شەرێ چوونا كۆنگرەیێ
شاناز ئیبراھیم ئه‌حمه‌د به‌رپرسا ڕێخستنێن ده‌رڤه د په‌یامه‌کێ دا کۆسره‌ت ڕه‌سوول جیگرێ سه‌کره‌ته‌رێ گشتیێ یه‌کێتیا نشتمانیا کوردستانێ (یه‌نه‌که) ب وێ یه‌کێ تاوانبار دکه کو نه‌کاریه ل گۆر به‌رپرسیاریا خوه به و نه‌کاریه به‌رسڤا داخوازێن ئه‌ندام و کادرۆیێن یه‌کێتیێ بده و یه‌کێتیێ ژ وێ کریزا تێ دا یه خلاس بکه و دبێژه:
- مرنا ڕێبه‌ر مام جه‌لال، ئه‌رک و به‌رپرسیاریا پاراستن، نووکرن و گه‌شکرنا یه‌کێتیێ خسته سه‌ر ملێ مه ھه‌موویان، ژ ھەموویان زێده‌تر ئه‌رکا سه‌ر ملێن جیگرێ سه‌کره‌ته‌رێ گشتی گرانتر و مه‌زنتر کریه. لێ مخابن د وارێ به‌رسڤدانا داخوازێن کادرۆ و ئه‌ندامێن یه‌کێتیێ ژ بۆنا بریارێن یه‌کئالیکه‌ر و به‌ستنا کۆنگه‌ره‌یێ ب وه‌زیفه‌یا خوه نه‌رابوویه. ژ به‌ر ھندێ یه‌کێتیێن خوه‌راگر و پارێزه‌رێن حزبا شه‌ھیدان ژ وە (كۆسرەت رەسوول) گه‌له‌ک بێ ھێڤی بوونه.. .
شاناز ئیبراھیم (خووشکا ھێرۆ ئیبراھیم ھه‌ڤژینا جه‌لال تاله‌بانی) د په‌یاما خوه دا به‌حسا ڕه‌وشا ناڤخوه‌یا یه‌کێتیێ دکه و دێبژه کو ڕه‌وشا ناڤخوه‌یا یه‌کێتیێ وه‌سا خه‌راپ بوویه کو ئێدی “یه‌کێتیێن دلسۆز حزبا خوه ناس ناکن، چ سیمایێ حزباتیێ ب حزبا ٤٤ سالی ڤه نه‌مایه.”
ناڤبۆری داخواز ژ به‌رپرسێن یه‌کێتیێ و ب تایبه‌تی ژ کۆسره‌ت ڕه‌سوول دکه کو ھه‌ما ژ بۆ جاره‌کێ ژی به به‌رژه‌وه‌ندیێن یه‌کێییێ بێخن د سه‌ر به‌رژه‌وه‌ندیێن خوه یێن شه‌خسی ڕا: - گه‌لۆ داخوازێن مه ئه‌و قاس ژ بۆ به‌رژه‌وه‌ندیێن وه یێن شه‌خسی زیانبه‌خشن کو ھوون نه‌وێرن کۆنگره‌یەكا بێ ته‌وافق ببه‌ستن؟ گه‌لۆ ڕێزێن ناڤ یه‌کێتیێ ئه‌و قاس ژ ھه‌ڤ که‌تنه کو ئێدی ھوون نکارن د بن کۆنێ مالا مه‌زن دا بجڤن؟ گه‌لۆ ھه‌تا وێ ده‌ره‌جه‌یێ وه باوه‌ری ب ھه‌ڤ نه‌مایه کو د ده‌ما به‌ستنا کۆنگره‌یێ دا مه‌ترسیا بکارانینا ھێزێن چه‌کدار ل دژی ھه‌ڤ د ناڤ ھۆلا کۆنگه‌ره‌یێ دا ھه‌به؟
شاناز داخوازێ ژ کۆسره‌وت ڕه‌سوول دکه کو ب به‌رپرسیاریا خوه یا دیرۆکی ڕابه وه‌که به‌رپرسێ یه‌که‌م یێ یه‌کێتیێ بریارا به‌ستنا کۆنگه‌ره‌یێ بده.
