پێڤاژۆیا نوکە یانی ئەڤ پێڤاژۆیا کو، ب ناڤێ دەولەتا تورکیا ب داخویانییا سەرۆکێ (مەهەپە)یێ دەستپێکری ڕۆژانە ب ئاوایێن جودا دهێتە گوتوبێژکرن. ڕۆژا ئێکێ دەولەتێ ناڤێ پێڤاژۆیێ دانا. “پێڤاژۆیا تورکیەیا بێ تەرۆر”، ئۆجەلان ژی ئەڤ یەک پەژراند و پشتی بانگا باخچەلی شاندەك ژ (دەم پارتی) سەرەدانا ئۆجەلانی کر و پەیاما ئۆجەلانی یا بۆ پێڤاژۆیێ ب دەستنڤێسا ئۆجەلانی ل ستەنبولێ د جڤینەکا میدیایی دا ئاشکرا کرن. د گۆتنا ئۆجەلانی دا بەحسا کوردا یان ژی چارەسەرییا پرسا کورد ناهێتە کرن. تنێ بەحسا “ئەنتەگرەسیۆنا دیموکراتیک” دەهێتە کرن. ڤێجا هەرکەسک ئەڤێ گۆتارێ ل گۆرا خوە دنرخینیت.
نوکە ئارمانجا دەولەتێ دیارە و ڕايەدارێن دەولەتێ ڤێ یەکێ ڤەکری گوتوبێژ دکەن و بەرنامە و پلانا کو دڤێن بهێنە بجهانین هەڕ ڕۆژ ب ڕۆژ مەیدانی پێکدئینن.
لێ د ناڤا (پ ک ک) دا ئەڤ زەلالییە نینە. ل سەر داخوازیا ئۆجەلانی (پ ک ک) کۆنگرەیەک ل دارخست و خوە هەلوەشاند و بڕیارا دەستبەردانا چەکان دا. هەتا ئەڤ یەک ب ڕێورەسمەک سەمبۆلی بۆ ڕایا گشتی ڕاگەهاند.
دوماهیهاتنا وی شەڕێ بێ مانا ئەڕێنییە، دەستبەردانا چەکی ئەڕێنییە، راوەستاندنا شەڕی، هەلوەشاندنا (پ ک ک) هەمی گاڤێن باشن و بەرژەوەندیا هەرکەسەکی د ڤێ یەکێ دا هەیە. تایبەت ل باکورێ کوردستانێ دەما سیاستەمدار، پارتیێن سیاسی بێژن کو، شەڕێ هەیی زیانەکا مەزن دایە کوردستانێ و جڤاکا کورد و دژبەریەك د ناڤ کوردان دا پەیداکریە كو ب دەهێن ساڵان چارەسەرنابن، برینێن هاتینە ڤەکرن ب دەهێن ساڵان ناکەوین، پرسا کورد ب مەتۆدێن دیموکراتیک ب ڕێیا دیالۆگێ دهێتە چارەسەرکرن. شەڕ د ڤان تشتان دا ئاستەنگە. گەرەک بۆ ڤان ئەگەرێن کو دهێنە گۆتن پشتگیرییا ڤێ پێڤاژۆیێ بکەن.
لێ دەما د چارچۆڤەییا ڤێ پێڤاژۆیا کو ئارمانجا وێ ل سەری ب زەلالی هاتی دیاركرن، بەحسا چارەسەرییا پرسا کورد بێتە کرن ئەڤە خەلەتییەکی دیرۆکی پەیدا دکەت. ڕاستە دەما مرۆڤ بێژە، پرسا کورد هێدی نە ب ڕێیا شەڕی ب مەتۆدێن دیموکراتیک و ڕێیا دیالۆگێ دهێتە چارەسەرکرن، ئەڤ تشتێن ل ژۆری هاتینە گۆتن ڕێ ل پێشیا ڤێ سیاسەتا کو ئاشتییانا بێ ڕێڤە برن ڤەدکەت.
لێ پێڤاژۆیا “ترکیەیا بێ تەرۆر” نە پێواژۆیا چارەسەرکرنا پرسا کوردە. گەرەک ئەڤە ب زەلالی بێتە گۆتن. (پ ک ک) د ڕێیا داخوازيين نەتەوەیی یێن کوردان دا ئاستەنگ بوو. (پ ک ک) پرسا نەتەوەیی ڕەت دکەت، ل دژی نرخ و سەبۆلێن نەتەوەیی تەڤدگەڕە. لێ ل هەمبەر ڤێ سیاسەتا (پ ک ک) دەما پێڤاژۆیک بێتە هۆلێ کو، (پ ک ک) بێ چەک بکەت ئەڤە دهێتە واتەیا کو لەیستیکا ٤٠ ساڵی یان ب تەمامی دوماهی دهێت یان ژی ڕەنگەک دی وەردگریت و ب ڕێیەک دی بەردەوام دبیت. گەرەک لایەنێن سیاسی ڤێ یەکێ بنرخینن و سیاستەکی بئافرینن.
