رۆژا ئێکێ ئادارێ، ٤۷ سالیا کۆچا داوی یا سهرۆکێ نهتهوی مستهفا بارزانیه. بارزانی ب کریارێن خوه، ژیانا خوه، پێشمهرگهتیا خوه، داین و ستاندنێن خوه، ب دپلۆماسی و کهسایهتییا خوه یا بهرز و سەقامگیریا سیاسهتا خوه ڕێبازهک یا نهتهوی کوردستانی ئاڤاکر.
ههر مناسهبهتا بیرانینا بارزانی دا پرانی بهحسا خهباتا وی و ژیانا وی تێ کرن، لێ دهما مرۆڤ بالا خوه ددێ ڤان بیرانینا گهلهک ب بەرفرەهی بهحسا فهلسهفا بارزانی و ئهو ڕێبازا کو وی ب کار و خهباتا خوه پهیدا کری نایێ کرن. بێ گومان گهلهک ئەگەرێن ڤێ ههنه، لێ تێگهاندنا ڕاستییا ڕێبازا بارزانی ژ بۆ ئیرۆ و سبههی ژی پێوستیهکه. ڕێبازا بارزانی گارانتییا دهستخستن و پاراستنا مافێن نهتهوی یێن کوردانه.
دهما کو، ئهم ببالکێشی بهرێ خوه بدنێ، ژ بۆ نرخاندنا بارزانی میلادەک دهرکهتیه هۆلێ. ژ بهری سالا ۱۹۹۲ێ و پشتی ۱۹۹۲ێ..
نرخاندنێن د دهربارێ بارزانی دا هاتین کرن، ژ بهری ۱۹۹۲ێ تشتهکه و پشتی ۱۹۹۲ێ تشتهک دنه. ئهز بهحسا ئەگەێن ڤێ یهکێ ناکم، لێ گهرهک سیاسهتمهدارێن کورد، ڕهوشهنبیر و نڤیسکارێن کورد و ههتا لێکۆلینهر و جڤاکزانێن کورد دهستێ خوه دهینن سهر وژدانا خوه ڤێ میلادێ باش بنرخینن و بوویهرێن د دهما بارزانی دا ڕوودایین و ههلوهستا بارزانی ل همبهر ڤان بوویهران ب زانیاری بێ نرخاندن.
مخابن ژ بهری سالا ۱۹۹۲ێ مه وهک کورد پرانی بارزانی ب ڕۆژنهمهڤان، لێکۆلنهر و نڤیسکارێن بیانی ناسکریه. گهلۆ ئهڤ یهک ب خوه ژی نه کێماسیهکا مه یا ههری مهزنه؟ یان ژی قهلسیهک ل همبهر سهرۆکهک نهتهویه؟
ئیرۆ دهما کو ئهم ل تهڤگهرا ئازادخوازا کوردستانێ دنێرن گهلهک ڤهکری دخوهیێ کو کی ل سهر ڤێ ڕێبازا پیرۆز دچه و ب کریار و ههلوهستێن خوه ڤێ ڕێبازێ د پاراکتیکێ دا دپارێزە. ئیرۆ د ڕۆژامه دا پەدەکە یێن ل ئیراق، باکور و ڕۆژاڤا خوه ل سهر ڤێ ڕێبازێ دبینن. باوهرم د ڤێ دهربارێ دا نه حهوجهیه کو،بهحسا باکور و ڕۆژاڤا بکن. نه حهوجهیه ژ بهر کو، ڕهوش زهلال و ئاشکهرایه. یانی تشتا کو، مرۆڤ بهحسێ بکه ههرکهس دزانه.
ل باشوورێ کوردستانێ پەدەکە ئیرۆ دهستهلاتداره، و ل گهل هندهک کێماسیان ژی ل سهر ڕێبازا بارزانی سیاسهتێ دکه. گهلۆ ههتا چ ڕادهیێ ڤێ یهکێ پێکتینه یان ژی ناینه؟ ههردهما کو د ژیانا سیاسی دا بهرێ خوه ژ ڤێ ڕێبازێ ڤهدگوههزە توشی خهلهتیا دبه. ژ بهر کو،ب ڕێبازا بارزانی یه کو ئیرۆ ئهڤ دهتسکهفتی ل باشوورێ کوردستانێ پهیدابوونه.
