پلانەکا هەڤپشک بۆ چەکدانانا هەزاران چەکدارێن پەکەکێ دکەت
ل گۆرەی نووچەیەکا ڕۆژنامەیا “حوریەت” یا ترکی، ل ژێر چاڤدێرییا رێکخراوا هەوالگیرییا ترکیەیێ (میت) و ب هەماهەنگییا د ناڤبەرا ئەنقەرە، بەغدا، هەولێر و سلێمانیێ دا، مێكانیزمەکا هەڤبهش هاتیە ئاڤاکرن دا کو داوی ب هەبوونا چەکداری یا پارتییا کارکەرێن کوردستانێ بێتە ئینان.
ل گۆرەی زانیاریێن وێ ڕۆژنامەیێ، دێ ئەڤ پرۆسەیە ب سەرپەرشتییا راستهوخوە یا هەوالگیرییا ترکیەیێ هێتە بڕێڤەبرن. پێشبینی هەیە تا مەها چریا دووێ (نۆڤەمبەر) یا بهێت، ئهندامێن پەکەکێ چەکێن خوە داینن و بگەرنە ترکیەیێ. پرۆسەیا تەسلیمکرنا چەکی دێ ل هەولێر و سلێمانیێ ل گۆرەی نەخشەڕێیەکا دیارکری بڕێڤە چیت و هەموو چەکێن تەسلیمکری دێ هێنە تۆمارکرن.
هەروەسا هاتیە راگههاندن کو (میت) ێ ئەرکێ چاڤدێرییا مەیدانی گرتییە سەر ملێن خوە، دا کو ژ ڤالاکرنا شکەفت و کەمپێن ل هەرێما کوردستانێ پشتڕاست بت. پشتی کۆمکرنا زانیاریان، (میت) دێ ڕاپۆرتێن خوە پێشکێشی ئەنجومەنێ ئاسایشا نەتەوەیی یا ترکیەیێ بکەت.
دیارترین ئەو ئامارێن د ڕاپۆرتێ دا هاتینە بەلاڤکرن:
- چەکدارێن پەکەکێ: پێشبینی هەیە دناڤبەرا ٧ تا ٨ هەزار چەکداران ژ عێراق و سوریایێ ڤەگەرنە ترکیەیێ.
- کەمپا مەخمور: نێزیکی ٨ هەزار سڤیلێن ل کەمپا مەخمورێ نیشتەجێ دێ ڤەگەرنە باکورێ کوردستانێ.
- دەڤەرا شنگالێ: نێزیکی ٢ هەزار و ٢٠٠ چەکدارێن سەر ب پەکەکێ ڤە دێ تێکەلی ناڤ ڕێزێن ئارتەشا عێراقێ ببن.
- ئەوروپا: نێزیکی ٧٠ تا ٨٠ هەزار ئالیگرێن ڕێکخراوێ ل ئەوروپایێ، پێشبینی هەیە بەشەک ژ وان ڤەگەڕن ترکیەیێ.
چارەنڤیسێ یاسایی و سەرکردایەتییا پەکەکێ ڕۆژنامەیا حوریەت جەختێ ل سەر ئالیێ یاسایی یێ ڤێ پرۆسەیێ دکەت و دیار دکەت کو یاسایا نوو یا ترکیەیێ تەنێ ئهندامێن “ئاسایی” ژێ مفادار دبن.
دەربارەی سەرکردە و بەرپرسان، هاتىیە دیارکرن کو ٢٣٠ سەرکردەیێن پایەبلند و ئەو کەسێن دەستێ وان د کوشتنێن راستهوخوە دا هەیی، ئەڤ یاسایە وان ناگریت و ژێ مفادار نابن. هەروەسا ل گۆرەی زانیاریان، دێ دۆسیەیێن ئەو کەسێن نوکە د گرتخانەیان دا ژی هێنە هەلسەنگاندن.