مه‌دیا سه‌ر ب باسکێ کۆسره‌ت ڕه‌سوول ڤه به‌رسڤا په‌یاما شانازا ئیبراھیم دده و وێ ب دره‌وین و دوروویی ب ناڤ دکه دبێژه کو شاناز ئیبراھیم ب ڕێیا نامه‌یه‌کا بێسه‌روبه‌ر کو ژ بۆ که‌سێ یه‌که‌مێ ناڤ یه‌کێتیێ (کۆسره‌ت ڕه‌سوول) نڤیسیه ” ده‌ست ب قیره قیرێ دکه و ھه‌ول دده ڕاستیان شێلوو بکه…”
سه‌نگه‌ر ئه‌بدولسه‌مه‌د کارگێرێ مه‌لبه‌ندێ ھه‌ولێرێ یێ یه‌کێتیا نشتمانیا کوردستانێ د به‌رسڤا خوه دا ژ شاناز ئیبراھیم ڕا دبێژه کو کۆنگه‌ره‌یا ڤێ جارێ لێپرسینێ ل سه‌ر مال و ملکێ وه و یێن مال و ملکێ یه‌کێتیێ ب ھه‌ده‌ر دێ لێپێرسینێ بکه. دێ لێپرسینێ د گه‌ل یێن وه‌که شانازێ کو دیرۆکه‌ک خه‌راپ د ناڤ یه‌کێتیێ دا ھه‌یه زه‌ره‌ر و زیانه‌کا مه‌زن گه‌ھاندیه یه‌کێتیێ بکه و دبێژه:
- خاتوون ته کو خه‌راپترین ته‌جرووبه د ڕێڤه‌برنا ئۆرگانێن یه‌کێتێ دا ھه‌یه، ژ به‌ر شاشیێن ته یێن د ناڤ کۆمییته و ڕێخستنا به‌ریتانیایێ، ژ نیڤێ زێده‌ترێ ئه‌ندامێن یه‌کێتیێ یێن ڕێخستنێن ده‌رڤه په‌یوه‌ندی ب ته‌ڤگه‌را گۆران کرنه…. تو نھا به‌س مژوولی ئاخاڤتن، مزایه‌ده، به‌خشینا پاره و چێکرنا ته‌که‌تولا ژ بۆ کۆنگره‌یێ، تو دخوازی کۆنگره‌یه‌ک به کو تو ب ڕێیا وێ خوه بگه‌ھینێ سه‌رکردایه‌تیێ… .
- خاتوون شاناز ته مه‌ژیێ مه بر ھندی تو به‌حسا ڕه‌وشا سلێمانیێ و خزمه‌تا وێ دکی، مانێ خوارزیێ ته بخوه به‌رپرسێ به‌ر (په‌ژایی) و به‌حر (ده‌ریایێ) یێ ده‌ڤه‌رێ و سلێمانیێ یه، قه‌ی چیه ئه‌گه‌ر ئێڤاریه‌کێ دگه‌ل ھلدانا قه‌ده‌حا شه‌رابا گرانبوھا و پێخستنا جگه‌ریا مارلبۆرۆ یا ئه‌لمانیایی ته‌له‌فۆنه‌کێ بۆ بکه و ژێ ڕه بێژه “باوکه” ھه‌تا مالا مه وه‌ره، ئه‌ز باوه‌ر دکه‌م دێ ھێت، ژێ بپرسه کی ژ کێمخه‌میا خزمه‌تکرنا سلێمانیێ به‌رپرسیاره، تو بێژی به‌رسڤێ نه‌زانه؟ تو بێژی کو ئه‌و نزانه پاره‌یێ جاده‌یا سه‌د مه‌تری ل کیڤه‌یه؟
وەكە تێ زانین یه‌کێتی خوه ژ بۆ کۆنگریێ ئاماده دکه و شه‌رێ ناڤبه‌را بال و باسکێن ناڤ یه‌کێتیێ ژی گه‌رم دبه. شه‌رێ گه‌رم د ناڤبه‌را سێ باسکێن یه‌کێتیێ؛ باسکێ مالباتا تاله‌بانی، باسکێ مالباتا ئیبراھیم ئه‌حمه‌د و باسکێ کۆسره‌ت ڕه‌سوول دایه.
ده‌ما شه‌رێ ناڤبه‌را مالباتا ئیبراھیم ئه‌حمه‌د و مالباتا تاله‌بانی دا گه‌رم دبه ھینگێ باسکێ کۆسره‌ت ڕه‌سوول دکه‌ڤه پێش و ب ھێز دکه‌ڤه. ھن جاران ژی مالباتا ئیبراھیم ئه‌حمه‌د و مالباتا تاله‌بانی ل دژی باسکێ کۆسره‌ت ڕه‌سوول نێزیکی ھه‌ڤدبن.
د ده‌ما پێکانینا کابینه‌یا نوو یاحکومه‌تا ھه‌رێما کوردستانێ دا ناکۆکی د ناڤبه‌را مالباتا ئیبراھیم ئه‌حمه‌د و مالباتا تاله‌بانی ھه‌بوو ژ به‌ر ھندێ ده‌ستێ کۆسره‌ت ڕه‌سوول ڤه‌کری مابوو و ل گۆر خوه وه‌زیر، سه‌رۆکا پارلامه‌تۆیێ و به‌رپرسێن ده‌ن ھلبژارتن.
ئه‌گه‌ر د ده‌ما به‌ستنا کۆنگه‌ره‌یێ دا ئه‌و ناکۆکی د ناڤبه‌را مالباتا ئیبراھیم ئه‌حمه‌د و مالباتا تاله‌بانی به‌رده‌وام بن دێ کۆنگره د خێرا باسکێ کۆسره‌ت ڕه‌سوول دابه. لێ ئه‌و ئیحتیمال ژی ھه‌یه کو ھه‌ر دو مالبات، مالباتا ئیبراھیم ئه‌حمه‌د و مالباتا تاله‌بانی د کۆنگره‌یێ دا ل دژی کوتله‌یا کۆسره‌ت ڕه‌سوول ھه‌ڤ بگرن.
نووچە/ئەنالیز
ن ھ
2019.08.14
