نێرین و شڕۆڤە: دەربارەی شەهیدبوونا خەزالێ و ڕادەستکرنا کەرکووکێ
دوو بابەتێن گەلەک گرنگ د ڕۆژەڤا مە دا هەنە کو دڤێت ژ لایێ سیاسی و ئەخلاقی ڤە بهێنە نرخاندن.
د هێرشەکا ئیرانێ دا بۆ سەر بارەگەهێن پارتیێن ڕۆژهەلاتێ کوردستانێ، هندەک پێشمەرگە بریندار بوون. ئێک ژ وان برینداران، پێشمەرگەیا کۆمەلە “خەزال مۆلا” بوو. خەزال گەهاندە نەخۆشخانەیێ، بەلێ ل سلێمانیێ چو نەخۆشخانەیان ئەو قەبوول نەکر کو برینێن وێ دەرمان بکن. دەما کو ل سەر ڤێ چەندێ گەنگەشە و ڕەخنە هاتینە کرن و رایا گشتی زانی، بەرپرسێن نەخۆشخانەیان ب ئاشکرایی دگۆت: “ئەڤە پرۆسەیەکا ئەمنی یە”، واتە هێزێن ئەمنی یێن گرێدایێ یەکێتیێ (یەکێتی نشتمانی کوردستان) ڕێ نەدان کو ئەڤ پێشمەرگەیا کورد بهێتە دەرمانکرن.
خەزال شەهید بوو. بەلێ مخابن ل سلێمانیێ هەموو مزگەفتان ژی دەرگەهێن خوە ل بەر تەرمێ خەزالێ گرتن و ئامادە نەبوون تەرمێ وێ یێ پیرۆز ل مزگەفتێن باژارێ سلێمانییێ بشون! ل دوماهیێ کەسایەتیەکێ کورد دەرگەهێ مالا خوە ڤەکر و ڕێورەسمێن شووشتنێ بۆ ئەنجام دان و ب ئاخێ سپارد. تە دگۆت قەی خەزال نە ل کوردستانێ بوو، بەلکو ل وەلاتەکێ بیانی یان ل ناڤ ئاخا دوژمنێن دۆزا کورد شەهید ببوو.
ئەڤە بابەتەکە دڤێت گەلەک ل سەر بوەستین و حساب ل سەر ڤێ ڕووڕەشیێ بهێتە کرن. پڕانییا میدیایێن یەکێتی و پەکەکێ ل هەمبەر ڤێ یەکێ بێدەنگ بوون و ڕاستی بەلاڤ نەکرن. ژ لایەکێ دی ڤە، مخابن ئالیێن کوردستانی یێن کو د هەر دەرفەتەکێ دا بەیاننامەیان بەلاڤ دکن، د ڤێ پرسا جڤاکی، ئەخلاقی، مرۆڤی و سیاسی دا بێدەنگ مان.
خەزال کچەکا گەنجا کورد و پێشمەرگە بوو، بۆ ئازادییا کوردستانێ (رۆژهەلاتێ کوردستانێ) خەبات دکر، نەدبوو ل پارچەیەکا کوردستانێ ب ڤی ئاوایی سەردەریێ دگەل بکن و ئەڤە چارەنڤیسێ وێ بایە. تشتەکێ دی، ئەو ژنێن پەکەکە و یەکێتی یێن کو هەر دەم بەحسێ مافێ ژنان دکن و چالاکییان ئەنجام ددن، چما ل هەمبەر خەزالێ بێدەنگ مان؟ هەتا ئەڤ تشتە هەبن، ئەڤ پەڵەیا ڕەش ب وان ڤە دێ مینیت.
پرسا ڕادەستکرنا پارێزگارێ کەرکووکێ
بافل تالەبانی ب وی عەقلێ خوە، کەرکووک بۆ جارا دویێ فرۆت. کەرکووک ڕادەستێ بەرەیێ تورکمانی یێ فاشیست کر. ئەو کەسێ ئەڤڕۆ بوویە پارێزگارێ کەرکووکێ، کەسایەتیەکێ فاشیست و شاگردێ مەهەپێ ب خوەیە. ل ڕۆژا هاتیە هەلبژارتن، ئێکسەر کەسایەتیەکێ نەتەوەپەرست و دوژمنێ دۆزا کورد، سەرۆکێ پارتا “زەفەر” ل ترکیێ، ئومیت ئۆزداغ پیرۆزباهی لێ کر و ئەڤ چەندە وەک سەرکەفتنەکا مێژوویی ب ناڤ کر.
ئەڤە جارا دویێ یە بافل کەرکووکێ دفرۆشیت، د دەمەکێ دا کو بابێ بافلی ب خوە دگۆت: “کەرکووک قودسا کوردستانێ یە”. ئەڤ تشتێ ل کەرکووکێ هاتیە کرن، خیانەتەکا نەتەوەیی یە و تێکدانا ستاتۆیا هەرێما کوردستانێ یە. دڤێت ئەڤ بابەتە ژ ڕۆژەڤا بزاڤا ڕزگاریخوازی یا کوردی دەرنەکەڤیت، بەلێ مخابن ئالیێن سیاسی بێدەنگن.
2026-04-17
نێرین / شڕۆڤە
