ژێدەرەکێ نێزیک ژ ناڤەندێن بڕیارێ ژ ناڤ پارتییا کارکەرێن کوردستانێ (پەکەکە) دیار کر کو هەر دو سەرکردەیێن دیارێن پەکەکێ، جەمیل بایك و موراد قەرەیلان، خوە بەرهەڤ دکەن دا کو ل دوڕگەها ئیمڕالیێ دگەل عەبدولا ئۆجەلانی بجڤن.
ل گۆرەی زانیاریێن کو وی ژێدەری بۆ «ولات 24» ڤەگوهاستین، دوهی بایك و قەرەیلان ژ دەڤەرا قەندیلێ بۆ ناڤ ئاخا ترکیێ هاتینە ڤەگوهاستن، بریارە ئەڤرۆ ئان سوبەهی ل ئیمڕالیێ دگەل ئۆجەلانی بجڤن.
ئەڤ دیتن و جڤین د ناڤبەرا ئۆجەلان و هەر دو سەرکردەیێن هەرە دیارێن پەکەکێ د قۆناغەکا هەستیار دا دهێن کرن، کو پشتی راگەهاندناهلوەشاندن و چەکدانان پەکەکێ ل سالا بۆری و ئەو پێنگاڤ و دانوستاندنێن ل سەر پاشەرۆژا سەرکردایەتیێ، پێکهاتەیا ڕێکخستنێ و ڕێڕەڤێ قۆناغا بهێت هاتینە کرن.
ل سەر زانیاریێن هاتینە بەلاڤکرن، ئەڤ کۆمبوون نابیتە یەکەم دیدار د ناڤبەرا ئۆجەلان و سەرکردەیێن ژ قەندیلێ چووین ئیمرالییێ. ل مەها شباتێ یا ئەڤسالە، پرۆتۆکۆلەکێ ئاشکراکری (تەسریبکری) ژ کۆمبوونا ڕۆژێن 1 و 2ی شباتێ ل ئیمڕالیێ هاتبوو بەلاڤکرن، کو تێدا هاتبوو گۆتن کو ئۆجەلان دگەل ژمارەیەک سەرکردەیێن دیارێن وەک: دوران کالکان، سەبری ئۆک، هێلین ئۆمیت، ڕابڕین و عباس ئارک، ب بەرهەڤبوونا بەرپرسێن لایەنێ تورکیێ کۆمببون.
ئەو پرۆتۆکۆلێ بەلاڤبووی بەحس ل دانوستاندنێن کوور ل سەر پاشەرۆژا پەکەکێ، ئالیەتێن بجهئینانا قۆناغا نوو، پەیوەندی دگەل دەولەتا ترکیێ و کۆمەکا دۆسیەیێن دیتر ل سەر سوریا و دەڤەرێ دکر.
هەتا ئامادەکرنا ڤێ راپۆرتێ، هیچ ڕاگەهاندنەکا ڕەسمی ژ لایێ دەسەڵاتدارێن ترکیێ ڤە ئان سەرکردایەتیا پەکەکێ ڤە ل سەر گەهشتنا جەمیل بایك و موراد قەرەیلان بۆ ترکیێ یان دیارکرنا دەمێ دیدارا وان دگەل ئۆجەلانی نەهاتیە بەلاڤکرن.
