ھەمەرەنگ

کورێمەیی ژ زیندانێ بۆ ناڤ چیا و پێشمەرگاتیێ

عبدلستار معروف کورێمەیی ل سالا1957 ێ ل گوندێ کورێمە، سەر ب پارێزگەها دهۆکێ ڤە، ژدیك بویە،  خواندنا خوە  ل گوندێ خوە ل کورێمە، ل مانگێشکێ و پاشی ژی دچیتە باژارێ دهۆکێ و ل وێرێ پەیمانگەها ئیسلامی ب دیماهیک دئینە.

ئەو ل مالباتەکا کوردپەروەر و وەلاتپارێز مەزن دبە، دو برا و دو برازایێن وی د رێیا ئازادیا کوردستان دا شەهیدن، ژبەر هندێ هەر زوو ڤیانا وەلات و ئاخا کوردستانێ د دلێ وی یێ مەزن دا پێل دەدە و دخوازە زوو مەزن ببە دا ئاخا گوندێ خوە، باژارێ خوە و کوردستانا خوە ژ دژمن و داگیرکەران پاقژ بکە.

ژ بەر ڤێ هەستا وی یا بلندا نەتەوەیی، خەبات و شۆرەسگەریێ، دەما شۆرەشا ئیلۆنێ دکەڤە ناڤ رێخستنێن ڤەشارتێن پەدەکێ و دەست ب چالاکێن خوە یێن شۆرەشگەری دکە و هەتا دەستپێکرنا شۆرەشا گولانێ بەردەوام دبە،

 ژ بەر رۆلا وی یا مەزن د ناڤ رێخستنێن پەدەکێ یێن ڤەشارتی دا ژ ئالیێ رەشەک و سیخۆرێن دژمن ڤە ئاشکەرا دبە و سالا ١٩٧٦ێ دهێتە گرتن و ل ئەمنا دهۆکێ، ئەمنا کەرکووکێ و ل زیندانا ب ناڤودەنگ ب ئەشکەنجەیێ ل ئەبۆ غرێب ب ١٠ سالان دهێتە زیندانی کرن. لێ پشتی دو سالان ب  عەفویەکا گشتی دهێتە ئازاد کرن.

پشتی ژ زیندانێ دهێتە ئازاد کرن، ئێکسەر رێیا خوە دگرە و بەرێ خوە ددە ناڤ شۆرەشا گولانێ و چەکێ شەرەفێ ب ملێ خوە ڤە دکە، ژ بۆ بدەستڤەئینانا وان داخواز و هیڤیێن هێشتا ژ زارۆکاتیێ د دلێ وی دا بوون، دبە پێسنەرگە،

ل ناڤ شۆرەشی، ل بارەگایێ مەکتەبا سیاسی دبە کادر و باشی پشتی هەیامەکی ژ بۆ لقێ یەک یێ پارتیا دەمۆکراتا کوردستانێ دهێتە ڤەگوهاستن و هەتا ئەنفالێن سالا ١٩٨٨ێ ل وێرێ دمینە و پشتی ئەنفالان دچە ئیرانێ و ژ بۆ دەستپێکرنا سەرهلدانێ ڤەدگەرە کوردستانێ و دەست ب خەباتا خوە دکە و هەتا دچە بەر دلۆڤانیا خوەدێ ل سەر کار، خەبات و تێبازا خوە یا پیرۆز بەردەوام بوو.

ل وان سالێن ئەو  ل لقێ یەک پێشمەرگە بوو، ئەو سەرۆکێ کۆمیتەیا لێکۆلینێ بوو، ئانکو ل دەڤەرا لقێ یەک سەر ب پارتیا دەمۆکراتا کوردستانێ ڤە، عبدلستار معروف کورێمەیی حاکمێ شۆرەشێ بوو .

عبدلستار معروف کورێمەیی کتێبەک ب ناڤێ “مێرگا ناڤێن کوردی”چاپ کریە.

عبدلستار معروف کورێمەیی کو د زەمانەک گەلەک دژوار دا ژیا،  گەلەک مخابن رۆژا ٢٠٢٢/١/١٨  ژ ڤێ ژیانێ بار کر و چو بەر دلۆڤانیا خوەدێ مەزن، هیڤیدارین خوەدێ وی ب بەهەشتێ شاد بکە.

www.sibehi.com

Back to top button