سەرمایەرازاندن د وارێ گەشتوگوزاریێ دا
وەبەرهێنان د گەشتوگوزارا هەرێما كوردستانێ دا
د سەرهلدانا سالا 1991 ێ دا سەرجەم ناوچەيێن كوردى يێن ل ژێر دەستهەلاتا حكومەتا عيراقێ يا ژناڤچووى دا ھاتن ئازاد كرن. د سالا 1992 ێ دا خەلكێ هەرێما كوردستانێ شيان ب رێكا هەلبژارتنان پەرلەمانێ كوردستانێ دابمەزرينن و ئێكەم كابينەيا حكومەتا هەرێما كوردستانێ دەست بكار بكە، ئێدى گەلێ كورد ل هەرێما كوردستانێ بو خوەدى حكومەتەكا كوردى.
پشتى د سالا 2003 ێ دا حكومەتا دكتاتورا عيراقێ ھاتی ژناڤبرن ئێدى، ژ پێخەمەت ئاڤاكرنا هەرێما كوردستانێ و ب مەرەما زێدەتر خزمەتكرنا هاولاتيان، كوردان د سەرجەم كەرتێن جوراوجور دا ب ئاوايەكێ باشتر دەست ب كار و پروژەيێن مەزن كر.
وەبەرهێنانا د وارێ گەشتوگوزارى يان پيشەسازيا گەشتوگوزارىێ دا ئێك ژ جورێن گرنگێن چالاكيێن بازرگانى و وەبەرهێنانى يە كو ل گەلەك وەلاتان دهێتە هژمارتن یەك ژ قازانجێن گەلەك بلند.
حكومەتا هەرێما كوردستانێ هێدى هێدى پويتە ب ئەڤى كەرتێ گرنگ دا، ژ دەستپێكا كارێ حكومەتا هەرێما كوردستانێ ژ دانانا پلانێن ستراتيژى يێن ب رێك و پێك وەك؛ دابينكرنا ئێمناهى و ئاراميێ ل سەر ئاستێ هەرێما كوردستانێ و پويتەدان ب كەرتێن تايبەت ژ پێخەمەت گەشەپێدانا كەرتێ گەشتوگوزارى ل نافخوە، دابينكرنا پێدڤيێن مروڤايەتى يێن تايبەت ب كەرتێ گەشتوگوزارى ڤە و چەوانيا بەرەڤ پێشڤەچوونا ئەڤى كەرتێ ناڤبرى، بكارئينانا گەشتوگوزاريا ئەلكترونى د ڤەگوهاستن و نيشاندانا گەشتوگوزاريا ل هەرێما كوردستانێ و دياركرنا جهێن گەشتوگوزاري ب رێكێن ئەلكترونى كو ئەڤە ژى دبيتە ئالاڤەك ژ پێخەمەت بەرەڤ پێشڤەبرنا كەرتێ گەشتوگوزارى ب تێچوويەكا كێم.
ئەگەر سالێن دەربازبویى بكەينە پيڤەر و جوداكرنێ بكەين دێ بينين گوهورينێن گەلەك مەزن پەيدابوينە ژ زێدەبونا جهێن گەشتوگوزارى و زێدەبونا خارنگەھ و هوتێل و موتێلان و گوندێن گوزارى و زێدەبارى فيستەڤالێن گەشتوگوزارى كو ئەڤە هەمى بوينە ئەگەر سەرنجا گەشتياران بو لايێ خو راكێشن.
سەرۆكوەزيرێ هەرێما كوردستانێ يێ كابینەیا دەربازبویى (نێچيرڤان بارزانى) د 17 ێ ئادارا سالا 2019 ێ دا د رێورەسمێن ڤەكرنا پێشانگەها روژهەلاتا ناڤەراست يا گەشتوگوزارى ل هەولێرا پايتەخت ئاماژە ب گەلەك پروژەيێن ستراتيژى يێن گەشتوگوزارى كر كو ئێك ژ وان پروژەيان ئەو بوو كو داهاتێ سەرەكى يێ هەرێما كوردستانێ پشتبەستنێ ل سەر گەشت و گوزازێ بكە، نەك ب تنێ ل سەر سامانێن سروشتى وەك نەفت و گازێ.
هەروەسان دەستەيا گشتى يا گەشتوگوزارى ل هەرێما كوردستانێ د پلانا خوە يا ستراتيژى دا ئاماژە كريە كو هەتا سالا 2025 ێ هەرێما كوردستانێ دێ سالانە پێشوازيێ ل 7 مليون گەشتياران بكە، ئەڤ ژی د وارێ پيشڤەچوونا كەرتێ گەشتوگوزارى ل هەرێما كوردستانێ مزگينيەكا گەلەك مەزنە.
حكومەتا هەرێما كوردستانێ د كابينەيێن دەربازبویى دا پويتەدانەكا مەزن ب ئەڤى كەرتێ گرنگ دايە، تايبەتى ژى رۆلێ سەرۆكوەزيرێ كوردستانێ يێ كابینەیا دەربازبویى (نێچيرڤان بارزانى) رۆلەك بەر ب چاڤە و نوكە هەرێما كوردستانێ خوەدى گەلەك جهێن گەشتوگوزارى يە.
بومە ئاشكەرا دبە كو كەرتێ گەشتوگوزارى د پێشڤەبرنا وەلاتان دا گرنگەيەكا مەزن هەيە و هەرديسان ژبو خەزينەيا دەولەتێ داهاتیەكێ مەزنە كو حكومەت دكارە د پاشەرۆژێ دا پشتبەستنێ لسەر ئەڤى كەرتێ گرنگ بكە.
ئاشتى فەتحى بێسفكى
2019-08-16