سیاسهتا دگەل ڕۆژا مه دگونجه، یانێ، تۆلهرانس، پاراستنا ئاشتیێ، دانوستاندنا ناڤبهرا تهڤگهرا کورد و ئالیێن دن ، تێگهاندنا نڤشێ نوو د ڤێ ڕێبازێ دا، ئو تایبهتی پاراستننا دهستکهفتیێن کوردستانی دا گهرهک بهردهوام ڕاپرسین بێنه کرن و ئهڤ یهک ههر دهمی بابهتهکا لێکۆلنێ به د ناڤا پەدەکێ و کادرۆیێن پەدەکێ دا.
گهلۆ ئهگهر ئیرۆ د ناڤا نفشێ نوو یانی جوانێن پەدەکێ دا ڕاپرسینهک بێ کرن، ههتا چو رادهیێ ژ ڕێبازا بارزانیێ نهمر ئاگاهدارن؟
ڕێبازا بارزانی ههر دهمی د ههر مهرجی دا بهرژهوهندیێن نهتهوی ئهساس دگره و وان ل سهر ههر تشتیرا دگره. دهما پرس ببه خوهدی لێ دهرکهتنا کوردان هوونەرێ سیاسی یێ ڤێ ڕێبازا پیرۆز دهردکهڤه هۆلێ. تشتا کو، ل ڕۆژاڤایێ کوردستانێ د ناڤبهرا حوکومهتا شامێ و هەسەدێ دا ڕوودایی، ڤێ یهکێڤه گرێدایی سیاسهتا ئامهرکا و وهلاتێن وهک ترکیێ دا، سهرۆک مهسعود بارزانی و سهرۆکێ ههرێما کوردستانێ نێچیرڤان برزانی ب ههلوهستا خوه یا کو ب تهمامی ڕێبازا بارزانیێ نهمر را دگونجه دهرکهتن قادا ههرێمی و ناڤنهتهوی ڕۆلهک لهیزتن کو، کورد ژ کۆچبهریێ و کۆمکوژیان خلاس کرن.
لهیزتکهک گهلهک مهزن ههم ژ ئالیێ هندهک وهلاتێن ههرێمی و ههم ژی درێژاهیا وان د ناڤ کوردان دا ههبوو کو، ڕۆژاڤایێ کوردستانێ ژ کوردان پاقژ بکن . ژ بیر نهکن کو دهما ئۆجەلان ل سووریێ بوو د نڤیسهکا خوه دا ڤهکری گۆتبوو: ”ل سووریێ کوردستان نینە. کوردێن ل سووریێ ههموو ژ باکور هاتنه و دڤێ جاردن ڤهگهرن جهێ خوه..”
لێ دهما قهومی باشوورێ کوردستانێ کو، دهستکهفتیا کوردان یا یهکهمینه، ئهڤ لهیزتک ب سیاسهتا کو ڕێڤهبری تێکبر.
بێ گومان گهلهک تشت ههنه کو بێنه گۆتن، لێ ب ڤێ مناسبەتا سالڤهگهرا کۆچا داوی یا بارزانی یێ نهمر دا، من خوهست چهند تشتان ب بیر بینم..
ههرپێگاڤا بێ ئاڤێتن، ههر ههلوهستا بێ دانین ههر بهرنامهیا بێ ئامادهکرن ڕێبازا بارزانی ل بیرا مه به، ئهم زوو ب زوو توشی خهلهتیان نابن.
ڕێبازا بارزانی وهفایه، یهکگرتنه و بهرژهوهندیێن نهتهوێ یێن کوردستانێنه.
ڕێبازا بارزانی د وهلاتهک سهربخوه دهژیانهک ئازاده…
2026-03-01
