هێزا تێكدانا جەوهەرێ باشورێ كوردستانێ
هەر وەكى ديار، نھا رەوشا هەرێما كوردستانێ د قوناغەكا نازك و هەستيار دايە، ژ بۆنا كو جارەك دن پێگەهێ خوە ل ناوچەيێ و جيهانا نڤدەولەتى ب ھێز بكە، دخەبتە. د ئەڤێ رەوشا نوكە دا، راگەهاندنا هێزا ب ناڤێ پاراستنا جەوهەرێ باشورێ كوردستانێ د 27 گولانا سالا 2019 ێ دا نیشانا مەترسيەكا مەزنە ل سەر ئەمن و ئاسايشا هەرێما كوردستانێ.
خويايە كو ئەڤ گروپا چەكدار گرێدایى پارتیا كاركەرێن كوردستانێ (پەكەكە) یە، ژبەركو د دەما راگەهاندنا پەياما خوە دا، ڤێ گروپا چەكدار، ئاماژە ب وێ چالاكيا خوە كر يا كو بەرى چەند روژان هێرش كر بۆ سەر بنگەهەك لەشكەرێ توركيا ل دەڤەرا زاخو، لەورا ئاراستەيەكێ راستە راستە ب هێزێن چەكدارێن پارتیا كاركەرێن كوردستانێ ڤە.
پشتى شكەستنێن چالاكيێن پارتیا كاركەرێن كوردستانێ، وێرانكركن و تالانكرنا باژارێن باكورێ كوردستانێ د سالێن دەربازبویى دا كو نەشيا يەك مەتر ژی ژ ئاخا باكورێ كوردستانێ رزگار بكە، د نها دا ب پيلان و نەخشەيێن هندەك ئالیێن دی د ھەولدانا تێكدانا ئارامى و سەقامگيريا هەرێما كوردستانێ دایە.
هێزا ب ناڤێ چەكدارێن پاراستنا جەوهەرێ باشورێ كوردستانێ، د پەیاما راگەهاندنا خوە یا ب هەر دوو زمانێن كوردى و عەرەبى دا، ئاماژە ب تەعريب و تالانكرنێ ل ناوچەيێن هەرێما كوردستانێ دكە، لێ يا سەير ئەوە كو بزاڤا تەعريبكرنا ناوچەيێن كوردى دەمەكێ درێژە ژ ئالیێ هێزا پارتیا كاركەرێن كوردستانێ ڤە دەست پێكرى كو ب سەدەهان گوندێن هەرێما كوردستانێ ل ژێر دەستێ ئەڤان چەكدارێن پەكەكێ دانە و ناهێلن خەلكێن ئەڤان گوندان ل ناڤ مال و مولك و عەردێن خوە دا ئاكنجى ببن.
هەروەسا د خالەكا دی دا ئاماژێ ب پاراستنا دەستكەفتێن نھا يێن هەرێما كوردستانێ دكە، كو د دەمەكى دا ئەو بخو ل سەر ئەمن و ئاسايش و سەقامگيرى و دەستكەفتێن نوكە يێن هەرێما كوردستانێ مەزنترين گەفە.
پێدڤيە حكومەتا هەرێما كوردستانێ رولەكێ كاريگەر د ئەڤى بابەتى دا بگێرە و ب زويترين دەم ل هەمبەر ئەڤان گروپ و هێزێن چەكدار يێن ل ناڤ ئاخا هەرێما كوردستانێ دا رێگر بە و نەهێلە ئەڤ هێز و چەكدارێن كرێگرتى يێن هندەك ئالیان ل ناڤ خاكا هەرێما كوردستانێ ب ئارمانج و هيڤيێن خو شاد ببن.
ئاشتى فەتحى بێسفكى
2019.07.04
