سەرۆک بارزانی ب هەلکەفتا جەژنا قوربانێ پەیامەکا پیرۆزباهییێ بەلاڤکر و داخوازا چارەسەرکرنا خەتمینا سیاسی کر
سەرۆک مەسعود بارزانی ب هەلکەفتا هاتنا جەژنا قوربانێ یا پیرۆز، پەیامەکا پیرۆزباهییێ بەلاڤکر و تێدا داخواز ژ سەرجەم هێز و ئالییێن سیاسی یێن هەرێما کوردستانێ کر کو پشتی جەژنێ ب هەستکرن ب بەرپرسیارەتیا نیشتمانی کۆمببن، دەست ژ دۆبەرەکیێن بێئەنجام بەردەن و ڤێ خەتمینا سیاسی ب دوماهی بینن.
سەرۆک مەسعود بارزانی ئەڤڕۆ (سێشەمبی، ٢٦ێ گولانا ٢٠٢٦ێ) پەیامەکا پیرۆزباهییێ بەڵاڤکر، تێدا جەژنا قوربانێ ل هەموو موسلمانێن کوردستانێ و جیهانێ پیرۆز کر و داخوازەک ئاراستەی سەرجەم هێز و ئالییێن سیاسی یێن هەرێما کوردستانێ کر.
دەقێ پەیاما سەرۆک بارزانی:
ب ناڤێ خودێ مەزن و دلۆڤان
ب هەلکەفتا هاتنا جەژنا قوربانێ یا پیرۆز، گەرمترین پیرۆزباهییێن خوە ئاراستەی موسلمانێن کوردستانێ، عیراقێ و هەموو موسلمانێن جیهانێ دکەم. پیرۆزباهییەکا تایبەت ژی ئاراستەی مالباتێن سەربلند یێن شەهیدان، پێشمەرگە یێن قارەمان و هەموو وەلاتییێن خوەشتڤی یێن کوردستانێ دکەم. د ڤێ هەلکەفتا پیرۆز دا، ئەز ژ خودێ مەزن داخواز دکەم کو خێر، خوەشی و بەختەوەرییێ بۆ هەموو خەلکێ کوردستانێ و جیهانێ بینە.
هەروەسا د ڤی دەمێ هەستیار و چارەنڤیسساز دا، پەیاما من بۆ ئالی و هێزێن سیاسی یێن کوردستانێ ئەوە کو هەموو ئالی ل سەر بەرژەوەندییێن خەلکێ کوردستانێ بفکرن؛ بەرژەوەندییێن بلندێن گەلێ مە بێخنە سەر سەرێ ئارمانج و بەرژەوەندییێن بەرتەنگ و دەست ژ وان ناکۆکییێن بێئەنجام و وێ خوە-خواریێ بەردەن کو ماوەیەکە پرۆسەیا سیاسی یا هەرێمێ پێ دناڵنیت.
داخواز دکەم کو پشتی جەژنا قوربانێ یا پیرۆز، ئالییێن سیاسی یێن هەرێمێ ب دلسۆزی و هەستێ نیشتمانپەروەرییێ پێکڤە بجڤن، ڤێ خەتمینا سیاسی چارەسەر بکەن و دوماهییێ ب ڤێ ڕەوشا نەخۆش یا سیاسی بینن. ئەڤە ئەرکەکێ ویژدانی، نەتەوەیی و نیشتمانی یە و دڤێت هەموو ئالی ب هەستێ بەرپرسیارەتییێ تەڤبگەرن و ڤەگەڕن سەر ڕێکا ڕاست.
هیڤیدارم ئەڤ جەژنە ببیتە دەستپێکەک بۆ باشتربوونا ڕەوشا هەرێما کوردستانێ، دەربازکرنا ئاریشەیێن سیاسی و هەروەسا بەرقەراربوونا ئاشتی، ئارامی و ئەولەهییێ ل هەرێما مە و ل سەرانسەری جیهانێ.
جەژنا وە پیرۆز بیت و هەر دەم د ناڤ خوەشی و تەندروستییێ دا بن.
مەسعود بارزانی
٩ێ زیلحجەیا ١٤٤٧ێ کۆچی
٢٦ێ گولانا ٢٠٢٦ێ زایینی
