ل ڕۆژا 17/7/1988 حکومهتا ئیرانێ بڕیارا نەتەوەیێن ئێکگرتی یا ڕاوهستاندنا شهڕێ ههشت ساڵیێ ئیران-ئیراقێ پهژراند و شهڕ دناڤبهرا ههردوو وهڵاتان دا ڕاوهستا.
ههر ئێکسهر دوو ڕۆژا پشتی هینگێ و ل ڕۆژا 19/7/1988 حکومهتا ئیراقێ ب هێزهکا مهزنا لهشکهری هێرش کره سهر بارهگەهێن پێشمهرگهی و گوندێن دهڤهرا ڕزگارکری ل سێکوچا سنوورێن باکوور-باشوور و ڕۆژههلات (ترکی-ئیراق و ئیران)، کو ب دهڤهرا خواکوڕکی تێتهناسین.
حکومهتا ئیراقێ ئهڤ شهڕێ خوه ب ناڤێ (توکلت علی الله) بناڤکر.
هێزێن لهشکهریێن هێرشکهرێن حکومهتا ئیراقێ ب ڤی شێوێ خوارێ بوون:
1- فرقا 33 یا سهر ب فهیلهقا 5 ڤه
2- فرقا 45 یا سهر ب فهیلهقا 1 ڤه
3- فرقا 18
4- فرقا 35
5- لیوایا 16 یا هێزا تایبهت
6- لیوایا 68
7- لیوایا 702 یا پهیاده
8- فهوجا 1 مغاویر ژ فرقا 33
9- لیوایا 402 پهیاده
10- لیوایا 120 مغاویر
11- لیوایا 2 ژ هێزێن ناڤخوه
12- فهوجا 3 ژ لیوا 2 مغاویر
13- فهوجا 1 مغاویر سهر ب فرقا 3
14- ب دههان فهوجێن جاشان
15- 5 کهتیبهیێن تۆپێن مهیدانی (گران) و ژمارهیهک تۆپێن هاوهن
16- 3 کهتیبهیێن تانگا (دهبابه)
17- ژمارهیهکا زۆرا فڕۆکهیێن جهنگی، ههلیکۆپتهر و پیلاتۆز
هێزێن شوڕشێ پێکهاتبوون ژ:
1- هێزا ئاواره ( ڕێکخراوێن: 16 ئاب، 11 ئهیلول، 26 گولان و ڕێباز)
2- هێزا بارزان ( ڕێکخراوێن: قهلهندهر، پیران، شیرین، زۆزک و برووسک)
3- هێزا حهمرین ( ڕێکخراوێن: ( سهفین، ئهزمڕ و سهگرمه)
4- هێزا خهبات ( ڕێکخراوێن: موسهکا و چارچهل)
5- هێزا سهرکردایهتیێ ( ڕێکخراوێن: کارۆخ، سورداش، گۆڤهند، گۆڕهز و ئاراس)
6- تۆپخانا شوڕشێ، کو بهرپرسێ وێ عهلی سهلیم باجلوری دڤی شهڕی دا شههید بوو.
7- هێزا بابهگوڕگوڕ سهر ب لقا سێ یا پارتی ڤه.
8- هێزا زمناکۆ لقا چار
9- هێزا بهرگری مللی
10- هیزێن لقێن 2،3 و 4
11- مهفرهزهیهکا پارتیا کۆمونیستا ئیراقێ
12- لژنا ئازادی ل زێوه بهرپرس بوو ژ کارێن ئیداری و لوژستی یێن بهرهیێ شهڕی، کو عهلی شهعبان بارزانی ژێ بهرپرس بوو و کاک نێچیرڤان بارزانی ژی سهرپهرشتی لێ دکر.
ژ ههژی گۆتنێ یه کو سهرۆک مهسعود بارزانی بخوه سهرپهرشتیا بهرهیێ شهڕی دکر و ژ سهرکردایهتیا پارتی ژی ئهڤ ڕیزدارێن خوارێ دگهل جهنابێ وی پشکداربوون: د. رۆژ نوری شاوهیس، فازل میرانی، د. جهرجیس حهسهن، زهعیم عهلی، ئازاد قهرهداغی، سهید سالح، مقدم یهعقوب، ملازم یونس، حهمید ئهفهندی، بابهکر زێباری، قادر قادر و عومهر ئۆسمان.
