گۆتنۆكێن سەرسالێ
شه‌ڤا سه‌رسالێ، پشتی کو ڕۆژ دچه ئاڤا ب قه‌ده‌رێ سەعه‌ته‌کێ، زارۆک و خۆرتکێن گوند، ل باژاران ژی یێن تاخێ، ته‌ڤ دگەھن هه‌ڤوودو و ژ خوه ڕا به‌رنامه‌یا سه‌رسالێ چێدکن.
یه‌ک ژ وان، خوه دکه مینا پیره‌ژنه‌کێ. یه‌ک ژی، خوه دکه مینا کاله‌مێره‌کی. چه‌ند که‌سێن دن ژی، هه‌ر یه‌ک تووره‌کی ب چه‌مبل داڤێژه ملێ خوه.
ئه‌و کال و پیر دکه‌ڤن پێشیا برا زارۆکان و ب هه‌ڤ ڕا ل مالان دگه‌رن. چ مالا کو ئه‌و دچن به‌ر ده‌ریێ وێ، ته‌ڤ ب ده‌نگێ بلند و ب هه‌ڤ ڕا، ڤان گۆتنۆکێن ل ژێر دبێژن و دوباره دکن: یه‌ک: سه‌رێ سالێ، بنێ سالێ…خوه‌دێ کوره‌کی بده بووکا مالێ…دۆ: قه‌رقووشک، مه‌رقووشک.. خوه‌دێ کوره‌کی تێخه ناڤا پووشک…سێ: هوورک، موورک خوه‌دێ کوره‌کی تێخه ناڤا توورک…چار: سه‌رێ سالێ، بنێ سالێ کا تشته‌کی باڤێژن بنێ چالێ.
ژنه‌ک ژ مالێ ده‌ردکه‌ڤه و تشته‌کی خوارنێ وه‌که مه‌ویژ، باستێق، هه‌لیل، شاران، گووز، به‌هێڤ و تشتێن وسا دخه توورکێ یه‌ک ژ وانێن ل به‌ر ده‌ری.
زارۆك ته‌ڤ ب هه‌ڤ ڕه دیسا دبێژن:
سه‌رسالا وه پیرۆز به….
ب خێر و خوه‌شی به…
ده‌رد و کولێن وه کێم به…
ئه‌وا کو تشت دده زارۆکان، ئه‌گه‌ر بووکا مالێ به، دیسا زارووک ته‌ڤ ب هه‌ڤ ڕه وه‌ها دبێژن: پێنج: سه‌رێ سالێ، بنێ سالێ…خوه‌دێ کوره‌کی بده ته بووکا مالێ…
پشتی گه‌را ل ناڤا مالان ب داوی بوو، ئه‌و زارۆک ته‌ڤ دچن ماله‌کێ ل ئۆده‌یا مێڤانان ڕوودنن و تشتێن کو به‌رهه‌ڤ کرنه، دخوون. پشترا هه‌تا ده‌ره‌نگیا شه‌ڤێ دره‌قسن و ستران دبێژن…
سه‌رسالا عیسه‌ویان ل وه هه‌میان پیرۆز به…
2020.12.31
زه‌ینه‌لابدین زنار