د ڤێ پێڤاژۆیێ دا ڕۆژانە داخویانیێن جودا ژ لایێ قەندیلێ و پەكەكە و ژ لایێ پارتیێن وەکی (دەم) ڤە دهێنە دان. تایبەت داخویانیێن (دەم پارتی) گەلەکی بێ واتە نە و ئەو نە جهەکێ بڕیارێ نە د ڤێ پێڤاژۆیێ دا، ئەو د ڤێ قۆناغێ دا ب تنێ ئامێرەكن د ڤێ لەیستیکێ دا. بڕیار بڕیارا ئۆجەلانی یە. لێ هندەک جاران تایبەت ل قەندیلێ دکارن ل دژی ل دژی بڕیارێن ئۆجەلانی دەرکەڤن و تشتێ د بنەگەهێ خوە دا پێڤاژۆیا هەیی دەڕەنگ دئێخیت ژی ب تەمامی نەرازیبوونا قەندیلێ یە.
ل ڕۆژاڤایێ کوردستانێ شاخێ (پ ک ک) (هە سە دە) هاتە هەلوەشاندن و هێزێن وان یێن لەشکری تەڤلی ئارتێشا سوریە کرن، هێدی تشتەک ب ناڤێ (هە سە دە) نەما. ل ڤێرێ داخوازیا ئۆجەلان و تورکیا ب تەمامی هاتە بجهئانین.
ل ڕۆژهەلاتێ کوردستانێ (پژاک) ژی بەشەکە ژ (پ ک ک) ێ. لێ ئەو هەتا وەکی ڤێ گاڤێ خوە نائێخنە د ناڤا پێڤاژۆیا بێچەککرنا چەکدارێن (پ ک ک) دا. د داخویانیێن خوە دا، ڤەکری دبێژن ئۆجەلان ڕێبەرێ وانە و ئەو ل سەر، ئەگەر هەبیت، “فەلسەفا” ئۆجەلانی سیاسەتێ دکەن، لێ بەحسا دەستبەردانا چەکی ناکەن.
ل هەرێما کوردستانێ، ئەڤجا (پ ک ک) د بن چاڤدێریا دەزگەهێن ئەولەهییا ترکیەیێ دا ژ دەست چەکان بەرددن. چەکدارێن (پ ک ک) ژ خالێن سنۆرێن ناڤبەرا باکور و باشوور دا خوە ددن لایەکی و ڤان جهان تەڤلی هەمی چەک و هەبینێن خوە ڕادەستی ئارتێشا ترکیەیێ دکەن. لێ شەڕڤانێن (پ ک ک) ل دەڤەرێن سنۆرێ ڕۆژهەلات و باشوور ب جه‌ماوه‌ر دبن. هەرێ دوماهی ل شەنگالێ ئۆجەلان دا خوەیاکرن کو، دڤێت هێزا (پ ک ک) (یەبەشە) ل دەڤەرێ تەڤلی ئارتێشا عراقێ ببیت. بلا شەنگال بەغدایێ ڤە گرێدایی بە. یا بالکێش ئەڤ بوو کو، پشتی ڤێ داخویانییا ئۆجەلانی بەردەڤکێ (ئاک پارتیێ) ئۆمەر چەلیک ژی د دەربارەی شەنگالێ دا هەمان داخويانی دا. شەنگال کوردستانە، ستاتۆیا شەنگالێ ل گۆرا ماددەیا ١٤٠ د ناڤبەرا بەغدا و هەولێرێ دا دهێتە چارەسەرکرن.
وەک کو دیار دبت ئەڤ پێڤاژۆ نە پێڤاژۆیەکا چارەسەرییا پرسا کورد ل چو دەڤەرركێ یە. پێڤاژۆ د ناڤبەرا دەولەتا ترکیێ و (پ ک ک) دا یە. ئارمانجا پێڤاژۆیێ “ترکیەیەک” بێ تەرئرە
ڤێجا گەلەک لایەنێن جودا یێن ڤێ پێڤاژۆیێ هەنه و گەلەک بەرفرەهـ ئەڤ پێڤاژۆ بێتە نرخاندن و لایەنێن کورد تایبەت یێن ل سەر خەتا نەتەوەیی سیاستێ دکەن و دەولەتبوونا کوردان دپارێزن دڤێت ب هوشیاری پێڤاژۆیا هەیی و ڕوودانێن د چارچۆڤەییا ڤێ پێڤاژۆیێ دا چێدبن شڕۆڤە بکەن. دێ پاشەڕۆژ و بوویەرێن مەیدانی پتر بدە خوەیاکرن ڕاستییا “پێڤاژۆیێ” چییە.
هەلویستا لایەنێن سیاسی د ڤی بابەتی دا گرنگە.
دارا بیلەك
