ناڤەرۆكا جڤینا بارزانی دگه‌ل که‌سایه‌تی و پێكھاتەیێن ده‌ڤه‌را زومارێ
سه‌رۆک مه‌سعود بارزانی، ئیرۆ سێشه‌می، 19.03.2019، ب مه‌به‌ستا گۆتووبێژکرن و نرخاندنا پرسگرێک و ڕه‌وشا ده‌ڤه‌را زومارێ، دگه‌ل که‌سایه‌تی، مه‌زن، ڕووسپی و نوونه‌رێن پێکهاته‌یان، جه‌ماوه‌ر و نیشته‌جهێن ڤێ ده‌ڤه‌را کوردستانی، کو ژ ئالیێ ئیداری ڤه نها سه‌ر ب پارێزگه‌ها مووسلێ ڤه یه، جڤیا.
ل گۆر مالپه‌را فه‌رمی یا سه‌رۆک بارزانی، د ڤێ جڤینێ ده سه‌رۆک بارزانی گۆتاره‌ک پێشکێشی ئاماده‌بوویێن جڤینێ کر و د گۆتارا خوه دا بالکشانده سه‌ر قوربانیدان و خوه‌راگریا خه‌لکێ ده‌ڤه‌را زومارێ ل هه‌مبه‌ر ئێریشا ته‌رۆریستان و ئێریشا نه‌حه‌زان د سالێن ده‌رباسبوویی دا.
سه‌رۆک بارزانی ده‌ربارێ گرنگیا ناڤچه‌یا زومارێ د شه‌رێ ل دژی داعشێ دا ژی ڕاگهاند کو “کلیلا شکه‌ستنا داعشێ ل زومارێ بوو و تێکشکاندنا ته‌رۆریستێن داعشێ ژ زومارێ ڤه ده‌ست پێ کر.”
د ده‌ربارێ چاره‌نووسا ناڤچه‌یێن مادده‌یا 140 ژی، سه‌رۆک بارزانی دیار کر کو پێویسته مادده‌یا 140 یا ده‌ستوورا عیراقێ ب لهه‌ڤتێگهیشتن و ئاشتیێ بێ جیبجیکرن. بارزانی د ڤێ جڤینێ ده ڕاگهاندیه: “ئه‌گه‌ر هاتبا و ده‌ستوور بهاتبا جیبجیکرن، نها ڕه‌وشا عیراقێ ب ئاوایه‌کێ باشتر دبوو. هه‌روەسا ژ بۆ سه‌پاندنا ده‌فاکتۆیه‌کێ کو به‌رۆڤاژیا جۆگرافیا و دیرۆک و ڕه‌وشا جڤاکی یا ناڤچه‌یان به، دێ گرفتان کوورتر بکه و نایێ قه‌بولکرن ژی.”
د به‌شه‌که دن یا ئاخاڤتنا خوه دا، سه‌رۆک بارزانی به‌حسا ڕه‌وشا سیاسی یا عیراقێ و بوویه‌رێن پشتی ڕه‌فه‌راندومێ کر و دا خویاکرن کو “پشتی هلبژارتنێن عیراقێ قۆناغه‌که دن هاتیه هۆلێ و هه‌موو ئالی هه‌ول ددن کو سوودێ ژ وێ ڕه‌وشا ئه‌رێنی وه‌ربگرین ژ بۆ بجیهکرنا پره‌نسیپێن براتی و پێکڤه‌ژیان و نه‌هشتنا ته‌رۆرێ.”
سه‌رۆک بارزانی په‌سنێ چاندا پێکڤه‌ژیانا وێ ناڤچه‌یێ کر و ڕاگهاند، “جهێ خوه‌شحالیێ یه کو ته‌رۆریستان و نه‌حه‌زان نه‌کارین چاندا پێکڤه‌ژیانا وێ ناڤچه‌یێ تێک ببن” و ته‌که‌زی ل سه‌ر وێ یه‌کێ ژی کر کو “ناکۆکیێن سیاسی دگه‌ل ده‌ستهلات و حکومه‌تان نابه ببە سه‌ده‌ما ناکۆکیان د ناڤبه‌را نه‌ته‌وه و ئۆلان دا.”
بارزانی ئاماژه ب گه‌فا ته‌رۆرێ کر و ته‌که‌ز ل وێ یه‌کێ کر کو چاندا پێکڤه‌ژیانێ باشترین چه‌که ژ بۆ ژناڤبرنا هزرا توندیێ و ته‌رۆرێ. سه‌رۆک مه‌سعود بارزانی ده‌ستنیشان کر: “پێویسته فکرا ته‌رۆرێ ژ بنی ڤه بێ ده‌رخستن و ل کوردستانێ ئه‌م هه‌موو د مرۆڤبوونێ دا برا نه و جوداهیا نه‌ته‌وه‌یی و ئۆلی نه کێشه یه، نرخاندنا مرۆڤان ژی ل سه‌ر بنگه‌ها ڕه‌فتارێن وانه نه ژ به‌ر بیر و باوه‌ریانە.”
د به‌شه‌کی دنێ ڤێ جڤینێ دا، ئاماده‌بوویێن هه‌ڤدیتنێ نه‌رین و پێشنیارێن خوه ژ بۆ چاره‌سه‌رکرنا کێشه‌یێن نیشته‌جهێن ناڤچه‌یێ گهاندن سه‌رۆک بارزانی و وی ژی ب لبه‌رچاڤگرتنا ڤێ ڕه‌وشا ئه‌رێنی یا کو د په‌یوه‌ندیێن ناڤبه‌را هه‌ولێر و به‌غدایێ دا هاتیه هۆلێ، شیره‌ت و شرۆڤه‌یێن پێویست ژ بۆ چاره‌سه‌رکرنا گرفتان و باشتربوونا ڕه‌وشا خه‌لکێ ده‌ڤه‌را زومارێ پێشکێش کرن
