێڤ كر بەفر و چیا و زۆزانێن وارێ خوە، بایێ زۆزانان ڤەخوار، ب مرنێ كەنی و ب ھەلبەستەكا موئەیەدی گازی وان كر: وارێ منۆ فرەكا بایی / ژ چیایەكێ بەفر لێ مایی. د بەر وان گۆتنێن وی یێن داویێ را رح ب سەر وی دا چوو و وەسا وی ب یەكجاری خاترا خوە ژ عەمەری و كوردستانێ خواست. ئەو شەھید بوو و عەمەری دەستێ خوە ب چاڤێن وی دا ئینا خوارێ.
رۆژ بوو سێلەكا رەش و خوە ھاڤێت بەختێ عەورەكێ رەشتر. ئاخ بوو بوركان و بووڤەلەرز، دێو و دەھبەیان سەما ل سەر كر. وێ خەلەكا زراڤ و زێرین تل ل وی قەد كر. ئەسمەرا شەنگ، وێ بووكا سالێ، ھیزارا خوە ھاڤێت و خەملا خوە رەش كر. ئەو چیمەنا كەسك، ئاگری گرت. ژ چاڤێن بەفرێ، تاڤیەكا رۆندكان وەریا و سەرێ وی چیایێ ژ ھەمی چیایان بلندتر بەژنەكێ چەمیا.
وێ سەرێ سبەھێ چاڤێ ھەمی ستێران لێ بوو، رۆژێ قێر كربوو فەرشێ نڤێژان و سجدە ژ بۆ خوینا سۆر دبر. چاڤێ ھەمی ستێران لێ بوو، ئەو بھارا گەش بوو مێرگ و چیمەنەكا گەشتر. ھەیڤێ كۆشا خوە گرت و ب ھەر دو ملان گول ژێ چنین.
ئەو مر و چ كەسەكی فرەكا ئاڤێ ب دەڤێ وی دا نەكر. كانیێ گۆت: دەستێ من نەگەھشت وی، ھەر دو دەستێن من بشكێن. رووباری گۆت: ئەو ل سەر رێیا من نەبوو، ھەر دو روویێن من رەش ببن. بارانێ گۆت: من ئەو نەدیت، كۆراھی ب ھەر دو چاڤێن دا بئێت خوارێ. ئاخێ گۆت: وی فرەكا بایی ژ چیایەكێ بەفر لێ مایی دڤیا، نە ئاڤ. چیایی گۆت: خودێ شاھدە، ئەز دێ ھەر سپێدە ھینترین فرا بایێ خوە ب كێلیا گۆرێ وی دا بكم.
تێبینی:
١. من ژ بۆ چیرۆکا شەهید شڤانێ هرۆری مفا ژ هەلبەستەکا بێوارێ ئەکرەمی وەرگرتیە و ژ بۆ وەسفاندنێ ژی من مفا ژ دو هەلبەستێن موئەیەدێ تەییبی وەرگرتیە
٢. ئەڤ کێمەک ژ کتێبەکا منە کۆ نها ل قووناغا سەرڕاستکرنێ یە و ل پاشەڕۆژەکا نێزیک دێ بئێت چاپکرن.
زنارێ مەلێ
