خەلیلزاد: دەرکەتنا ژ هەولێرێ بۆ ئەمریکایێ ساناهی نەبوو و ڕەتکرنا چەکدانانێ ژ لایێ گرووپێن چەکدار ڤە هەڕەشەیەکا جدییە
زاڵمای خەلیلزاد، باڵیۆزێ بەرێ یێ ئەمریکایێ ل عێراقێ ڕاگەهاند کو ڕۆژا داویهاتنا ئەرکێ هێزێن هەڤپەیمانان ڕۆژەکا گرنگە د پەیوەندیێن ناڤبەرا واشنتۆن و بەغدایێ دا، بەلێ دەرکەتنا ژ هەولێرێ بۆ ئەمریکییان کارەکێ ساناهی نەبوو. هەروەسا جەخت کر کو ئەگەر گرووپێن چەکدار ل سەر داواکاریا ئیرانێ چەکدانانێ ڕەت بکەن، دێ بیتە هەڕەشەیەکا جدی و ئالۆزییێن گران و دژوار بۆ سەرۆکوەزیر عەلی زەیدی.
د دیداره‌کا تەلەڤزیۆنی دا، زاڵمای خەلیلزاد بەحسێ دەرکەتنا هێزێن هەڤپەیمانان کر و گۆت: “ئەڤڕۆ ڕۆژەکا گرنگە د پەیوەندیێن ئەمریکا و عێراقێ دا. سەبارەت ب لێکەفتێن ڤی بڕیاری ژی ڤیا چاڤەڕێ بکن کا دێ چی ڕوودەت. پرسیارا سەرەکی ئەڤەیە کا ئەرێ هێزێن عێراقێ هەتا چ ڕادەیەکێ ئامادەنە بۆ هه‌لگرتنا بەرپرسیارەتیا ئەولەکاریێ پشتی ڤەکێشانا ڤان هێزان.”
پەیوەندیێن هەولێر و واشنتۆن
خەلیلزاد ئاماژە ب وێ چەندێ ژی دا کو پەیوەندیەکا بهێز د ناڤبەرا هەرێما کوردستانێ و ئەمریکایێ دا هەیە، ژ بەر هندێ دەرکەتن و چۆلکرنا بنکەیێن ئەمریکایێ ل هەولێرێ کارەکێ ساناهی نەبوو بۆ واشنتۆن.
خەلیلزاد گوتی: “داویهاتنا ئەرکێ سەربازی یێ ئەمریکایێ ل عێراقێ ب رامانا داویهاتنا پەیوەندیان ناهێت، بەلکو پێدڤیە پەیوەندیێن سەربازی و ئەولەکاری د ناڤبەرا هەرێما کوردستانێ، عێراق و ئەمریکایێ دا بەردەوام بن، چونکی ئەڤ چەندە بۆ پاشەڕۆژا ئەولەکاریا وەلاتی یا فەرە.”
مەترسیێن چەکێ گرووپێن چەکدار و ڕۆلێ ئیرانێ
سەبارەت پرسا چەکێ گرووپێن چەکدار ل عێراقێ، باڵیۆزێ بەرێ یێ ئەمریکایێ دیارکر: “ئەگەر گرووپێن چەکدار ڕەت بکەن چەکی دابنێن، دێ بیتە گەفەکا جدی بۆ سەر ئاسایشا عێراقێ. تەڤی کێشانا هێزێن ئەمریکایێ، ئه‌ڤ گرووپە د بەردەوامن ل سەر ڕەتکرنا چەکدانانێ، کو ڕەنگە ئەڤە ل سەر داخوازا تارانێ بیت. تاران هەتا نوکە پشتگیرییا پێدڤی بۆ پڕۆسەیا چاکسازیێ یا عەلی زەیدی نەکریە.”
د پشکەکا دی يا ئاخفتنێن خوە دا، خەلیلزاد روونکر کو هەڵوێستێ تارانێ و شیانێن هێزێن عێراقێ بۆ ڕووبەڕووبوونا گەفان،ئالۆزی و تەڤلیهەڤیان ل هەمبەر حکومەتا عێراقێ. ئەو جەخت دکەت کو پێدڤییا هێزێن عێراق ب ڕاهێنان و پێدانا زانیاریێن هەواڵگری هەیە دا کو بشێن پاراستنا ئاسایشا وەلاتی بکەن و بۆ هەر سناریۆیەکا ئەولەکاری د ئامادەبن.
د داویا ئاخفتنێن خۆ دا، زاڵمای خەلیلزاد دەستنیشانکر کو بۆ چارەسەرکرنا پرسگرێکێن د ناڤبەرا هەولێر و بەغدایێ دا، پێدڤیە هەموو ئلی پێگیریێ ب دەستوورێ عێراقێ بکن، چونکی ئەڤە تاکە ڕێگەیە بۆ گرەنتیکرنا سەقامگیریا پاشەڕۆژا وەلاتی.