شهڕ ب گهرمی بهردهوام بوو و پێشمهرگهی چهندین هێرشێن دوژمنی ب دژواری شکاندن و ب دههان کوشتی و بریندار ژ دوژمنی کهفتن و ههژمارهکا مهزنا جاش و لهشکهران ژی ب دیلی کهفتنه دهستێ پێشمهرگهی، کو گهلهک ئهفسهر و پلهدار ژی دناڤدا بوون، ژ وان ژی فهرماندهیهکێ فهوجێ بوو کو ب برینداری کهفتبوو دهستێ پێشمهرگهی و دهما پێشمهرگهی ئهو دهرمان دکر، وی گۆته پێشمهرگهی:” ئهز ڤێ ئاخفتنێ ژ نیڤا دلێ خوه دبێژم، من بکوژن و دهرمان نهکهن و ههر لهشکهرهکێ دیێ ئیراقێ ژی هوون بگرن بکوژن، چونکی حکومهتا ئیراقێ ههموو مافێن ژیانێ یێ ژ وهستاندین و تنێ ئهڤ چیایه یێ ددهستێ وه دا ماین، بهلێ حکومهت وه ژ ههژی ژیانا ڤان چیا ژی نابینیت، لۆما ئهز دبێژم مه مافێ ژیانێ نینه و مه بکوژن”.
پشتی ڤان شکهستنێن دوژمنی یێن ئێک ل دووڤ ئێکێ، حکومهتا ئیراقێ ل سپێدههیا ڕۆژا 3/8/1988 چهپهر و بارهگایێن پێشمهرگهی ل نازدارداخ، خواکوڕک و گادهری، ب ڕێکا فڕۆکهیێن ( پی سی ٧پیلاتۆز ) کیمیابارانکرن و د ئهنجامدا نیزکی 60 پێشمهرگا برینداربوون و کو هندهک ژ وان پشتی هینگێ ب کاریگهریا کیمیاوی شههیدبوون.
شهڕی ههتا ڕۆژا 5/9/1988 ڤهکێشا، پشتی فیشهک و تهقهمهنیێن پێشمهرگهی گهلهک کێم بووین و سهرمایهکا دژوار کهفتیه وێ دهڤهرێ، سهرکردایهتیا پارتی بڕیاردا کو هێزێن پێشمهرگهی خوه ڤهکێشن، هۆسا ئهڤ شهڕێ 46 ڕۆژی بدوماهی هات.
زیانێن دوژمنی دڤی شهڕی دا 1023 کوشتی بوون ژ جاش و لهشکهران، کو ههژمارهکا مهزنا ئهفسهران ژی دناڤ دابوو، ژ وان ناسنامهیێن 350 کهسان کهفتبوونه دهستێ پێشمهرگهی.
پێشمهرگهی 4 فڕۆکهیێن ههلیکۆپتهر پهلخاندن و ئێخستنه خوارێ. دیسان 32 دیل کهفتبوونه دهستێ پێشمهرگهی، لێ پێشمهرگهی ئهو ئازادکرن. دووا ژ وان پهنا بره بهر ئیرانێ و 30 ژی زڤڕینهڤه ناڤ لهشکهرێ ئیراقێ و ههر 30 ئێکسهر ههر ل خواکوڕکی ب دهستێ لهشکهرێ ئیراقێ هاتنه گوللهبارانکرن، ب تۆمهتا ترسنۆکیێ. ههروهسا پتری 600 پارچهیێن چهکی کهفتنه دهستێ پێشمهرگهی لگهل 18 دهزگایێن بێتهلێ و گهلهک کهلوپهلێن لهشکهری.
زیانێن شوڕشێ ژی دڤی شهڕی دا شههیدبوونا 38 پێشمهرگێن قارهمان وبرینداربوونا 104 ێن دی بوو
