بەرھەم سالح ژ بۆ كەركووكێ دوعا دكە
د گەرمە گەرما بوویەرێن كەركووكێ و گوندەوارێن وێ دا، مالێن كوردان دھاتن وێرانكرن، داگیركرن و مالباتێن خوەجھێن رەسەنێن وان گوندان ب دارێ زۆرێ دھاتن دەرێخستن و دەربەدەر كرن. بەلێ د گەرما گەرما بوویەران دا، زەڤیێن دەخل و دانێ جوتكارێن كورد ، ب ھەزاران دونەم، ژ ئالیێ عەرەبێن ژێ را دبێژن عەرەبێن ھاوردە دھاتن شەوتاندن، رەنج، كەد و بەرھەما سالەكێ یا جوتكارێن بێ تاوانێن كورد ل گوندەوارێن كەركووكێ ل بەر چاڤێن ئەرتەشا عیراقێ و حەشدا شەعبی دھاتن ژناڤ برن.
ئەڤ كریارێن پیس و قرێژ یێن بعەرەبكرنا دەڤەرێ ب بریارێن پارێزگارێ ب وەكالەت یێ كەركووكێ، راكان جبوری، و د بن چاڤدێریا ھێزێن پاراستنا وێ دەڤەرێ ڤە دھاتێن ئەنجام دان.
د ڤێ ناڤبەرێ دا ھەم چاڤێ من ل سەر مەدیا جڤاكی بوو و ھەم ژی كانالێن تەلەڤزیونان تێكڤەددان و من ژ خوە را دگوت ھا ڤێ گاڤێ-گاڤەك دن سەرۆكومار بەرھەم سالح دێ ل سەر ڤان بوویەرێن جەرگشەوات، ل سەر وان كریارێن ب سەرێ برایێن وی یێن كورد دھێن، دێ داخویانیەكێ بدە و ب دژواری وان كریاران شەرمەزار بكە وداخواز بكە كو تخووبەك ژ وان كریاران را بێ دانان. یان ژی سەرۆكومار دێ ب لەزگینی سەرۆكوەزیر و سەرۆكێ پارلامەنتۆیا عیراقێ گازی جڤینەكا ئاوەرتە بكە و ل سەر وان بوویەرێن ل گوندەوارێن كەركووكێ ب سەرێ كوردان دھێن، چەند بریارا بدەن و پارێزگارێ ب وەكالەت یێ كەركووكێ ژ پۆستا وێ قەلبدەن. یان ژی من ژ خوە را دگوت ھەر چ نەبە سەرۆكومار بەرھەم سالح، وەكو پارێزەرێ دەستوورا عیراقێ، دێ بێژە كەركووك و گوندەوارێن وێ دەڤەرێن كێشەدارن و گرێدایی مادەیا 140 ێ نە و دڤێ ژ ئالیێ ھەولێر و بەغدایێ ڤە بێن ئیدارەكرن و پێشمەرگە ڤەگەرا بو وان دەڤەران و دگەل لەشكەرێ عیراقێ ب ھەڤ را ئەمنیەت و ئارامیا دەڤەرێن مادەیا 140 بپارێزن، ھەتا ئەو مادە ب دروستی دھێتە بجیكرن.
لێ مخابن، ئەڤ ھەموو پێشبینی و ھزرێن من ڤالا دەركەتن و تشتەك ژ وان نەكەت بەر چاڤێن من.
لێ ژ نشكاڤە نووچەیەك ھات كو سەرۆكومار بەرھەم سالح سەردانا قەبرێ شێخ عەبدولقادر گەیلانی كریە!
من گەلەك ھزرێن خوە كرن، گەلەك ئینا و بر كا گەلۆ سەرۆكومار ژ بۆ چ چوویە سەر قەبرێ شێخ عەبدولقادر گەیلانی؟ ئەز گەھشتم وێ باوەریێ كو بەرھەم سالح، ژ ترسا كورسیا خوە یا سەرۆكوماریێ ژ دەست بدە، ژ ترسا ئیرانێ دلگران بە و دلێ قاسم سلێمانی بشكینە، ژ ترسا حەشدا شەعبی و شیعەیێن دەنگ ژێ را دایی جارەكا دن باوەرییێ پێ نەدن، ھەما (بەرھەم)ێ مە نەخواستیە چ داخویانیا بدە، نەخوەستیە چ جڤینان دگەل سەرۆكوەزیر و سەرۆكێ پارلامەنتۆیێ بكە و، وەكە پارێزەرێ دەستوورێ، نەخوەستیە مایێ خوە د مادەیا 140 ێ بكە، ھەا دەستێ خوە ب سەرێ خوە ڤەنایە و قەستا سەر گۆرێ شێخ عەبدولقادر گەیلانی كریە و ل وێرێ خوەستئیە ب دەنگەك نزم دوعا ژ بۆ كەركووكێ بكە.
مانێ ھەر ئەڤە ژ سەرۆكومارێ مە دھێت
نسرەت حاجی
2019.05.31
