سالح موسلم و دیالۆگا ب رژێمێ را
به‌رپرسێ تێکەلیێن ده‌رڤه یێ ته‌ڤ-ده‌مێ سالح موسلم، د داخویانیه‌ک یا خوه دا دبێژه: هه‌ر ده‌می دیالۆگا مه دگەل رژێمێ هه‌بوویه و ب هاتنا ئەمریكایێ ئه‌ڤ دیالۆگ قوت نه‌بوویه.
موسلم دبێژه: ئه‌م خوه‌دییێ سیسته‌مه‌کی نه، ئه‌م ل سوریێ گوهه‌رتنێ دخوازن، ئه‌م پارچه‌یه‌ک ژ سوریێ نه. پرۆژه‌یه‌ک یا مه هه‌یه و ئه‌م د بریارا خوه دا ئازادن.
ده‌ما مرۆڤ ل ڤێ داخویانیێ دنێره وه‌ک داخویانیه‌ک نۆرمال تێ دیتن. لێ ده‌ما مرۆڤ هه‌لوه‌ستا سیاسی یا پەیەدێ ل ڕۆئاڤایێ کوردستانێ دبینه و تشتێن به‌رپرسێن ڤێ ته‌ڤگه‌رێ دوھی گۆتن و ئیرۆ دبێژن، ژ هه‌موو ئەخلاقێ سیاسه‌تێ دووره.
ژ خوه د سه‌ری دا پەیەدە پرۆژه یا پەکەکێ، ئیران و ڕژێما سوریێ بوو. ژ بۆ ڤێ یه‌کێ ب قەومینا ھەر بوویەرەكا سیاسی، دیالۆگا وان ب ڕژێمێ ڕه هه‌بوویه، وه‌ک ڕێخستنه‌ک، ئەو فه‌رمانێن خوه ژ ڕژێمێ وەردگرە و ل گۆر وان فەرمانان كار كریە و دكە.
چ جارا لنگێ ڕژێمێ ل دەڤەرەێن ڕۆژاڤایێ کوردستانێ قووت نه‌بوویه. هه‌تا نها ژی مووچه‌یێن کارمه‌ندێن ل ڕۆژاڤایێ كوردستانێ ژ بۆ حوکومه‌تێ کار دکن ژ شامێ تێ. ژ دادگه‌هێ بگره هه‌تا بانکا، هه‌موو ده‌زگه‌هێن ڕژێمێ ل هه‌رێمێن کوردستانێ هه‌نه، ژ دەستپێكا كرزا سوریێ و ھەتا نھا فەرماندارێن لەشكەرێ سوریێ، ئەمن و ئیستێخباراتا رژێمێ ل باژارێ قامیشلۆ ھەیە كو ژێ را دبێژن (چوارگۆشەیا ئەمنی)
موسلم د داخویانیا خوه ده ڕاست دبێژه، لێ نەراستی ژی د داخویانیا وی دا ھەیە ، ئه‌و د بریارا خوه ده نه ئازادن. ژ به‌ر کو ناوه‌ندا بریارا وان قه‌ندیل و شامه.
ژ خوه هێزێن چه‌دارێن پەکەکێ ل هه‌موو ده‌رێن سوریێ وه‌ک هێزێن ڕژێمێ ل دژێ داعیشێ شه‌ر کرنه و هه‌تا نها ژی ل ده‌ڤه‌رێن نه کوردستانن، شه‌ر دکن.
موسلم ده‌ما به‌هسا دیالۆگێ و سیاسه‌تا خوه دکه ڕاستیا ڤه‌دشێره و تشتێن کو دبێژێ ژی وه‌ک داخویانیێن نۆرمال تێنه دیتن.
د ڤێ ده‌ربارێ ده مه‌دیا کوردی که‌ڕ و لاله یان ژی ب گه‌له‌ک زانه‌بوون پرۆپاگاندا سیاسه‌تا پەیەدێ ل سوریێ و ڕۆژاڤایێ کوردستانێ دکه. قاسی مه‌دیا باشوور، تایبه‌تی به‌شێ کو ب كورمانجیا حەرفێن لاتینی وه‌شانێ دکه، پرۆپاگاندا سیاسه‌تا گرێدایی پەکەكێ دکه، مه‌دیا پککێ ب خوه ئه‌وقاس ب زانه‌بوون پرۆپاگاندا خوه ناکه. ئارمانج ژ ڤێ چیه ؟ نایێ زانین .
پەکەکە و مه‌دیا پێڤه گرێدایی ب هه‌موو ئاوایی شه‌رێ ده‌ستهلاتا باشوور و ب تایبه‌تی یا پدکێ دکه. لێ مه‌دیا وان گه‌له‌ک ئه‌شکه‌ره پشتگریا سیاسه‌تا پەکەکێ دکه. ژ بۆ ڤێ ژی گه‌له‌ک جارا نووچه‌یێن ڕۆژاڤایێ کوردستانێ بێ نرخاندن ددن و شرۆڤه ناکن.
ئه‌ڤ یه‌ک ب خوه دبه سه‌ده‌مه‌ک كو پەکەكە ل سەر سیاسه‌تا خوه یا شاش بەردەوام بە.
باشه ما مه‌دیا باشوور نزانه کو، د سه‌ری ده پەیەدە پرۆژه‌یا کێیه؟ ژ بۆ چ ده‌ما به‌هسا شه‌رێن یەپەگێ ل ده‌ڤه‌رێن عه‌ره‌بان، جهێن وه‌ک ڕه‌قا، دێره‌زۆر و ڕۆژهلاتێ فراتێ دکن هه‌ر تشته‌کی وه‌ک بوویه‌ره‌ک خوه‌زایی ددن؟ پەیەدێ ب سەدان جوان و خورتێن كورد ل دەڤەرێن عەرەبان دان شەھید كرن، ژ بۆ چ؟
پرسه‌ک ده‌ردکه‌ڤه هۆلێ. گه‌لۆ ئه‌گه‌ر پێشمه‌رگه‌یێن کوردستانێ ل ده‌ڤه‌رێن کو نه د ناڤا سنۆرێن کوردستانا باشوور دانە، ل باژارێن عه‌ره‌با یێن ئیراقێ شه‌رێ داعیشێ كربایە، دێ هه‌مان مه‌دیایێ دا دێ چه‌وا ئه‌ڤ نووچه وەشاندبوونا. ئه‌گه‌ر ب هه‌زاران پێشمه‌رگه ل ده‌ڤه‌رێن وه‌ک ئه‌مبار و فه‌لووجا شه‌هید بووببوونا، دێ ڕه‌وشه‌نبیر و سیاسه‌تمه‌دارێن کوردستانا باشوور ئه‌ڤ یه‌ک چه‌وه شرۆڤه بكرانا؟
ڕاستیه‌ک هه‌یه کو، هه‌تا ڕاستیا پەکەکێ و ئالیێن پێڤه گرێدایی باش نەھێت تێگهاندن چ جارا ته‌ڤگه‌را کورد پێشیا خوه باش نابینه و هه‌ر دێ ببە له‌یزتکێن پەکەکێ و ده‌ستکه‌فتیێن نه‌ته‌وی وندا بکه.
